ДОМОСТРОЙ
 

КНИГА ГЛАГОЛЕМАЯ ДОМОСТРОЙ, ИМЕЕТЪ В СЕБЕ ВЕЩИ ПОЛЕЗНЫ, ПОУЧЕНИЕ И НАКАЗАНИЕ ВСЯКОМУ ХРИСТИЯНИНУ — МУЖУ, И ЖЕНЕ, И ЧАДОМ, И РАБОМ, И РАБЫНЯМ

1. НАКАЗАНИЕ ОТ ОТЦА К СЫНУ

Благословляю азъ, грешный имярекъ, и поучаю, и наказую, и вразумляю сына своего имярекъ, и его жену, и ихъ чадъ, и домочадцовъ быти во всякомъ християньскомъ законе и во всякой чистой совести и правде, с верою творяще волю Божию и храняще заповеди его, себе утвержающе во всякомъ страсе Божии и в законномъ жительстве, и жену поучающе, тако же и домочадцов своихъ наказующе, не нужею, ни ранами, ни роботою тяжкою, имеюще яко дети во всякомъ покои сыты и одены и в тепломъ храме, и во всякомъ устрои. И вдаю вамъ, християньскому жительству, писание се на память и вразумление вамъ и чадом вашимъ. Аще сего моего писания не внемлете и наказания не послушаете и по тому не учнете жити и не тако творити, яко же есть писано, сами себе ответъ дадите въ день Страшнаго суда, и азъ вашимъ винамъ и греху не причастенъ, кроме моея душа: аз о семъ о всякомъ благочинии благославлялъ и плакалъ, и молилъ, и поучалъ, и писание предлагалъ вамъ, и, аще восприимете сие мое худое учение и грубое наказание, и сие писание со всею чистотою душевною, прося у Бога помощи и разума, поелико возможно, какъ Богъ вразумит, и начнете делом творити вся се — будет на вас милость Божия и пречистые Богородицы, и великих чюдотворцов, и нашего благословления отныне и до века, и дом вашь, и чада ваши, и стяжание ваше и обилие, что вам Богъ подоровал от своих трудов — да будет благословенно и исполненно всяких благъ во веки. Аминь.

2. КАКО ХРИСТИЯНОМ ВЕРОВАТИ ВО СВЯТУЮ ТРОИЦУ[1] И ПРЕЧИСТУЮ БОГОРОДИЦУ И КРЕСТУ ХРИСТОВУ, И СВЯТЫМ НЕБЕСНЫМ БЕСПЛОТНЫМ СИЛАМ, И ВСЕМ СВЯТЫМ, И ЧЕСТНЫМ И СВЯТЫМ МОЩЕМ И ПОКЛОНЯТИСЬ ИМ

Подобает убо всякому християнину ведати,[2] како по Бозе жити в православной вере християньстей: первое убо от всея души веровати во Отца и Сына и Святаго Духа — в неразделную Троицу, и воплощению Господа нашего Исуса Христа, сына Божия, веруй и рождьшую его матерь Богородицу нарицай, кресту же христову с верою покланяйся, яко на том всем человекомъ спасение содела Господь. И понеж иконе же Христове и пречистой матере его и святым небеснымъ бесплотным силам и всемъ святымъ честь воздай, яко сам любов.

3. КАКО ТАЙНАМЪ БОЖИИМЪ ПРИЧАЩАТИСЬ И ВЕРОВАТИ ВОСКРЕСЕНИЮ МЕРТВЫХЪ, И СТРАШНАГО СУДА ЧАЯТИ И КАСАТИСЯ ВСЯКОЙ СВЯТЫНИ

Тайнамъ Божиимъ веруй, телу его, крови веруй причащатися и со страхомъ, на очищение и освящение души же и телу и во оставление грехомъ и в жизнь вечную, веруй воскресению мертвым и жизни будущаго века, помяни Страшный судъ, и воздаяние по деломъ будетъ намъ. Аще когда приочистив себе духовно, в чистой совести с молитвою и с молениемъ целовати животворящий крестъ и святыи честныи образы чюдотворные многоцелебная мощи; по молении прекрестяся поцеловати, духъ в себе удержавъ, а губъ не разеваючи. А благоволитъ Богъ кому причасьтитися божественыхъ Христовыхъ тайнъ, ино лжицею от иерея приимати во уста опасно, губами не сверкати, руце имети к персемъ согбени крестаобразно, а дора и просфира[3] и всякая святая вкушати бережно, крохи на землю не уронити, а зубами просфиры не кусати, яко же прочии, хлебъ уломываючи, невелики кусочки класти в рот, ести губами и ртомъ, не чавкати, со опасением ести; а просфиры с вологою не ести, токмо воды прихлебывати или укропу с виномъ служенымъ или без вина, а иного ничего не примешати. Преже всякия ествы свершати просфира в церкви или в дому, а и с кутьею никако же просфиры не ести, ни с кануномъ,[4] и на кутью просфиры не класти; аще с кемъ о Христе целование сотворити, такоже духъ в себе удержавъ поцеловатися, а губами не плюскати; поразсуди: человеческия немощи, нечювьственаго духа гнушаемся чесночного, хмелного, болного и всякого смрада, коль мерско Господеви нашь смрадъ, и обоняние — сего ради со опасениемъ творити.

4. КАКО ЛЮБИТИ БОГА ОТ ВСЕЯ ДУША, ТАКО ЖЕ БРАТА СВОЕГО, И СТРАХ БОЖИЙ ИМЕТИ И ПАМЯТЬ СМЕРТНУЮ

Посем же возлюбиши Господа Бога твоего от всея душа своея и от всея крепости своея, и подвигни вся твоя дела и обычая, и нравы угодная творити по заповеди его, паки же искреняго си возлюби, всякаго человека, по образу Божию созданна, рекше всякаго християнина; страхъ Божий всегда имей в сердцы своемъ и память смертную — всегда волю Божию творити, и по заповедемъ его ходи. Рече Господь: «В чемъ тя застану, в томъ и сужу»[5] — ино достоитъ всякому християнину готову быти в добрых делех, в чистоте и в покаянии, и во всякомъ исповедании, всегда чающе часа смертнаго.

5. КАКО СВЯТИТЕЛЬСКИЙ ЧИНЪ ПОЧИТАТИ, ТАКО ЖЕ И СВЯЩЕННИЧЕСКИЙ ЧИНЪ И МНИШЕСКИЙ

По святительскому чину всегда прибегай и должную честь имъ воздавай, и благословения и духовнаго поучения от него требуй от них, и припадай к ногамъ их, и во всемъ повинуйся имъ по бозе; священническому чину и мнишескому велию веру и любовь, и повиновение, и всякое покорение пред ними имей, и духовную ползу от нихъ внимай: те убо суть слуги и молебники небеснаго царя, имеютъ дерзновение у Господа просити добрых и полезных душамъ нашимъ и оставление греховъ и жизни вечьныя.

6. КАКО ПОСЕЩАТИ В МОНАСТЫРЕХ И В БОЛНИЦАХ, И В ТЕМНИЦАХ, И ВСЯКАГО СКОРБИ

В монастыри и в болницы, и в пустыни, и в темницы закълюченных посещай и милостыню по силе всяких потребных подавай, елико требуютъ, и види беду их и скорбь, и всяку нужу, елико возможно, помогай имъ, и всякаго скорбна и бедна, и нужна, и нища не презри, введи в домъ свой, напои, накорми, согрей, одежи всею любовию и чистою совесьтию: теми милостива Бога сотвориши и свободу получиши; а родителемъ своим преставльшимся память твори, к церквамъ Божиимъ приношение и в дому по них кормлю твори, нищимъ милостыню, и самъ от Бога помяновенъ будеши.

7. КАКО ЦАРЯ И КНЯЗЯ ЧТИТИ И ПОВИНОВАТИСЯ ВО ВСЕМЪ И ВСЯКОМУ ВЛАСТЕЛЮ ПОКАРЯТИСЯ, И ПРАВДОЮ СЛУЖИТИ ИМЪ ВО ВСЕМЪ, КЪ БОЛЫ²²ИМЪ И К МЕНШИМЪ, И СКОРБНЫМЪ И МАЛОМОЩНЫМ, КО ВСЯКОМУ ЧЕЛОВЕКУ, КАКОВУ БЫТИ, И СЕБЕ О СЕМЪ ВНИМАТИ

Царя бойся и служи ему верою, и всегда о немъ Бога моли, и ложно отнюдъ не глаголи пред нимъ, но с покорениемъ истинну отвещай ему, яко самому Богу, и во всем повинуйся ему; аще земному царю правдою служиши и боишися его, тако научишися и небеснаго царя боятися: сей времененъ, а небесный веченъ, и судия нелицемеренъ, воздастъ комуждо по деломъ его. Тако же и княземъ покаряйтеся и должную ему честь воздавай, яко от него посланомъ во отмщение злодеем. В похвалу же добродеемъ князю своему прияйте всемъ сердцемъ, и властелемъ своимъ; ни помыслите на ня зла. Глаголетъ бо Павелъ апостолъ: «Вся владычества от Бога учинена суть[6]», да аще кто противится властелемъ, то Божию повелению противитца, а царю и князю, и всякому велможе и клеветою, и лукавъствомъ; погубит Господь вся глаголющая лжу, а шепотники и клеветники от народа прокляти суть. Старейшимъ себе честь воздавай и поклонение твори, среднихъ яко братию почитай, маломожных и скорбных любовию привечай, юнейших яко чада люби — всякому созданию Божию не лихъ буди.[7] Славы земныя ни в чемъ не желай, вечьныхъ благъ проси у Бога, всякую скорбь и тесноту з благодарениемъ терпи, обидимъ — не мсти, хулимъ — моли, зла за зло не воздавай, согрешающая не осужай, воспомяни своя грехи, о техъ крепко пекися, злых мужей совету отвращайся, буди ревнитель правожительствующимъ, и техъ делания написуй в сердцы своемъ, и самъ тако ж твори.

8. КАКО ДОМЪ СВОЙ УКРАСИТИ СВЯТЫМИ ОБРАЗЫ, ДОМЪ ЧИСТЪ ИМЕТИ

В дому своемъ всякому християнину во всякой храмине святыя и честныя образы, написаны на иконахъ, по существу ставити на стенах, устроив благолепно со всякимъ украшениемъ, и со светилники, въ них же свещи пред святыми образы возжигаются на всякомъ славословии божии, и по пении погашают, завесою закрываются всякия ради чистоты и от пыли, благочиния ради и брежения; а всегда чистым крылышкомъ ометати, и мяхкою губою вытирати их, и храмъ тот чистъ держати всегда. А к святымъ образомъ касатися достойнымъ в чистей совести и на словословии божии, и на святомъ пении, и молитве свечи вжигати, и кадити благовоннымъ ладономъ и фимияномъ, а образы святыя поставляются, иже в начале по чину, свято почитаеми суть имяны прежереченными, в молитвах и во бдениих, и в поклонех, и во всякомъ славословии Божии всегда почитати их со слезами и съ рыданиемъ, и сокрушенымъ сердцемъ исповедаяся, просяще отпущения грехомъ.

9. КАКО К ЦЕРКВАМЪ БОЖИИМ И В МОНАСТЫРИ С ПРИНОШЕНИЕМЪ ПРИХОДИТИ

А к церквамъ Божиимъ всегда с верою приходити, с приношениемъ: с свечею и с просфирою, с фимияномъ и с ладономъ, с канономъ и с кутьею, и с милостынею, и за здравие, и за упокой, и к празникомъ; и по монастыремъ тако с милостынею и с приношениемъ приходити, егда принесеши даръ свой ко олтарю, воспоминай еуаггельское слово: «Егда нечто имать братъ твой на тя,[8] остави ту даръ свой пред олтаремъ, и шедъ смирися з братомъ своим прежде», тогда принеси даръ свой к Богу от праведнаго своего имения: от неправды неприятна милостыня к силнымъ. Речено бысть: «Лучше не грабити, неже милостыня даяти».[9] От неправды отдай обидимому — приятнее милостыни, а к Богу приятна милостыня от праведнаго стяжания и от добрых делъ.

10. КАКО СВЯЩЕННИКОВЪ И ИНОКОВ В ДОМЪ СВОЙ ПРИЗЫВАТИ МОЛИТИСЯ

А в которые любо празники по обещанию своему да призываютъ священнический чин в домъ свой, елико по силе, и молебная совершают о всякомъ прошении и молятъ за царя и великаго князя имярек, всея Руси самодержца, и за его царицу и великую княгиню имярек и за их благородныя чада, и за братью его и за боляре, и за все христолюбиво воиньсьтво, иже победу на враги и о плененых свободе, и о всемъ священническомъ и иноческом ящаго[10]... А от стола или от трапезы ества и питие тайно износити или высылати не по повелению настоящаго и без благословения святотаство суть и самочиние, таковых всячески бесчествуютъ. Егда званъ будеши кимъ на бракъ,[11] не седи на преднемъ месте, егда кто честнее тебе будетъ, званныхъ имъ; и пришедъ, иже тебе звавый, иного речетъ, ты даждь сему место, и тогда начнеши со студомъ посьледнее место держати; но егда званъ будеши, шедъ сяди на последнемъ месте, да егда приидетъ звавый тя и речетъ ти: «Друже, посяди выше!» — тогда будет ти слава превозлежащими с тобою, яко всякъ возносяйся смирится, а смиряйся вознесется.[12] Егда на трапезе предпоставят ти многоразличныя яди и пития, егда кто честнее тебе будетъ званныхъ, не начни вкушати преже ничто же; аще ты начальстьвенъ будеши, предпоставленую ядь разсужая начинай. У некихъ боголюбцевъ изообилно бываетъ вкушение и питие и излишнее цело снимают, и вперед инымъ на потребу пригожается. И аще кто нечювьственъ и не искусенъ, и не ученъ, и невежда не рассуждая всякаго брашна в пресыщения начинаетъ и небрегомо творитъ, будет и самъ поруганъ и посмеян, и обещестенъ от Бога и от человекъ.

11. КАКО КОРМИТИ ПРИХОДЯЩИХ В ДОМУ 3 БЛАГОДАРЕНИЕМЪ

Егда трапезу предпоставъляеши, вначале священници Отца и Сына и Святаго Духа прославляют, потомъ Девицу Богородицу; и егда ядяху з благодарениемъ и с молчаниемъ или з духовною беседою, тогда аггели невидимо предстоят и написуютъ дела добрая, и ества и питие в сладость бывает; аще начнетъ предпоставленую еству и питие похулят, тогда мотыло обращается сии вкушаюгь; и аще скаредныя речи и блудные срамословие, и смехотворение, и всякое глумление или гусли и плесание и плескание, и скокание, и всякие игры и песни бесовские, — тогда якоже дымъ отгонитъ пчелы, такоже и отыдутъ аггелы Божии от тоя трапезы и смрадныя беседы, и возрадуются беси и приидут, волю свою улучивъ, и вся угодная творится имъ: да такоже бесчиньствуютъ и зернью, и шахматы, и всякими играми бесовскими тешатся, даръ Божий еству и питие, и всякие овощи в поругание помещут, и проливают, другъ друга шибают и обливаютъ, всячески поругаются дару Божию, а дияволи записуютъ дела их, приносятъ къ сотане и вкупе радуются погибели християньския. И та вся дела предстанут в день Страшнаго суда. О горе деющим таковая! Егда жидове седоша ясти в пустыни и пити[13] и, обьядшася и опившеся, и восташа играти и блуд творити, и тогда пожре земля их двадесят тысящь и три тысящи. О устрашитеся, людие, творите волю Божию, якоже есть в Законе писано, а от сего злаго бесчиния соблюди, Господи, всякаго християнина. Ести бы и пити в славу Божию, а не обьядатися, ни упиватися, ни пустошных творити и, аще пред кого поставляеши еству или питие и всякое брашно или пред тобя поставятъ всякаго брашна, не подобает похулити, глаголати: «гнило» или «кисло», или «пресно», или «солоно», или «горко», или «затхлося», или «сыро», или «переварено», или какую ни буди хулу возлогати, но подобаетъ даръ Божий всякое брашно похваляти и со благодарениемъ вкушати, ино Богъ обоняет вонею благоухания, и в сладость претворити. И аще которая ества или питие непотребно, ино о томъ наказывати домочадцовъ, кто то делалъ, штобы впередъ таково не было.

12. КАКО МУЖУ 3 ЖЕНОЮ И 3 ДОМОЧАТЦЫ В ДОМУ СВОЕМЪ МОЛИТИСЬ

По вся дни в вечере мужь ж женою и з детьми, и з домочадцы, кто умеетъ грамоте — отпети вечерня, павечерница, полунощница с молчаниемъ и со вниманиемъ, и с кротъкостояниемъ, и с молитвою, и с поклоны, пети внятно и единогласно, после правила отнюдъ ни пити ни ести. Всегда всяму тому наукъ. А ложася спати, всякому християнину по три поклона въ землю положити, а в полунощи всегда тайно вставъ, со слезами прилежно к Богу молитися, елико вместимо, о своемъ согрешении, а утре воставая такоже, и комуждо по силе и по желанию, а непразнымъ женамъ кланятися до пояса, всякому християнину молитися о своемъ согрешении и пущения грехомъ, и о царскомъ, и о царицине, и о чадех ихъ здравии, и о братии его, и о болярехъ его, и о христолюбивом воиньстве о помощи на враги, и о плененых свободе, и о святительскомъ и священническом чину, и о болящихъ, и в темницахъ заключенныхъ, и за вся християне; жене молитися о своемъ согрешении и о мужи, и о чадехъ, и о домочадцех, и о сродникехъ, и о отцехъ духовных, а мужу такоже. А утре вставъ, Богу молитись и отпети заутреня и часы,[14] а в неделю и в празникъ молебен с молитвою и молчаниемъ, и с кротъкостояниемъ и единогласно пети и со вниманиемъ слушати и святымъ кажение. А где некому пети, ино молитися доволно вечере и утре, а мужемъ отнюд не погрешити по вся дни церковнаго пения вечерни, заутрени, обедни.

13. КАКО В ЦЕРКВИ МУЖУ И ЖЕНЕ МОЛИТИСЯ, ЧИСТОТА ХРАНИТИ И ВСЯКОГО ЗЛА НЕ ТВОРИТИ

А в церкви стояти на всякомъ пении со страхомъ и с молчаниемъ молитися. А дома всегда павечерница и полунощница, и часы пети. А кто прибавит правила своего ради спасения, ино то на его воли, ино боле мзда от Бога. А женамъ ходити к церкви Божии какъ въместимо на произволение по совету с мужемъ, а в церькви ни с кемъ не беседовати, с молчаниемъ и послуша стояти, никуда не обзираяся, ни на стену не прикланятися, ни к столпу, ни с посохомъ не стояти, ни с ноги на ногу не преступати, руце согбени к персемъ крестообразно, твердо и непоколебимо молитися со страхом и трепетомъ, и со воздыханиемъ, и со слезами, и до отпения из церкви не исходити, а приити к началу. А неделя и празники Господския и среду, и пятокъ, и святый постъ, и Богородиченъ в чистоте пребывати, а от обьядения и пияньства, и от пустошныхъ бесед и смехотворения неподобнаго всегда беречися, и от татбы, и от блуда, и лжи, и клеветы, и зависти, и всякаго неправеднаго собрания, и ростовъ, и корчмы, и мыта, и перевозовъ, и мостовщинъ, и всякаго лукавъства не любити и не гневатися ни на кого. Ранного пития и ядения и позного после пения отнюд не творити, есть бы и пить в славу Божию, и в подобно время; малымъ детемъ и работнымъ по разсужению мужа и жены кормити их. Или не весте, яко неправедницы царствия Божия не наследят,[15] якоже апостолъ Павелъ рече: «Аще некий братъ именуемъ или блудникъ, или лихоимецъ, или идолослужитель, или ругатель, или пьяница, или хищник — с таковыми ни ясти, ни пити». И паки рече: «Ни идолослужители, ни прелюбодей, ни сквернителя, ни малакия, ни мужеложницы, ни лихоимцы, ни татие, ни пьяницы, ни досадителе, ни хищницы царствия Божия не наследят», но достоитъ от всякаго зла блюстися всякому християнину.

14. КАКО ЧТИТИ ДЕТЕМЪ ОТЦОВЪ СВОИХЪ ДУХОВНЫХЪ И ПОВИНОВАТИСЯ ИМЪ:

Подобаетъ ведати се, како чтити детемъ отцевъ своихъ духовных, изыскати отца духовнаго добра, боголюбива и благоразумна, и разсудителна, а не потаковъника пьяницу, ни сребролюбива, ни гневлива. Такова подобает чтити и повиноватися ему во всемъ и каятися пред нимъ со слезами, исповедати грехи своя не стыдно и безсрамно, и заповеди его хранити. А призывати его к себе в домъ часто и извещатися всегда во всякой совести,[16] и наказание его с любовию приимати, и послушати его во всемъ и чтити его. И беите челомъ пред нимъ ниско: онъ учитель нашь и наставникъ, и имеите его со страхом и любовию к нему приходити и приношение ему давайте от своихъ трудовъ по силе; и советовати с нимъ часто о житии полезномъ, и востязатися от греховъ своихъ, и како учити и любити мужу жена своя и чада, а жене мужа своего слушати и спрашиватися по вся дни. А извещатися о гресехъ своих всегда пред отцемъ духовнымъ и обнажати грехи своя вся, и покарятися пред нимъ во всемъ: тии бо бдят о душахъ наших, и ответъ дадутъ о нас в день Страшнаго суда. А не поносити их, ни осужати, ни укоряти, а о комъ учнутъ печаловатися, ино его слушати, и виноватаго пожаловати, по вине смотря, с нимъ же разсудя.

15. КАКО ДЕТЕЙ СВОИХЪ ВОСПИТАТИ,[17] ВО ВСЯКОМЪ НАКАЗАНИИ И СТРАСЕ БОЖИИ

А пошлетъ Богъ у кого дети — сынове или дщери, ино имети попечение отцу и матери о чадех своих, снабдити их и воспитати в добре наказании, и учити страху Божию и вежству, и всякому благочинию, и, по времени и детемъ смотря и по возрасту, учити рукоделию матери дщери, а отцу сынове, кто чево достоинъ, каковъ кому просугъ Богъ дастъ; любити ихъ и беречи, и страхомъ спасати, уча и наказуя и, разсужая, раны возлогати. Наказуй дети во юности[18] — покоитъ тя на старость твою. И хранити и блюсти о чистоте телесней и от всякаго греха отцемъ чадъ своих, якоже зеницу ока и яко своя душа. Аще что дети согрешаютъ отцовымъ и матернимъ небрежениемъ, имъ о техъ гресехъ ответъ дати в день Страшнаго суда. А дети, аще не брегомы будутъ в ненаказании отцовъ и матерей, аще что согрешатъ или что сотворят, и отцемъ и матеремъ з детми от Бога грех, и отъ людей укоръ и посмехъ, а дому тщета, а себе скорбь и убытокъ, а отъ судей продажа и соромота. Аще у богобоязнивых родителей и у разумныхъ и благоразсудныхъ чада воспитани в страсе Божии, и в добре наказании, и в благоразсудномъ учении всякому разуму и вештву, и промыслу, и рукоделию, — и те чада с родители своими бываютъ отъ Бога помиловани, а отъ освященнаго чину благословены, а отъ добрых людей хвалими, а в совершене возрасте добрые люди с радостию и зъ благодарениемъ женятъ сыновъ своихъ по своей версте, по суду Божию, а дщери за ихъ дети замужь выдаютъ. А аще отъ таковых которое чадо Богъ возметъ в покаянии и съ причастиемъ, то отъ родителю безскверная жертва к Богу приносится, и в вечныя кровы вселяются, а имеютъ дерзновение у Бога милости просити и оставления греховъ и о родителехъ своихъ.

16. КАКО ЧАДЪ ВОСПИТАТИ, С НАДЕЛКОМЪ ЗАМУЖЬ ВЫДАТИ

А у кого дочь родится, ино разсудны люди от всякаго приплода на дочерь откладывают: на ее имя или животинку ростятъ с приплодомъ, а у полотенъ, и у вусчинъ, и у ширинокъ, и у вубрусовъ, и рубашекъ по вся годы ей в пришенной сундукъ кладутъ и платье, и саженье, и монисто, и святость, и суды оловяные и меденые, и деревяные; прибавливати непомношку всегда, а не вдруг, себе не в досаду, и всево будетъ полно. Ино дочери растутъ, а страху Божию и вешътву учатся, а приданое с ними вдругъ прибывает, и какъ замужь зговорятъ — ино все готово. А толко ранее хто о детехъ не смышляетъ, да какъ замужь давать, и въ ту пору все покупать, ино скорая женитва видомая работа; а по судбамъ Божиимъ толко та дочь преставится, ино ее наделкомъ поминают по еи души сорокоустъ и милостыню ис того дают. А толко иные дочери есть, тако ж о них промышляти.

17. КАКО ДЕТИ УЧИТИ И СТРАХОМЪ СПАСАТИ

Казни сына своего отъ юности его и покоитъ тя на старость твою и дастъ красоту души твоей; и не ослабляи, бия младенца; аще бо жезломъ биеши его, не умретъ, но здравие будетъ, ты бо бия его по телу, а душу его избавляеши от смерти. Дщерь ли имаши, положи на них грозу свою, соблюдеши я отъ телесных; да не посрамиши лица своего, да в послушании ходит, да не свою волю приимеши и в неразумии прокудит девство свое, и сотворится знаемъ твоимъ в посмехъ, и посрамят тя пред множествомъ народа. Аще бо отдаси дщерь свою бес порока, то яко велико дело совершиши и посреди собора похвалишися, при концы не постонеши на ню. Любя же сына своего, учащай ему раны, да последи о немъ возвеселишися, казни сына своего измлада и порадуешися о немъ в мужестве, и посреди злых похвалишися, и зависть приимутъ враги твоя. Воспитай детище с прещениемъ, и обрящеши о немъ покой и благословение; не смейся к нему, игры творя: [19] в мале бо ся ослабиши — в велице поболиши, скорбя, и после же яко оскомины твориши души твоей. И не дажъ ему власти во юности, но сокруши ему ребра, донележе растетъ, и, ожесточавъ, не повинет ти ся и будет ти досажение и болезнь души, и тщета домови, погибель имению и укоризна отъ суседъ, и посмехъ пред враги, пред властию платежь и досада зла.

18. КАКО ДЕТЕМЪ ОТЦА И МАТИ ЛЮБИТИ И БЕРЕЧИ[20] И ПОВИНОВАТИСЯ ИМЪ И ПОКОИТИ ИХ ВО ВСЕМЪ

Чада, послушайте заповеди Господни, любите отца своего и матерь свою, и послушайте их, и повинуйтеся имъ по Бозе во всемъ, и старость ихъ чтите, и немощь ихъ и скорбь всякую от всея душа понесите на своей выи, и благо вамъ будетъ, и долголетны будете на земли, симъ очистите грехи своя и от Бога помиловани будете, и прославитеся от человекъ, и домъ его будетъ благословенъ в веки, и насьледит сыны сыновъ твоих, и досьтигнетъ старости маститы, во всякомъ благоденьстве дни своя препровожают. Аще ли кто злословитъ или оскорбляетъ родителя своя или кленетъ, или лаетъ, сий пред Богомъ грешенъ, отъ народа проклятъ; аще кто биетъ отца и матерь — отъ церкви и отъ всякия святыни да отлучится, и лютою смертию и градскою казнью да умрет,[21] писано бо есть: «Отча клятва иссушит, а матерня искоренитъ». Сынъ или дщерь, не послушьливы отцу или матери, в пагубу имъ будетъ, и не поживутъ дней своихъ, иже прогневают отца и досажаютъ матери. Мнится не согрешяя к Богу, и есть поганого горее, и обещникъ есть нечестивымъ, о них же пророкъ Исаия рече: «Возмется нечестивый, да не видит славы Господня».[22] Сихъ нечестивыи именова, иже бесчествуют родителя своя и паки насмехающагося отцу и укаряюща старость матерню, да ськлюютъ их вранове и снедят орли! Честь же творяй отцу и матери, и повинующеся имъ по Бозе во всемъ, возвеселитися имутъ о чадех своихъ, и в день печали избавит их Господь Богь, и молитву ихъ услышит, егоже просят, подастъ имъ вся благая; покояй матерь свою волю Божию творит и угожаяй отцу во благихъ поживет. Вы же, чада, деломъ и словомъ угожайте родителемъ своимъ во всякомъ блазе совете, да благословени будете отъ нихъ: отчее благословение домъ утвердит, и матерня молитва отъ напасти избавит. Аще ли оскудеют разумомъ в старости отецъ или мать, не бесчествуйте ихъ, не укаряйте, да от своихъ чадъ почтени будете, не забывайте труда матерня и отцова, яже о васъ болезноваша и печални быша, покойте старость ихъ и о них белезнуйте, якоже они о вас. Не глаголи много: «Сотворих имъ добра одеяниемъ и пищею, и всякими потребами», но ни си свободи, симъ не можеши бо ею родити и тако ею болети, яко она о тебе; тем же со страхомъ раболепъно служити имъ, да и сами отъ Бога мзду приимете и жизнь вечную наследите, яко свершители заповеди его.

19. КАКО ВСЯКОМУ ЧЕЛОВЕКУ РУКОДЕЛЬНИЧАТИ И ВСЯКОЕ ДЕЛО ДЕЛАТИ БЛАГОСЛОВЯСЯ

В домовитомъ обиходе и везде всякому человеку, государю или государыни, или сыну или дщери, или служке мужеска полу и женьска, и стару и малу всякое дело начати или рукодельничати: или ести, или пити, или ества варити, или печи што и всякие приспехи делати, и всякое рукоделие, и всякое мастерьство, и, устроивъ собя, очистивъ от всякия скверны и руки умывъ чисто, преже святымъ покланятися трижды въ землю, а по нужи или до пояса, кто умеетъ достойно проговорити да, благославясь у настоящаго, да молитву Исусову проговоря да перекрестяся, молвя: «Господи благослови, отче», — тоже начати всякое дело, ино тому Божия милость поспешесътвуетъ, аггели невидимо помогают, а беси отбегнут, и то дело Богу в честь, а души на пользу. И ести, и пити зъ благодарениемъ, ино сладъко, а што впрокъ зделано, ино мило, а делати с молитвою и з доброю беседою, или с молчаниемъ, а делаючи што ни буть, начнется слово празное или хулное, или с роптаниемъ, или смехи, или кощуны, или скверныя и блудныя речи — от такова дела и от таковыя беседы Божия милость отступитъ, аггели отидутъ скорбни, и возрадуются нечестивии демони, видя волю свою содевающу безумнии християне; и приступятъ ту лукавии, влагающе в мысль всякую злобу и всякую вражду и ненависть, и подвизают помыслы на блудъ и на гневъ и на всякие кощуны и сквернословие,[23] и на всякое зло ино, — то уже дело, ества или питие не споро, и всякое мастерство и всякое рукоделие не о Бозе свершается, Богу на гневъ, а людемъ не благословленое не потребно и не мило, и не прочно, а ества и питие не укусна и не сладка, только врагу и его слугамъ угодно и сладко, и радостно. А къто въ естве и в питии, и во всякомъ рукоделии не чисто стряпает, и во всякомъ мастерьстве што украдетъ или прилжет, или божитца на криве: не толко зделано или не в толке стало, а онъ лжетъ, — и те все дела не угодны Богу, беси написуютъ, и в томъ во всемъ человеку истязану быти в день Страшнаго суда.

20. ПОХВАЛА ЖЕНАМЪ[24]

Аще даруетъ Богъ жену добру, дражайши есть камени многоценнаго, таковая от добры корысти не лишится, делаетъ мужу своему все благожитие. Обретши волну и ленъ, сотвори благопотребно рукама своима, бысть яко корабль куплю деющи: издалече збираетъ в себе богатество и востает из нощи, и дастъ брашно дому и дело рабынямъ, от плода руку своею насадит тяжание много; препоясавъше крепко чресла своя, утвердит мышца своя на дело и чада своя поучаетъ, тако же и рабъ, и не угасаетъ светилникъ ея всю нощь: руце свои простирает на полезная, лакти же своя утвержает на вретено, милость же простирает убогу, плод же подаетъ нищим, — не печется о дому мужь ея: многоразлична одеяния преукрашена сотвори мужу своему и себе, и чадомъ, и домочадцемъ своимъ. Всегда же мужь бысть в соньмищи с вельможи и сядет знаемымъ вельми честенъ бысть, и благоразумно беседова разумеетъ, яко добро делати, никто же без труда венчанъ будетъ. Жены ради добры блаженъ мужь, и число днии его сугубо, жена добра веселит мужа своего и лета его исполнит миромъ, жена добра часть блага в части боящихся Господа да будет, жена бо мужа своего честне творяще: первие Божию заповедь сохранивъ, благословена будет, а второе отъ человекъ хвалима есть. Жена добра и страдолюбива и молчалива венецъ есть мужеви своему, обрете мужь жену свою добру износитъ благая из дому своего: блаженъ есть таковыя жены мужь, и лета своя исполняют во блазе мире; о добре жене хвала мужу и честь.

21. НАКАЗЪ МУЖУ И ЖЕНЕ, И ЛЮДЕМ, И ДЕТЕМЪ, КАКО ЛЕПО БЫТИ ИМЪ

Да самому себе государю и жену, и детей, и домочадцов своихъ учити не красти, не блясти, не солгати, не оклеветати, не завидети, не обидети, не клепати, чюжаго не претися, не осужатися, не бражничати, не просмеивати, не помнити зла, не гневатися ни на кого, к большимъ быти послушны и покорну, к средънимъ любовну, к меншим и убогимъ приветну и милостиву, со всякимъ управа без волокиты, ноипаче наимита наимомъ не изобидети, а всякая обида со благодарениемъ терпети Бога ради: и поносъ, и укоризна, аще по деломъ поносятъ и укаряютъ, сие с любовию приимати, и от таковаго безумия отвращатися, а противъ не мстити. Аще в чемъ не повиненъ, за сие от Бога мзду приимеши. А домочатцевъ своихъ учи страху Божию и всякой добродетели, и самъ тая же твори, вкупе от Бога обрящете милость. Аще ли небрежениемъ и нерадениемъ самъ или жена мужнимъ ненаказанием согрешит или что злое сотворитъ, и вси домочадцы, мужи и жены, и дети господаревым ненаказаниемъ каковъ грех или что зло сотворят, или брань, или татбу, или блудъ, все въкупе по деломъ своимъ приимутъ: зло сотворшии — муку вечную, а добро сотворшии, Богоу угодно поживше, — жизнь вечную наследят в царствии небеснемъ.

22. КАКОВЫ ЛЮДИ ДЕРЬЖАТЬ[25] И КАКЪ О НИХ ПРОМЫШЛЯТИ ВО ВСЯКОМЪ УЧЕНИИ И В БОЖЕСТВЕНЫХ ЗАПОВЕДЕЙ, И В ДОМОВНОМЪ СТРОЕНИИ

А людей у собя добрых дворовыхъ держати, чтобы были рукоделны, кто чему достоинъ и какому рукоделию ученъ, не воръ бы, не бражник, не зерьщикъ, не тать, не разбойникъ, не блудникъ, не чародей, не корчмитъ, не оманьщикъ; всякой бы человекъ у доброго государя наученъ страху Божию и вежьству, и смиренью, и всякимъ добродетелемъ, доброму промыслу, не солгалъ, ни розбилъ, никово бы не обиделъ, сыт бы был государевымъ жалованьемъ да оденъ, или своимъ рукоделиемъ; а чемъ государь пожалует: платьемъ или лошедь и всяким нарядцомъ, или пашенькою, или кокою торговлею, а и сам что замыслитъ своими труды, — ино лучшее платенко верьхнее и нижнее, и рубашка, и сапогь блюсти по праздникомъ и при добрых людех в ведро, а всегды было бы чистенко и не изваляно, и не изгрязнено, и не излито, и не измочено, и не измято. А которой человекъ глуп и грубъ и невежда, и небреженъ, а и есть у нево платенко, государьско жалованье или своими труды зделано, да беречи не умеет, ино государю или кому приказано у таких нечювьсьтвениковъ платье берегутъ у собя лучшее, дадутъ, коли во время надеть да, опять снемше, у собя блюдутъ. А всемъ дворовымъ людемъ наказъ: всегда што делают в ветшаном платье, а какъ пред государемъ и при людех — въ чистомъ во вседневномъ платейцы, а в празники и при добрых людехъ или с государемъ или съ государынею где быти, ино в лучшемъ платьи; а беречи от грязи и от дожжа, и от снегу, и пришед да снявъ платейце, высушить да вымять, и вытерьть, и выпахать хорошенько, укласть и упрятать где то живет, — ино и себе мило, и от людей чесно, и государю споро, и слушкам прочно, и всегда внове. А люди бъ были во чти и в грозе, и во всякомъ дозоре, промеж бы собя не кралися, чюжево бы отнюдь не хотели никоими делы, а государьского бы берегли все за одинъ, а государю бы и государыни не лгали и не клеветали ни на кого ни в чемъ, а государи бы темъ не потакали, обыскивали бы прямо ставя с очей на очи, дурному бы не попущали, а доброго бы жаловали, ино всякъ добру ревнуетъ и государьское жалованья хочет выслужить правдою и прямою своею службою, и государьскимъ наказом и добрымъ наукомъ векъ живетъ и душу спасетъ, и государю служит, и Богу угодит. Да наипаче указывати, которымъ вместно к церкви Божии всегда ходити и по праздникомъ или во дворе петья слушати, и особъ наедине молитися, чистота телесная хранити от всякаго блуда, и пьяньства, и лакомъства, и от безвременного пития и ествы, и обьядения, и пияньства воздержатися, и отцовъ бы духовных и з женами своими имети, и на покаяния приходили, а женатые с своими женами законно бы жили по духовнаго отца наказанию, от женъ бы своих не блудили, а жены от мужей; да чему самъ от государя наученъ, тово бы и жены наказывали, всякому страху Божию и вежству, и государыни бы слушали и повиновалася во всемъ, и своими труды и рукодельемъ выслуживала, а не крала бы и не лгала, и не бляла, и не бражничала, и з дурными речми к государыни не приходила, и волхвовъ, и с кореньемъ, и з зельемъ, кто темъ промышляетъ, с теми бы отнюдь не зналася и государемъ бы про таких людей не сказывали, то бо суть слуги бесовския. Служили бы государемъ своимъ верою и правдою, и добрыми делы, и праведными труды, а государи бы и государыни людей своих, мужей и женъ, и робят, и всяких слугъ жаловали, и кормили, и поили, и одевали, и въ тепле бы жили и во всякомъ покои, и в благоденьстве всегда, и государи бы себя и свою душу и домъ свой добре строивъ, и домочадцовъ безо всякия скорби, тоже нищих и странных и убогих вдовицъ и сирот покоити достойно от своих праведных трудовъ и к церквамъ Божиимъ и церковникомъ, и в монастыри проносити милостыня, и к себе в домы своя призывати, ино то и Богу приятно, и души полезно; а отнюдъ бы не вмещалося в домъ ни от насилия, ни от грабления, ни от всякого мшелоимъсътва, ни от посулу, ни от поклепу, ни от резоимъства, ни от ябедничества, ни от крива суда, — аще от сего зла Богъ соблюдетъ, тотъ домъ будетъ благословенъ отныне и до века.

23. КАКО ВРАЧЕВАТИСЯ ХРИСТИЯНОМЪ ОТ БОЛЕЗНИ И ОТ ВСЯКИХ СКОРБЬ

Аще Богъ пошлет на кого болезнь или какую скорбь, ино врачеватися Божиею милостию, да слезами, да молитвою, да постомъ, да милостынею к нищимъ, да истиннымъ покаянием, да благодарение и прощение, и милосердие, и нелицемерная любовь ко всякому, да отцовъ духовных подьвизати на моление Богу, и молебны пети, и вода святити с честных крестов и со святых мощей и с чюдотворных образовъ, и масломъ свящатися, да и по чюдотворнымъ, по святымъ местомъ обещеватися и, приходяще, молитися со всякою чистою совестию, тем целба всякимъ различнымъ недугомъ от Бога получити, да и от всяких греховъ удалятися, и впередь никакова зла не творити; а отцовъ духовных заповеди хранити и епитемъи исправляти, темъ очиститися от греха, и душевная и телесная болезнь исцелити, и Бога милостива сотворити. И всякому християнину целити себе от всяких различьных недугъ душевныхъ и телесныхъ, и душетленныхъ и болезненых страстей, жити по заповедемъ Господнимъ и по отеческому преданию, и по християньскому закону, якоже в начале писано книги сея от первыя главы вся пятьнадесят главъ и прочая главы книги сея такоже, 25 глав, внимати и достоит творити, ино и Богу угодит, и душу спасет, и греха избудетъ, и здравие получитъ душевное и телесное, и вечных благъ наследникъ будетъ. А кто безстрашенъ и бесчиненъ, страху Божию не имеетъ и воли Божии не творит, и закону християньского и отеческаго предания не хранит, о церкви Божии и о церковномъ пении, и о келейномъ правиле, и о молитве, и о всякомъ славословии Божии не радитъ, естъ и пиетъ без воздержания, и во обьядение и в пияньство, и не в подобно время, и законного жительства не хранит, недели, и среды, и пятка, и празниковъ, и Великого поста, и Богородичьна, без воздержания блудитъ и не в подобно время, и чрезъ естество и чрезъ законъ, или от жены блудятъ, или содомъский грехъ содевают, и всяко скаредие творятъ и всякие богомерзские дела: [26] блудъ, нечистоту, сквернословие и срамословие, песни бесовские, бубны, трубы, сопели, — всяко бесовское угодие и всякое бесчиние, и бесстрашие, к сему ж чарование и волхвование, и наузы,[27] звездочетье, рафли, алнамахи, чернокнижье, воронограй, шестокрылъ, стрелки громныя, топорки, усовники, дна камение, кости волшебныя и иныя всякия козьни бесовъския. Или кто чародействомъ и зелиемъ, и корениемъ, и травами на смерть или на потворьство окормляетъ, или бесовскими славами и мечтаньми, и кудесом чаруетъ на всякое зло или на прелюбодейство, или кто кленется именемъ Божиимъ во лжу или клевещетъ на друга, туто ж прочти и 24 главу. В техъ во всехъ делехъ и в обычеехъ и нравех востаетъ в человецехъ гордость, ненависть, злопомнение, гневъ, вражда, обида, лжа, татьба, клятъва, срамословие и сквернословие, и чарование, и волхвавание, смех, кощуны, обьядение, пияньство безвременное и рано и поздно и всякая злая дела, и всякий блудъ, и всякая нечистота. И благий человеколюбецъ Богъ не терпя в человецехъ таких злыхъ нравовъ и обычаевъ и всякихъ неподобных делъ, якоже чадолюбивый отецъ скорбьми спасаетъ,[28] и ко спасению приводит, показуя, и наказуетъ за премногия грехи наша, смерти же скорыя не предастъ, не хощет смерти грешничи, но ожидает покаяния, еже обратитися и живу быти ему; аще не обратятся и не каются от злыхъ делъ, наводит грехъ ради наших, овогда глад, ово моръ, ово пожаръ, ово потопъ, ово пленение, и о посечение от поганых и градомъ разорение, и церквамъ Божиимъ и всякой святыни потребление и всякому стяжанию расхищение, овогда от царска гнева разграбление имению и самому казнь без милости и поносная смерть, и от разбойникъ и от татей окрадение и от судей продажа и мучение, ово бездождие, ово безвременные дожди и нестройные лета, и зима неугодна, и лютые мразы, и земли бесплодие, и всякому животному — скоту и зверемъ, и птицамъ, и рыбам: и всякому обилию скудость, родителемъ и жене, и чадомъ нужными и напрасными, и съкорыми смертьми лишение от многоразличных нужныхъ и тяжкихъ недуговъ страдания и злескончание. И о всех сихъ настоящих бедах не уцеломудримся и не накажемся, и в покаяйие и в чювьство, и в страх не внидемъ, видя таково праведного гнева Божия наказание за премноги» грехи наши? И паки Господь наказуя ны и обращая к покаянию, якоже и долготерпеливаго Иова искушая,[29] посылая различныя скорби и болезьни, и тяжкия недуги, от духов лукавых мучение, телу согнитие, костемъ ломота, отокъ и опухолъ на все уды, проходом обоимъ заклад и камень во удахъ, и глухота, и слепота, и немота, в утробе терзание, и блевание злое, и на низъ во оба прохода кровь и гной, и сухотная, и кашель, и главоболение, и зубная болезнь, и камчюгъ, и френьчюги,[30] и разслабление, и трясение, и всякие тяшкие различные недуги — наказание гнева Божия. И сия вся своя грехи презрехомъ и в покаяние не внидохомъ, ничто же не уцеломудри, ни устраши и не накажемъся, о семъ видя Божие наказание на себе и болезни тяшкие, оставя Бога, создавшаго ны, и милости и прощение греховъ от него не требуя, еже зле содеяхомъ и приступихомъ к нечистымъ бесомъ, от них же отрекохомъся во святомъ крещении и всехъ делъ их, и призываемъ к себе чародеевъ и кудесниковъ, и волъхвовъ, и всяких мечетниковъ и зелейниковъ, и с кореньемъ, от нихже чаемъ душетленныя и временныя помощи и уготоваемъ собя дияволу во дно адово во веки мучитися. О безумнии человеци! Оле неразумия вашего, не разсуждаем своихъ греховъ, за што ны Богъ наказуетъ, и не каемся о них, и не престаемъ от злобъ и от всяких неподобныхъ делъ, не помышляемъ вечнаго, но желаемъ тленнаго и временнаго. Престаните от злобъ и от всяких душетленных делъ и очистимъ себе истинным покаяниемъ, яко милостивъ Господь помилуетъ от грехъ и подастъ телесемъ здравие и душамъ спасение и вечных благъ не лишит, аще кто потрудится в семъ веце царства ради небеснаго. Писано бо есть во святомъ Апостоле: «Многими скорбми подобаетъ намъ внити в царство небесное»;[31] во святомъ Еуаггелии речено бысть: «Уский и прискорбный путь[32] вводяй в живот, а широкий и пространный, вводяй в пагубу», и паки рече Господь: «Нужно есть царство небесное,[33] и нужницы восхищаютъ е».

24. О НЕПРАВЕДНОМЪ ЖИТИИ

А кто не по Бозе живет, не по християньскому житию чинит всякую неправду и насилие, и обиду силно отоиметъ, возмя не заплатит, волокитою уморитъ, а молода человека во всемъ изобидит, а на суседьсьтве кто не добръ или в селе на своих християнъ или на приказе, или на власти дани тяжкия, и всякие уроки незаконныя накладывает, или чюжую ниву попахалъ, или лесъ посекъ, или землю переоралъ, или лугъ перекосилъ, или ловлю рыбную переловилъ, или борти или перевесье и всякую ловлю, и всякое угодье неправдою и насилиемъ сотворит или ограбит, или покрадет, или розобьетъ, или кого чимъ поклепет, или кого чимъ подкинет, или чимъ ополичьнитъ, или напрасно кого продастъ, или в работу неповинных лукавьствомъ или насилиемъ охолопит, или непрямо судитъ или неправедно обыскиваетъ или накриве послушествуетъ, или кающимся немилостивъ, или лошадь или всякую животину и всякое стяжание и села или винограды, или дворы и всякое угодие силою отимет, или дешево в неволю купит, или ябедничествомъ вытяжет или корчемнымъ прикупомъ, или лихвы, и всякимъ лукавным ухищрениемъ, и неправедным собраниемъ или росты и насъпы и мыта, всякия неподобныя дела: блудъ, нечистоту, сквернословие и срамословие, клятвопреступление, и ярость, и гневъ, и злопамятство, — самъ государь или государыня творят или дети их или люди их, или крестьяне их, а они, государи, о томъ не возбраняют и не обороняют, и управы не дают — прямо и все вкупе будутъ во аде, а зде прокляти, ино во всех техъ плодех не благословеных, а от Бога не помилованъ, а от народа проклят, а обидимии Богу вопиют; а своей души на погибель, а дому тщета, и все проклятое, а не благословеное; и носити, и ясти, и пити — то все стяжание и плоди не Божии, но бесовские; низходятъ во адъ живы душа их, тако творящих, а от нихъ всякого обилия и плодовъ от таковых неприятна Богу милостыня ни при животе, ни по сьмерти, аще хощете вечныя муки избыти, отдай неправедное обидимому и кайся вперед тако не творити со всеми своими, еже есть писано: «Скоръ Господь на милость свою, истинно кающихся приемлетъ, и великимъ грехомъ свободу даруетъ».

25. О ПРАВЕДНОМЪ ЖИТИИ, АЩЕ КТО ПО БОЗЕ ЖИВЕТ И ПО ЗАПОВЕДЕМЪ ГОСПОДНИМЪ, И ПО ОТЧЕСКОМУ ПРЕДАНИЮ, И ПО ХРИСТИЯНЬСКОМУ ЗАКОНУ, АЩЕ ЛИ ВЛАСТЕЛИНЪ СУДИТ ПРАВЕДНО И НЕЛИЦЕМЕРНО ВСЕМЪ РАВНО — БОГАТУ И УБОГУ, И БЛИЖНЕМУ, И ДАЛНЕМУ, ДОВОЛНИ БУДУТЪ УРОКИ ПРАВЕДНЫМИ, И ТВОРИТИ

Аще ли в селех такоже и во граде и на соседьстве хто добръ и у своих християнъ или на власти, или на приказе праведъныя уроки в подобно время емлет, не силою и не граблением, и не мучениемъ, а коли что не радилося, а заплатити нечим, и онъ наровит, а у суседа или у своево християнина чево не достало на семена или лошади или коровы нетъ, или государьские дани нечимъ заплатить, ино ево ссудити и подмочи, а у самого мало, ино заняти, а о нихъ болезновати от всея душа, а ото всякаго обидящаго беречи их в правде, а сомому и людемъ твоимъ отнюд никово ни в чемъ не обидети: ни в пашне, ни в земле, ни в домашнемъ ни в какомъ запасе, ни в животине, и всякаго неправеднаго стяжания не желати, благословлеными плоды и праведнымъ стяжаниемъ жити подобаетъ всякому християнину. И видя Богъ ваша добрая дела и такову милость, и нелицемерую любовъ ко всем, и правду во всемъ, и подастъ Богъ богатую милость, и гобину плодомъ, и всякого изобилия умножит, и милостыня та от праведных трудовъ и Богу приятна, и молитву ихъ Богъ услышит, и от греховъ свободит и жизнь вечьную даруетъ.

26. КАКО ЖИТИ ЧЕЛОВЕКУ, СМЕТЯ СВОЙ ЖИВОТ

А во своемъ во всякомъ обиходе: и в лавочномъ, и во всякомъ товаре, и в казне, и в полатахъ, или в дворовомъ во всякомъ запасе или в деревенскомъ или в рукодельи, и в приходе и в росходе, и в заимехъ, и в долгехъ всегда себе смечать, и потому живешь и обиходъ держишь, по приходу и росходъ.

27. АЩЕ КТО НЕ РАЗСУДЯ СЕБЯ ЖИВЕТ

Всякому человеку: богату и убогу, велику и малу — разсудити себя и сметити по промыслу и по добытку, и по своему имению, а приказному человеку сметя собя по государьскому жалованью и по доходу, и по поместью, и таковъ дворъ себе держати, и всякое стяжание, и всякой запасъ, по тому и люди держати, и всякой обиходъ, по промыслу и по добытку по тому и ести, и пити, и носити, и людей одевати, и с людьми сходитися з добрыми. Аще кто не разсудя собя и не сметя своего житья и промысла, и добытка, и учнетъ на люди глядя жити не по силе и заимуя, или неправеднымъ имениемъ, и та честь будет с великимъ бесчестиемъ и со укоризною, и с поношениемъ, в злое время нихто ему не поможет, а от Бога грехъ, а от людей посмехъ, ино надобе всякому человеку тщеславия бегати и похвалы, и неправеднаго собрания, жити по силе и по промыслу, и по смете, и по добытку своею правою силою. Ино то житие благоприятно и богоугодно, и от людей похвално, и себе, и детемъ своим прочно.

Источник: http://drevne-rus-lit.niv.ru/drevne-rus-lit/text/domostroj/domostroj-original.htm