28. АЩЕ КТО СЛУГЪ ДЕРЖИТ БЕЗ СТРОЯ

А толко людей держат у собя не по силе и не по добыткамъ, а не удоволити его ествою и питиемъ, и одежею, или которой не рукоделенъ и собою не умеет промыслити, ино той слуги, мужику или женки или девки, у неволи заплакав, и лгать и красть, и блясть, а мужикомъ и розбивать и красть, и в коръчме пити, и всякое зло чинити, — и тому безумному государю и государыне от Бога грехъ, а от людей посьмехъ, и не суседьство со всякимъ, а от суседей продажа и тщета дому, и самъ оскудеет за скудость ума.

29. ПОУЧАТИ МУЖУ СВОЯ ЖЕНА, КАКЪ БОГУ УГОДИТИ И МУЖУ СВОЕМУ УНОРОВИТИ, И КАКО ДОМЪ СВОЙ ДОБРЕ СТРОИТИ, И ВСЯ ДОМАШНЯЯ ПОРЯДНЯ И РУКОДЕЛЬЕ ВСЯКОЕ ЗНАТЬ, И СЛУГЪ УЧИТЬ И САМОЙ ДЕЛАТЬ

Подобаетъ поучити мужемъ женъ своихъ с любовию и благоразсуднымъ наказаниемъ, жены мужей своихъ вопрошают о всякомъ благочинии, како душа спасти, Богу и мужу угодити, и домъ свой добре строити, и во всемъ ему покарятися; и что мужь накажетъ, то с любовию приимати и творити по его наказанию: перьвие, имети страх Божий и телесная чистота, яко же впреди указано бысть. Воставъ от ложа своего, предочистивъ себе и молебная совершивъ, женамъ и девкам дело указати дневное, всякому рукоделию что работы: дневная ества варити, и которой хлебы печи ситные и решетные, и сама бы знала, как мука сеяти, какъ квашня притворити и замесити, и хлебы валяти и печи, и квасны и бухоны, и выпеклися, а колачи и пироги тако же, и колко муки возмутъ, и колько испекутъ, и колко чево родится ис четверти или из осмины, или из решота, и колко высевковъ, и колко испекутъ, — мера знати во всемъ. А еству мясную и рыбную, и всякие пироги и всякие блины, и всякие каши и кисели, и всякие приспехи печи и варити, — все бы сама государыня умела, ино умеетъ и слугъ научити, и все сама знает. А коли хлебы пекутъ, тогды и платья моютъ, ино с одного сьтрепня и дровамъ не убыточно, и дозирати, какъ красные рубаши моют и лучшее пълатья, и колко мыла идетъ и золы, и на колке рубашекъ, и хорошо бы вымыти и выпарити, и начисто выполоскати и иссушити, и искатати и скатерти, и убрусы, и ширинки, и утиралники, такоже и всему счетъ самой знати, и отдати, и взяти все сполна, и бело и чисто, а ветчано вежливо бы поплачено, ино сироткамъ пригодитца. А коли хлебы пекутъ, ино того же теста велети отняти и пироговъ начинити, а коли пшеничьное пекутъ и семъе из межъситки[34] велети пироговъ зьделати, в скоромные дни скоромною начинкою,[35] какая лучится, а в посные дни с кашею или з горохомъ, или с сокомъ, или репа, или грибы, или рыжики, или капуста, — что Богъ лучит, ино семъе потешенье. И всякую бы еству, и мясную и рыбную, и всякой приспех, скоромной и посной, жена сама бы знала и умела зделать, и слушку научить: то государыни домовная и домоводицы добрые. И то бы знала же: пивной, медовой и винной, и бражьной, квасной и уксусной, и кислаштяной, и всякой обиходъ как делают, и поваренной и хлебной, и в чемъ что родится, и колко ис чево будет. Коли все знаетъ, доброго мужа наказаниемъ и грозою и своимъ добрымъ разумомъ, ино все будетъ споро и всево будет много. А которая женьщина или девка рукодельна, и той дела указати: рубашка делати или убрусъ брати, или ткати, или золотное или шелковое пяличное дело, и которая чему учена — того всего досмотрити и дозрети. И всякой мастери самой прядено, а тафта, и камка, и золото, и серебро отвесити и отмерити, и сметити, и указати, сколко чего надобно и сколко чего дастъ, и прикроити, и примерити, самой все свое рукоделие знати, а малых девокъ учити, которая чево пригоже; а мужнимъ женкамъ, которые черное дело делают, избу топятъ и хлебы пякутъ, и платья моют, — темъ ленъ дают на собя и на мужа, и на дети прясти, а одинокая жоночка или девка на государя ленъ прядетъ, а изгребии и пачеси на собя или какъ пригоже. А все бы ведала сама государыня, которой дело какое дастъ, колко чево дастъ и колко чево возметъ, и сколко чево зделаетъ кто днемъ, много ли мало, и сколько ис чево выйдетъ, — то бы сама все знала, и в счете бы было все. А сама бы государыня отнюдъ никако же, никоторыми делы, опрично немощи, без дела не была, ино и слушкамъ, на нее смотря, повадно делати. Муж ли придет, гостья ли обычная придетъ, — всегды бы над рукоделиемъ сидела сама: то ей честь и слава и мужу похвала; а николи же бы слуги государыни не будили, государыня бы слугъ будила, а, ложася бы спать, всегды от рукоделия молебная совершивъ.

30. ДОБРЫЕ ЖЕНЫ РУКОДЕЛНЫЕ ПЛОДЫ И БЕРЕЖЕНЬЕ ВСЕМУ, И ЧТО СКРОИТ, И ОСТАТКИ И ОБРЕСКИ БЕРЕЧИ

А добрая домовитая жена благоразумнымъ своимъ помысломъ и мужнимъ наказаниемъ, и добрымъ подвигомъ своихъ трудовъ с слушками полотенъ и усчинъ, и холъстовъ наделано да на што пригоже: ино окрашено на летники и на кавтаны, и на сарафаны, и то у ней на домашней обиходъ перекроено и перешито, а будетъ слишкомъ за обиходомъ наделано полотенъ или усчинъ, или холъстовъ, или скатертей, или убрусовъ, или ширинокъ, или иного чего, ино и продастъ, ино што надобе купитъ, ино того у мужа не проситъ. А рубашки красные мужьские и женьские, и порты, — то все самой дати при себе кроити, и всякие остатки и обресъки камчатые и тафтяные,[36] и дарагие и дешевые, и золотное, и шелковое, и белое, и красное, и пухъ, и оторочки, и споръки, и новые и ветшаное, — все бы было прибрано мелкое в мешечках, а остатки сверчено и связано, а все розбрано по чисълу и упрятано, и какъ чево поделать ветшана или у новаго не достало, а то все есть в запасе, в торгу того не ищешь: далъ Богъ, у доброго промысла, у совершенаго разума все ся лучило дома.

31. КАКЪ ВСЯКОЕ ПЛАТЬЕ КРОИТИ И ОСТАТКИ И ОБРЕСКИ БЕРЕЧИ

В домовитомъ обиходе коли лучится какое платья кроити себе или жене, или детемъ, или людемъ: камчато или тафтяно, или изуфрено, или кушачно, или зенденинное, или сукняное, или армячное, или сермяжное, или кожи как не краити, или сагадакъ, или на седло[37] или ометюкъ, или сумы, или сапаги, или шуба, или кафтанъ, или терликъ,[38] или однорятка, или кортель,[39] или летникъ и каптуръ,[40] или шапка, или нагавицы,[41] или какое платно ни буди, — и самъ государь или государыня смотри и смечаетъ остатки, и обрески живутъ, и те остатки и обрески ко всему пригожаютца в домовитомъ деле: поплатить ветчаново товож портища или к новому прибавить, или какое ни буди починить, а остатокъ или обрезокъ какъ выручить, а въ торгу устанешъ прибираючи в лицо темъ видомъ в три дороги купиш, а иногды и не приберешъ. А коли лучится какое платно кроити молоду человеку, сыну или дщери, или молодой невеске, летникъ или кортель, или шуба с поволокою, или опашень зуфрянъ[42] или камчат, или обьярь, или отласъ или бархатъ, или терликъ, или кафтанъ, — и што ни буди доброе и, кроячи, да загибати, вершка по два и по три на подоле и по краемъ, и по швомъ, и по рукавомъ, и какъ вырастетъ годы два или три или в четыре, и, распоровъ то платно и загнутое отправит, опять платно хорошо станет; кое платья не всегда носити, то такъ краити.

32. ВСЯКАЯ ПОРЯДНЯ ДОМАШНЯЯ ДЕРЖАТИ

А всякому рукоделью и у мужа, и у жены, всякая бы порядня и снасть была в подвории: и плотницкая, и портново мастера, и железная, и сапожная, и у жены бы всякому ей рукоделью и домовитому обиходу всякая бы была порядня своя, и держано бы то бережно, где что пригоже: ино что себе ни зделалъ, и нихто ничево не слыхалъ, в чюжии дворъ не идешь, ни пошто свое без слова. А поваренная порядня и хлебная, а все бы было у собя сполна: и медяное, и оловяное, и железное, и деревяное — каково ся лучить, а лучится у кого кокая ссуда взять или свое дать: саженье или мониста,[43] или съкрута женьна, судно серебряное или медяно, или оловяное, или какое платно, и како ни буди запасъ пересмотрити и нового и ветшаного, где измято или избито, или утло, или што где изваляно или подралося, и которая на чемъ ни буди притча, или што не цело, — и все то исчести и сметити и записати, и хто емлет, и хто даетъ — обема то бы было ведомо. А что весовое — то бы извешено, и всякой ссуды бы цена поставлена: по грехомъ какова притча станетца, ино на обе стороны хлопотовъ и остуды нетъ, ино тому платежь. А всякая ссуда имати и давати в честь и беречи паче своего, и отнести на срокъ, чтобы сами государи того не просили и по то не посылали: ино и впредь дадут, и дружба впрокъ. А толко чюжаго не беречи или не срокъ не отнести или испортивъ отдать, ино остуда въ векъ и убытокъ в томъ, и продажа живетъ, и впередь нихто ни в чемъ не веритъ.

33. ПО ВСЯ ГОСУДАРЫНИ ДНИ ДАЗИРАТИ У СЛУГЪ ВСЕГО И ДОМАШНЕЙ ПОРЯДНИ И РУКОДЕЛЬЯ, И О САМОЙ ЕЙ И О ВСЯКОМЪ БЕРЕЖЕНИИ И СТРОЕНИИ

А по вся дни государыня у слугъ дазираетъ, которые пекутъ и варятъ, и всякие приспехи делаютъ, и которые всякое рукоделие делают; и которая служька хорошо делает по приказу: или есть варитъ или хлебы печет, или колачи, или пироги, или какие-нибудь приспехи, или какое рукоделие зделает хорошо, — и за то слушка примолвити и пожаловати, и есть подати, и по преже писанному какъ дворовымъ людемъ от государя бережение и, по службе смотря, а хто худо и не по приказу зделает или не слушает, или ленитца, или испортитъ што, или нечисто стряпает, или крадет, — ино по преже писаному наказанию учити, какъ от государя слугамъ живет; впреди о томъ наказании писано, как кого пожаловати или наказати, или научити. А в горнице и в комнате, и в сенех, и на крыльце, и на леснице всегда бы было чисто, и рано, и позно, а столъ и суды всякие всегда чисто мыти, и скатерть чиста. А сама бы государыня всегда была устоина во всякомъ обиходе, таковый бо у нее служки были вежливы по преже писаному, а с слугами бы государыня пустошных речей ни пересмешныхъ отнюд не говорила, ни торговки, ни безделные женки, ни волхвы никако не приходили. А постеля и платья по гряткамъ и в сундукехъ, и в коробьях, и убрусы и рубашки, и ширинки — все бы было хорошенко и чистенько и беленко, уверчено и укладяно и не перемято, и не сполщено. А саженье и мониста и лучшее платья всегда бы было в сундукехъ и в коробьях за замкомъ, а ключи бы держала в малам ларце, а все бы ведала сама.

34. ПО ВСЯ ДНИ ЖЕНЕ С МУЖЕМЪ О ВСЕМЪ СПРАШИВАТИСЯ И СОВЕТОВАТИ О ВСЕМЪ: И КАК В ЛЮДИ ХОДИТИ, И К СЕБЕ ПРИЗЫВАТИ, И З ГОСТЬЯМИ ЧТО БЕСЕДАВАТИ

А по вся бы дни у мужа жена бы спрашивалась и советовалась о всякомъ обиходе и воспоминала, что надобет; а в гости ходити и к себе звати, ссылатца, с кемъ велитъ мужь, а гостьи коли лучится или самой где быти, за столомъ сести — луччее платье переменити, отнюдь беречися от пьяного пития: пьяный мужь дурно, а жена пьяна в миру не пригоже; а з гостьями беседовати о рукодельи и о домашьнемъ строении, как порядня вести и какое рукоделейцо здети; чего не знаетъ, и того у добрых женъ спрашиватися вежливо и ласково, и, кто что укажетъ, на томъ ниско челомъ бити; или у собя в подворье у которой гостьи услышитъ добрую пословицу, какъ добрые жены живутъ и какъ порядню ведутъ, и какъ домъ строит, и какъ дети и служокъ учатъ, и какъ мужей своихъ слушают, и какъ с ними спрашиваются, и какъ повинуются имъ во всемъ, — и то в себе вънимати, а чево доброво не знаетъ, ино спрашиватца вежливо, а дурных и пересмешных и блудныхъ речей не слушати и не беседовати о томъ; или в гостяхъ увидит добрую порядню или вь естве, или в питье, или в каких приспесех, или какое рукоделье необычно, или кокая домашняя порядня где хороша, или которая добрая жена и смышленая, и умная, и в речехъ и в беседе, и во всяком обиходе, или где слушки умны и вежливы, и порядливы, и рукоделны, и ко всякому добру смышлены, — и всего того добра примечати и внимати, чево не знает или чево не умеетъ, и о томъ спрашиватись вежливо и ласково, и о томъ бити челомъ, и, пришедъ на подворья, то все мужу сказать на упокой; с такими то з добрыми женами пригоже сходитися ни ествы ни пития для, добрыя ради беседы и науку для, да внимать то в прокъ себе, а не пересмехатись и ни о комъ не переговаривати. И спросятъ о чемъ, про кого, иногды и учнутъ пытати, ино отвещати: «Не ведаю азъ ничего того и не слыхалъ, и не знаю, и сама о ненадобномъ не спрашиваю, ни о княиняхъ, ии о боярынях, ни о суседах не пересужаю».

35. СЛУГЪ НАКАЗЫВАТИ, КАКЪ В ЛЮДИ ПОСЫЛАТЬ С ЧИМЪ

А слугъ своихъ заповедывати о людех не переговаривати, и где в людех были, и что видели недобро — тово дома не сказывали бы; а что дома деется, того бы в людех не сказывали: о чемъ послано, то и паметуй, а о иномъ о чемъ учнутъ спрашивати, того не отвечевай и не ведай, и не знай того. Борзее отделавшися да домой ходи и дело кажи, а иныхъ вестей не приноси, што не приказано, ино промежь государей никакой ссоры не будеть и неподобные речи и блудные. То бы отнюд не было, то доброму мужу похвала и жене, толко у них таковы служки вежливы. А пошлешь куды слушку или сына, и што накажеш говорити или што зделати или што купить, и ты вороти да спроси ему, что ты ему наказалъ, что ему говорити или что ему зделать, или что ему купити, и толко по тъвоему наказу тебе все изговорит, ино добро. А пошлеш с слугою к кому еству или питье или что ни буди, да воротивь спроси его куды несетъ: толко такъ скажетъ, какъ наказано — то добро. А посылати питие вполне, а еству целу, ино солгать не умееть, а товаръ посылай сметивъ или смерявъ, а деньги счетши, а што весовое — свесивъ, а всево лучши запечатавъ, ино безгрешно. Да о томъ наказывати, что послано без государя отдать ли, или домовъ отнести. И о тех всехъ людехъ не догадается государь или государыня сына или слуги воротитъ да спросит, куды и с чимъ послали и что наказали, и умная слушка вежливая самъ воротся да вежливенко соймя колпакъ, у государя или у государыни спросивъ, о всемi переговорит, что наказано — толко по тому, ино добро. А куды пошлють в добрые люди, у воротъ легонко поколотить, а по двору идешь и какъ спросит, какимъ делом идешь, ино того не сказывати, а отвечать: «Не к тебе азъ посланъ, к кому азъ посланъ, с темъ то и говорить». А у сеней или у избы или у кельи[44] и ноги грязные отерти, носъ высмаръкати и да выкашлятся, да искусно молитва сотворити, а толко аминя не отдадутъ[45] — ино и в другое, и в третие молитва сотворити, поболши перваго, а ответа не отдадут, ино легонко потолкатися, и какъ впустят, ино в ту пору носа не копать перстомъ, ни кашлять, ни сморкать, вежливенко стоять и на сторону не смотрить, да что наказано, то исправить, а о иномъ ни о чемъ не беседовать да борзее к себе поити да тотъ ответъ государю сказать, о чемъ посылан. А где лучится быти у кого в подворье или в кельи при государи или без государя, никакой вещи, ни доброй ни худой, ни дорогой ни дешево не ворошити, ни смотрети бес прощения, ни с места на место не переложити, и, с собою возмя, ничего не вынести без благословения; а ествы и пития також не покушати, чево не велено: то святотатьство и лакомъство, кто на то дерзаетъ без благословения и без веления. Тому ни в чемъ не верити, а заочи его никуды не пошлют, по еуаггелию: «В мале бе веренъ,[46] надо многими тя поставлю». А что куды послано покрыто или повязано или запечатано или заверчено — того не дьвигнути и не посматривати, ествы или пития, что послано, того не покушивати: каково послано, таково и отнести, толко туто осмотрити, какъ дают — цело ли и вполне ли посылаютъ, чтобы там неверки не было, куды то нести.

36. ЖЕНАМЪ НАКАЗЪ О ПЬЯНЬСТВЕ И О ПЬЯНОМЪ ПИТИИ И СЛУГАМЪ ТАКО ЖЕ, И О ПОТАЙ НЕ ДЕРЖАТИ НИЧЕВО НИГДЕ, И СЛУГЪ ЛЖИ И КЛЕВЕТЫ НЕ СЛУШАТИ БЕЗЪ ИСПРАВЫ; КАКЪ ИХЪ НАКАЗЫВАТИ ГРОЗОЮ И ЖЕНУ ТАКО ЖЕ, И КАКЪ В ГОСТЕХ БЫТИ И ДОМА СЕБЯ УСТРОИВАТИ ВО ВСЕМЪ

А у жены бы отнюд никако же никоторыми делы пияное питье не было, ни вино, ни мед, ни пиво, ни гостиньцы, питие бы было в погребе да на леднике, пила бы безхмелную брагу и квасъ и дома, и в людехъ. Аще приидутъ отколе жены о здоровъи спросить, темъ пития пьяного не давать, а свои женки и девки не пили же бы в людех и дома допьяна; а жене втаи мужа своего не ести и не пити, и похоронакъ на еству и на питье потай мужа своего не держати, а у подруг и у племяни потай мужа своего питья и ествы и зделки и поминковъ всяких не просить и самой не давать, а у себя чюжево не держать без мужня ведома, о всем советовати с мужемъ, а не с холопомъ и не с робою. Отнюдь беречися от всякаго зла, а рабъ своихъ и рабынь ложьными словесы не обговаривати мужу своему и насердки не держати, а кто что избродитъ, и то мужу сказати прямо бес прибавки, а мужу и жене отнюдъ оговору не слушати никаково и не веровати безъ обыску без прямого, а жене к мужу безлепицъ домашних не доносити; чего сама не возможет управити, а которое дурное дело, то мужу сказати въ правду, а в чемъ которая женка или девка не слушает, и слово и наказание неиметъ ее, или какову пакость учинит, о томъ о всемъ с мужемъ переговорити, каково кому наказание учинити. А гостьи коли лучатся, и их потчивати питиемъ как пригожа, а самой пьяново пития хмелново не пити, а питие и еству и всякой обиходъ приносит одинъ человекъ сверстной, кому приказано, а мужескъ полъ туто и рана и поздно отнюдъ никако же никакими делы не былъ бы, кроме того, кому приказано сверстному человеку что принести или о чемъ спроситца, или о чемъ ему приказати, и всего на немъ пытати, и безчиния, и невежества, — а иному никому тута дела нет. А завтракати мужу и жене отнюдъ не пригоже кроме немощи, ести и пити в подобно время.

37. КАКЪ ПЛАТЬЯ ВСЯКОЕ ЖЕНЕ НОСИТИ И УСЪТРОИТИ

А платья и рубашки, и убрусы на себе носи бережно по вся дни, не изваляти, не изсуслати, не измяти и не излити, на рудне и на мокре не класти; все то снимаючи с себя, класти бережно и беречи того накрепко, и слугъ учити всякому тому наукъ, а самаму государю и государыни, и детемъ, и слугамъ в чемъ делать, то платье ветшано, а остряпавши дело, ино переменить платно чисто вседневное и сапогъ. А в празникъ и в ведро и при людехъ или к церкви ити, или в гости, ино лучшее платье надети, из утра бережно ходити, и от грязи, и от дожжа, и от снега беречися, и питьемъ не улити, и ествою и саламъ не извалять, и не иссуслать, на руде и на мокре не сести; от празника или от церкви, или из гостей пришед, лучшее платья с себя снемъ, пересмотрить и высушить, и вымять и выпахать, и вычистить, да хорошенько укласти да упрятать. А и ветшаное и вседневное всякое платно, и верхнее и нижнее, и белое, и сапаги, — все измыто всегда бы было, а ветшаное исплачено и исшито, ино людемъ посмотрити пригоже и себе мило и прибылно, и сиротины дать, ино спасенья; платья всякое и рубашка, и убрусы, и ширинки, и всякой нарядъ и, складши и свертевъ хорошенько, положити где ни буди в сундукъ или въ коробью.

38. КАКЪ ИЗБНАЯ ПАРЯДНЯ УСТРОИТИ ХОРОШО И ЧИСТО

Столъ и блюда, и ставцы, и лошки, и всякие суды и ковши, и братены, воды согревъ, из утра перемыти и вытерьти, и высушить, а после обеда такоже и вечере; а ведра и ночвы, и квашни, и корыта, и сита, и решета, и горшки, и кукшины, и корчаги також всегды вымыты и выскресть, и вытерть, и высушить, и положить в чистомъ месте, где будет пригоже быти. Всегда бь всякие суды и всякая порядня вымыто и чисто бы было, а по лавке и по двору, и по хоромамъ суды не волочилися бы, а ставцы и блюда, и братены, и ковши, и лошки по лавке не валялися бы, где устроено быти в чистомъ месте лежало бы опрокинуто ницъ; а в какомъ судне што ества или питие, и то бы покрыто было чистоты ради, и всякие суды сь ествою или с питиемъ, или с водою, или квашня ростворить, всегда бы покрыто было, а в ызбе и повязано от тороканавъ и от всякия нечистоты. Изба и стены, и лавки, и скамъи, и полъ, и окна, и двери, и в сенехъ, и на крылцы вымыть и вытерть, и выместь, и выскресть, всегда бы было чисто, и лесницы, и нижнее крылце, — все бы то было измыто и выскребено, и вытерто, и сметено, да перед нижнимъ крыльцомъ сена положить грязные ноги отирать, ино лесница не угрязнится, а у сеней перед дверьми рогошка или войлокъ ветшаной положить или потирало ноги грязные отирать, чтобы мосту не грязнить в грязное погодье; у нижнего крылца сено или солома переменити, а у дверей рогозинка или войлокъ переменити или потирало чистое положить, а грязъное прополоскать и высушить, и опять туто же под ноги пригодится. Ино то у добрых людей, у порядливой жены всегды домъ чистъ и устроенъ, — все по чину и упрятано, где что пригоже, и причищено, и приметено всегды: в устрой как в рай воити. Всего того и всякой порядни жена смотрила и учила слугъ и детей добромъ и лихомъ: не имет слов, ино ударить; и увидит мужь, что не порядливо у жены и у слугъ или не по тому о всемъ, что в сей памяти писано, ино бы умелъ свою жену наказывати всякимъ разсужениемъ и учити; аще внимает — и по тому все творити и любити, и жаловати, аще жена по тому научению и наказанию не живетъ, и такъ того всего не творит и сама того не знаетъ, и слугъ не учит, ино достоитъ мужу жена своя наказывати, и ползовати страхом наедине и, понаказав, и пожаловати, и примолвити, и любовию наказывати, и разсужати, а мужу на жену не гневатися, а жене на мужа, всегды жити в любви и в чистосердии. И слуги, и дети, тако же посмотря по вине и по делу, наказыти и раны возлогати да казавъ пожалоти, а государыни за слугъ печаловатися по разсужению, ино служкам надежно. А толко жены или сына, или дщери слово или наказание не иметъ, не слушаетъ и не внимаетъ, и не боитца, и не творит того, как мужь или отецъ, или мати учитъ, ино плетью постегать, по вине смотря, а побить не перед людьми, наедине поучити, да примолъвити, и пожаловати, а никако же не гневатися ни жене на мужа, ни мужу на жену. А по всяку вину по уху ни по виденью не бити, ни под серцо кулаком, ни пинком, ни посохомъ не колотить, никакимъ железнымъ или деревянымъ не бить; хто с сердца или с кручины такъ бьетъ, многи притчи от того бывают: слепота и глухота, и руку и ногу вывихнутъ, и перстъ, и главоболие, и зубная болезнь, а у беременных женъ и детемъ поврежение бываетъ во утробе. А плетью с наказаниемъ бережно бити; и разумно, и болно, и страшно, и здорова, а толко великая вина и кручинавата дело, и за великое, и за страшное ослушание и небрежение, ино соимя рубашка плеткою вежливенко побить, за руки держа, по вине смотря, да поучивъ примовити: «А гневъ бы не былъ, а люди бы того не ведали и не слыхали, жалоба бы о томъ не была». А по людцкой ссоре или по оговору без обыску без прямого брань и побои, и гневъ никако же бы не было, како было наношение или речи недобрые, или своя примета — того наедине пытати добромъ: истинне покается — безо всякаго лукавства милостивно наказать да и пожаловати, по вине смотря; а толко не виновато дело, ино оговорщикомъ не попущати, ино бы вперед вражда не была, а толко по вине и по обыску по прямому; а не каетца о грехе своем и о вине, то уже наказание жестоко надобет, штобы былъ виноватой в вине, а правой в правде: поклонны главы мечь не сечет, а покорно слово кость ломит.

39. АЩЕ МУЖЬ САМЪ НЕ УЧИТЪ, ИНО СУД ОТ БОГА ПРИИМЕТ, АЩЕ САМЪ ТВОРИТЪ И ЖЕНУ И ДОМОЧАТЦОВЪ УЧИТЪ МИЛОСТЬ ОТ БОГА ПРИИМЕТЪ

Аще мужь самъ того не творитъ, что в сей памяти писано, и жены не учит и домъ свой не по Бозе строитъ, и о своей души не радит, и людей своихъ по сему писанию не учитъ, и он самъ погубленъ в семъ веце и в будущемъ, и домъ свой погубит. Аще ли добрый муж о своемъ спасении радит и жену наказуетъ, тако же и домочадцовъ своихъ всякому страху Божию учитъ и законному християньскому жительству, яко же есть писано, и онъ вкупе со всеми в благоденьстве по Бозе жизнь свою препроводит и милость Божию получитъ.

40. САМОМУ ГОСУДАРЮ ИЛИ КОМУ ПРИКАЖЕТЪ ГОДОВОЙ ЗАПАСЪ И ВСЯКОЙ ТОВАРЪ КУПИТИ

Приказному человеку, дворецкому или ключнику, или купчине на комъ вера положена, или самому государю всегда в торгу смотрити всякого запасу к домашнему обиходу: или хлебнаго всякаго жита и всякаго обилия, хмелю и масла и мясново, и рыбново, и свежево, и просолу, или товары какие привозные или лесовой запасъ, и всяко товаръ, со всехъ земель идетъ, коли чему навозъ или коли чево мъного у приезжих людей и у християнъ — в те поры и закупить на весь годъ, ино у рубля четверти не дадастъ, а у десети рублевъ по тому же, а у закупщика дороже купити, двои денги дати, да не любое купишь, коли чево нет, а надобеть. А которой товаръ или запасъ не портитца вдаль, а коли дешево, ино и с лишкомъ купить, свою нужу исполнить на свой обиходъ, а лишнее в пору продастъ, коли дорого: иногды свой обиходъ прибылью пролезет, такъ то ведетца в добрых людех, и у доброго государя домовитаго и благоразсуднаго своимъ дозоромъ и добрымъ наукомъ. А купить у кого что-нибудь много или мало у приезжево ли гостя, или у крестьянина, или у здешнево человека, торгуй полюбовна, а денги плати въручь, а над темъ по человеку смотря и по купле, и почестку учинишь хлебомъ да солью и питьемъ — въ томъ убытка нет: дружба да впередь познать, всегды мимо тебя товару доброго не продастъ и лишьнево не возметъ, и худово не дастъ; а за добрую послугу или торговлю самаму государю такова гостя или торгового человека или приезжего пригоже почтити: напоити, накормити, добрымъ словом привечат и ласковымъ приветомъ, и в такой доброй дружбе во всемъ прибытокъ живет великой. А посмотря по торговле и по человеку, что чево достоин, подаришь его чемъ, то у тебя сугубо будет; а кто темъ путемъ живетъ, первое — от Бога греха нет, а от людей остуды, а от гостей похвала во всехъ землях, а в дому все благословеное, а не с клятвою, и носити и пити и ести и милостыня довати ис того, ино Богу приятно, а души на пользу.

41. СЕБЕ НА ОБИХОД КУПИТИ ВСЯКОЙ ТОВАРЪ ЗАМОРСКОЙ И ИЗ ДАЛНЫХЪ ЗЕМЕЛЬ

А бобръ у гостя целой купишь или два, или три, или колько хочешь, да и зделать дашъ: дома на все пригодится, и у рубля полтина збудется; а тафты косякъ или сукна поставъ, или розных поставцовъ, или шелку цветного, литра или болши золота и серебра по тому же, или белки, или всякому запасу, коли чему навозъ, по своему обиходу смотря и по промыслу, и по рукоделью, и по своей семьи, и по мостерицамъ, и по рукоделникомъ, и по своему прожитку, такъ и покупать, и запасать, коли чево много и дешево, ино и споро, и прибылно. Да толко лучитца мастерокъ свой портной и сапожьной и плотникъ, ино во всякомъ запасе и в остатках, и в обресках прибыль будет или к новому портищу остатки пригодятца, или ветчаново починить, а ты тово не прикупаешь. А лесъ и дрова, и бочьки, и мерники,[47] и скалы, и дубник, и лубья, и липнягь, и доски, и драницы, и желобы, коли тому навозъ в зиме на возех, а лете на плотех и в лодьяхъ, на год запасешъ: у всего не додашь, а у рубля четьверть збудется. А у прасола коли занадобитца не любое купишъ, а денегь слишкомъ дашъ, а всякой таваръ запасъ, коли ему навозъ, всякому товару, а дешево: хоти не надобе, а в ту пору купи — и свою нужу исполънишъ, а чево запасено слишькомъ, на томъ денги будут съ прибылью.

42. О ТОМ ЖЕ: КОЛИ ЧТО КУПИТЬ, У КОГО СЕЛЪ НЕТ, И ВСЯКОЙ ДОМАШНЕЙ ОБИХОДЪ, И ЛЕТЕ, И ЗИМЕ, И КАК ЗАПАСАТИ В ГОД И ДОМА ЖИВОТИНА ВОДИТИ ВСЯКАЯ, И ЕСТВА, И ПИТИЕ ДЕРЖАТИ ВСЕГДЫ

Годовой обиходъ домовитому человеку, мужу и жене, и у ково поместья и пашни, селъ и вочины нетъ, ино купити годовой запасъ: хлебъ и всякое жита, зиме на возехъ, а полтевое мяса тако же, и рыбу всякую, свежую или иную, осетрину на провесъ, и бочесную в годъ, и семжину, и икру сиговую и черную, и которая рыба в лето ставити, и капуста, — и те суды зиме в лед засекати, и питье запасное глубоко, и покрывъ лубомъ засыпать, и коли надобе лете и тогды свеже и готово. А в лете мясо ести покупати домовитому человеку: купити боранца, а дома облупити а овчинки, а бораней потрохъ прибыль в столе, потешенье у порядливой жены или у доброго товара; много промыслу: из рудины ушное нарядит, почки начинитъ, лапатки изжарит, ношки, яички начинит, печень иссекши с лукомъ, перепонкою обертевъ, изжарит на сковороде, легкое, молочкомъ с мукою сь яички приболтав, нальет, а кишечьки яички нальетъ, боранью голову можжокъ с потрошкомъ уху нарядит, а рубецъ кашкою начинит, почечные части сваритъ или, начинивъ, ижжаритъ, — и такъ делати, ино из одново борана много прохладу. А студень на леду держати хорошо, что останетца. В лете мяса покупать на обиход — под росход в пятницу, в понеделникъ, в среду — на всю неделю купить: не додастъ у гривны алтына, просолено на леду въ два или в три дни или неделею не испортится. А с Семеня дни купи яловицу или колко надобет не вдруг изгодою, коли подешевле, а ты тогды больши купишъ. Мясо соли в годъ и на провесъ, а потрохомъ семья сыта во всю осень. А на коже да на сале половину возмешь денегъ, а про себя сало перетопишъ, на год с вологою, потрохи, голова, уши, губы, скороньи и мозгъ, кишки, осердье, окоренье, ноги, печень, почьки жонки переделаютъ да кашею сальною ошвариною начинят, а каша бы овсяная или гречневая и ячная, и иною какою хочешъ. А не переядятъ потроховъ осеню, ино в рожественой мясоед пригодитца, а рубцы и губы, и уши, и ноги коровьи на студень во весь год пригодитца, коли не делай квашенину, — всегды прохлад. А свиньи доморощеные в осень бити по тому же полти в годъ осолити, а голова и сало, и ноги, и жолудь, и кишки, и потрохъ, и спина в осень и в зиму пригодитца у промышьленово мужа и у промышьленой жены, у доброй порядни во всемъ спорыня, а всегды прохлад и себе, и семье, и гостем. А не убыточно: по што в торг, и ты в клет. А гуси и утки и куры кто дома водитъ, и толко у воды, ино скормит лете ничемъ, а на годъ з запасомъ з даровымъ, да кто про себя коровы держитъ дойные, лете кормъ на поле, а дома всякого корму много у добрые порядни, и лете и зиме: гуща пивная и бражная, и киселная, и квасная, и кислыхъ штей[48] и отрубей овсяныхъ, и высевки оръжаные и пшенишные и ячные, и заспу делаючи и толокно, и в осень капусту солят, и свеклу ставят, и репу и морковъ запасают, и у всего того хряпье и листье и коренье и обресковъ и крохъ, и в скатерти и в столе и в веке въ хлебномъ и по полицамъ и по чюланомъ, и по залавкам крохи и остатки и обьеди, и домовитая добрая государыня или ключникъ доброй все то обирает и по судомъ ставит, и темъ животину: лошеди страдные и коровы, и гуси, и утки, и свины, и куры, и собаки кормит; себе не убытокъ, а приплоду и прохладу много, всегды в столе прибыль, и себе, и гостю. Толко дома родитца: куры и яйца, и забела и сыры, и всякое молоко, — ино по вся дни празникъ и прохлад, а не в торгу куплено; всякие пирои и всякие каши и всякие блины и трубицы, и кисели, и всякие молока, — коли чево похотелося, а все дома готова, а сама жена все умееть зделать и слугь научит рядити. От токих домочатцовъ богатеют мужи. А толко у промышленого человека у домовитого, и у доброй жены Богъ пошлет приплоду поболши у сьвиней или у гусей или у куравъ и у вутокъ или у коровъ молока и сметаны, масла и сыравъ, и яицъ: сами всегда ядятъ воложно да и людей кормят и милостыню даютъ от праведных трудов, а от благословеных плодовъ. А излишнее упродадутъ, ино на иную потребу пригодитца благословленая денешка, и на милостыню Богу приятно. А у молода человека или у вдовы только запасу такого нетъ, чемъ живота кормит, что в сей главе писано, а коровка дойная есть или в деревни у молода человека не одна есть, ино кормит: сена изрети да мукою посыпати овсяною или иная какая мякинка лучится, да кипяткомъ облить или елычемъ[49] облить да передъ собою покормить, да и издоитъ. А самой руки умыти чисто, и платно ветчаное чисто же надеть и воды теплой принести, потиралце на плечи принесть и вымя и соски вымыть у коровы, и потиралцемъ чистымъ вытерть, и в чистомъ месте издоить, и во всякомъ бережении, и на мякке держать и кормъ класть, какой лучился; а лошадки и кобылы по вся дни таким ж кормомъ християнину вызбе перед собою покормить, ино будетъ плодовито и служиво, и то имъ за овса место. А телята и ягнята молоды, и куры, и гуси, и свиньи, и утки тако же перед собою корми, какой кормъ, которой животине пригодитца.

43. А ТОЛКО МУЖЬ ПРИПАСЕТЪ В ГОД ВСЯКОГО ЗАПАСУ, И ПОСТНОГО, И ТОМУ УСТРОЙ

А толко у мужа в год все припасено: и ржи, и пшеницы, и овса, и гречи, и толокна, и всякие запасы и ячмени, солоду, гороху и конопли; и въ постъ всякие ествы перемяняяся, по вся дни делают самъ и жена с слугами; и семья сыта и прохладна, и гостя употчивают безъ убытка. А которой ествы будетъ похочет постной, и то и делает масло конопляное, и заспа все дома, и мука, и всякие пироги, и всякие блины делает и соцни, и трубицы, и всякие каши, и лапши гороховые, и цыженой горохъ, и зобонецъ, и кундумцы[50] и вареные и соковые каши, ествы — пироги з блинцы и з грибы, и с рыжики, и з груздями, и с макамъ, и с кашею, и с репою, и с капустою, и с чимъ Богъ послалъ, или орешки в соку и коровайцы. А у доброго человека и у порядливой жены толко пасено в пору, коли рыбу свежую купячи, иную солит, иную вялит, иную подвариваетъ, иную сушит мелкую, иную и в муку толчет, в пост во шти подсыпает, коли пригоже, ино в постные дни про гость и про себя, коли свежей рыбе не быть; ино преже в столе ретка, хренъ, капуста, росолъ ставленой и иные земленые плоды, што Богь послалъ: и икры, и вялая рыба, и прутовая[51] и подвариваная, и ухи пластовые и щипаные, и подвариваные, и всякие потрохи, и хохолковые,[52] и из немецких селдей, и из вандышевъ, и в росоле, и в пирозехъ, и в каши, и яглы,[53] и всякой снетъ — всякихъ ествъ постных у доброй порядни много. А все Богъ послал домо, ничего в торгу не купишъ. А брусничная вода и вишни в патоке, и малиновой морсъ и всяки сласти, и яблока, и груши в квасу и в патоке, и постелы, и левашники[54] себе и про гость и за немощь всегды есть, толко в пору припасено. А нужному и болному и родителнице, и заежжему человеку дастъ, ино велия мзда от Бога. А которой рыбы нетъ в запасе или запасъ придержалъся и бочка самому не изойдет купити, прибавъ товарыща или два — бочку осетрины или белужины или селдей или какой ни буди рыбы, или осетрины купить вместе или икру всякую: у рубля пяти алтынъ не додашъ. А не будетъ в запасе чево, а гостя для и про себя что понадобится купить, и того в торгу не добудешъ, а и добудешъ не в пору — и ты втридорога, а не милой кусъ.

44. О ЗАПАСНОЙ ПРИБЫЛИ ВПЕРЕДЬ

А у доброго человека и у доброй жены у порядливой и у смышленыхъ и у разумныхъ и у благоразсудныхъ и у благобоязнивыхъ людей и у годового у всякого запасу, и у рухляди, и у питья, и у ествы, и у хлебново, и у воложново, и у мясново, и у полтявого, и у рыбного, и у ветчины, и у солонины, и у вялого, и у ветренего, и у просолу, и сухари, и мука, и толокно, и иной запасъ, и макъ, и пшено, и горохъ, и масло, и конопли, и соль, и солодъ, и хмель, и мыло, и зола, и всякой запасъ, чему мочно впередь быти в бережении и не згноено — у всякого бы году во всякомъ обиходе и в запасе сходилося. Выном году чево не родилося или дорого, ино темъ запасомъ как даромъ проживет, а нужного и болново, и недостаточново ссудит и подможетъ, кому какъ пригоже. А коли чево изобилно запасено в дешевую пору, ино в дороговлю и продастъ, ино сам елъ и пилъ даромъ, а денги опять дома: доброго человека и доброй жены николи ни в чем меженина не имет. А старой запас держать на много лет, кои не портятся.

45. ОГОРОДЪ И САДЪ КАК ВОДИТЬ

А у которого человека огородецъ есть, и, кто пашетъ огородъ, сам ли государь дозирает или государыня, или кому приказано, первое городба перекрепити, чтобы в огород собаки ни свиньи, ни куромъ, ни гусемъ, ни уткамъ и всякой животине взойти не имутъ ни с чюжево двора, ни с своего, ино яблонямъ и всякому плоду пакости нет, а с суседа остуды — толко от тобя твердо твоей животине к нимъ не уметь, а ихъ к тебе. А дворъ бы былъ потому же везде бы крепко гороженъ или тыненъ, а ворота всегды приперты, а к ночи замъкнуты, а собаки бы сторожливы, а слуги бы стерегли же, а сам государь или государыня послушиваютъ ночи. А огородъ всегды бы былъ замкнутъ, да кому приказано, тот бы его всегды берегь и день и ночь, и в немъ всегда дозиралъ. Да какъ гряды копати весне и навоз класти, а навозъ зиме запасати, и к садиломъ на дыни варовые гряды готовить, и всякие семена водить у себя и, посадивъ или посеевъ всякие семена и всякое обилие, в пору поливати и укрывати, и от морозу всегды беречи, и яблони подчишати и суша выбирати, и почки разсаживати, и пенки и почки прививати, и гряды всякое обилие полоти, и капуста от черьвя и от блохи беречи и обирати, и оттрясывати, а возле тына около всего огорода борщу сеет,[55] где кропива ростет, и с весны его варит про себя много, и тово в торгу не купит, и нужному дастъ Бога ради, а толко у молода человека ино и продастъ, на иную вологу. А какъ насадит капусты и свеклы и поспеет, листье капустное варит, и какъ учнетъ витися въ клубъ, и толко часта, ино изретка секучи варити, а листья, обламываючи, животина кормить. А в ту пору и до осени борщъ режучи сушит, ино всегда пригодится — и в год, и в даль; и капусту все лето варит и свеклу, а в осень копусту солити, а свеколной росолъ ставит, а огурцы солит, а летомъ прохлажаетца: естъ дыни, стручье, морковь, огурцы и всякой овощъ, а, Богъ послалъ, поболши чево природилося, ино и упродаст. А садъ развадити про себя, ино прививка от древа до древа по три сажени и болши, ино яблони ростутъ велики, обилью и всякимъ овощемъ не помешает ростетъ, а как будет густо от ветъя по деревиемъ, не растет ништо, ино борщу насеяти, ино всегды плод. А падушокъ яблочных и што поспело, огурцы и дыни, и всякой овощь, в пору бы обирати, што про себя сьесть или поблюсть, или в год что поставить, или что осолить, или в квасы ставить яблока и груши, или в патоке и ягодный, и вишневой морсъ, а в дешевую пору и грибы сушить, и грузди, и рыжики солить, и всякой овощь в годъ ставити, или чево упродати, — то бы все было убережено, а семена бы всякие у собя водить, ино велика прибыль: в торгу тово не купишь, а будет слишкомъ, и ты и продашъ.

46. КАКЪ ЧЕЛОВЕКУ ЗАПАСНОЕ ПИТИЕ ДЕРЖАТЬ ПРО СЕБЯ И ПРО ГОСТЬ, И КАКЪ УСТРОИТИ ТО ПРИ ЛЮДЕХЪ

А коли одинакой человекъ, а не богатой и запасистой, держит про гость пивцо в запасе, переварки на марте сваривъ ячной и подсытивъ, а обычное пивцо есть же, а медку разсытитъ к празднику и вдаль поблюдет, в леду, засечено, медокъ и мартовское пивцо. Аще коли празникъ или именины, или свадба, или родины, или крестины, или по родителех память, или лучится гость зневесть любо приежей любо званой, или избранной человекъ, или игуменъ честной, и одново часу из одной бочки в пять оловениковъ меду нацыдят или, по людемъ смотря, в бочечки малые, да запасного мушкатцу в мешечке, а гвозьдики в другомъ мешечке дерьжит, а в третьемъ мешечке всяких благовонных зелей, в печи подваривъ, в оловеники покласти или в бочечки, в горячее вино, а вишневого морсу и малинового два оловяника, а в ыной патоки готовой, ино в одночасье шесть медовъ про гость да два вина, да вишневого морсу, и в переварку в оловеничекъ поддастъ, ино дъва пива; и кто з запасомъ живетъ, и у порядливой жены ества запасная же, ино всегды гостя не соромъ, хотя пиръ — ино нужново чево прикупитъ, ано далъ Богъ — всего дома много.

47. ТОМУ ЖЕ ПИВОВАРЕННОЙ НАКАЗЪ, КАКЪ ПИВО ВАРИТЬ И КАКА МЕДЪ СЫТИТИ И ВИНО КУРИТИ

А в пивоварнюю поварню на пиво и на брагу и на кислые шти солоду и муки, и хмелю отдать — то бы было все в письме и смерено и счете. А коли пиво затирают ячное или овсяное, или оржаное, или хмель парить, и у квашенья и у сливаныя дозирати самому — все бы было бережно и чисто, и не раскрадено, и не испрокужено, и за посмехъ не выпить. А коли пиво варят, ино отваривъ пиво, и силенъ толко солод — ино бочку и болши другово пива нарядят, а после всякого пива водою на гущу поливают, воды взогревъ ведръ с тритцать и с сорокъ на ячную гущу, и пятьдесят и шестьдесят взогревъ, взлити и больши, по вари смотря. И тотъ исътокъ приквасит, добре хорошо семъе пити; а ис первого последу приквасивъ, на кислые шти пригодится. А уксусъ ставити из доброго сусла, и в береженье и в тепле держати, и в чистоте приходити к нему. А хмелины пивные копити на винную брагу и в перепускъ, и бережно держати, а на то ветшаные суды пригожаются, толко бы было в запасе да и перекреплены. А мед сытити самому, а какъ кишетъ, хоромина та запечатати, самому толко назирати; и хто бы тутъ не ходилъ, а сливати самому же, а на сливанье бы не пили же. А вино курити самому, неотступно же быти, или кто веренъ — прямо тому приказати, и у перепуска по тому же, да смечать, по сколку ис котла араки[56] первой и другой и последу уточат. А у перепуску по тому же смечать, колко ис котла укурит первого и середнего и последу. И на погребъ, и на ледникъ, и в сушило, и в житницы без собя никакова не пускати, везде самому отдавати и отмерити, и отвесити; и сколко кому чево дастъ, то все записати.

48. У ПОВАРОВЪ И У ХЛЕБНИКОВ И ВЕЗДЕ ВСЯКОЙ ПОРЯДНИ КЛЮЧНИКУ ДОЗИРАТЬ

А у поваровъ бы и у хлебниковъ и у всяких приспешниковъ была бы вся порядня: и котлы, и сковороды, и горьшки, и медные и железные, и таганы, и решотки, и чюмичи, и корцы, — все бы было чисто и цело и извары,[57] все бы было в счете и в писме, а медяное и оловяное в весу. А по вся дни у ключника то бы было пересмотрено, чтоб было все по числу и перекреплено и вымыто, и в суши, и на месте лежало замкнуто, а бочки и всякие суды перемыты и перекреплены, и лежало бы в суше и замкнуто.

49. МУЖУ 3 ЖЕНОЮ СОВЕТОВАТИ КАКЪ КЛЮЧНИКУ ПРИКАЗАТИ О СТОЛОВОМЪ ОБИХОДЕ, О ПОВАРНЕ И О ХЛЕБНЕ

По вся дни и по вся вечеры, исправя си долгъ душевный, и во утрии встати по звону и после пения мужу з женою советовати о устроении домовномъ, на ком что положено и каму которое дело приказано ведати, и тому наказати, что коли устроити ести и пити про гости или про себя, или ключник по государеву приказу прикажет что купити на обиходъ и, купивъ что принесутъ, то смети и правды смотрити; а повару отдастъ то, что варити, и хлебнику, и на приспехи на всякие, по тому же отдастъ. А всегды бы то было в памяти, что государю сказати. А в поварню ества мясная и рыбъная и печь и варити отдавати в число, колко государь велит, и на колко блюдъ, да испечено и съварено, но у повара взяти в число же. А на столъ всякая ества ставити по государеву наказу по гостемъ смотря, а хлебенной приспехъ по тому же дати в число и взяти в число же, и всякой ествы, что у стола: останетца и цело, и едено, и ухъ и приспеху всякого, а целую еству перебрати, а початое о себе и мясное и рыбное, и покласти в суды в чистые и в твердые и покрыть, и в леду засечь; а початая ества и всякие остатки давати на обиход, как по пригожу а целое блюсти про государя и государыню и про гость; а питье в столъ давати по приказу, по гостемъ смотря и безъ гостей, а государыне брага или квасъ. А суды бы всякие столовые и поваренные всегды после стола в горячей воде перемыть и переполоскать и перетерть и высушить и, все собравъ, счести и устроити з замкомъ, где что живетъ и у ково што на рукахъ. А столовые суды: оловяники и братины, и ковши, и судки столовые — всегда беречи, и уксусницы, перешницы, росолники, солоницы, лошки, блюды, ставцы, скатерти и фаты, всегды бы было чисто, и готово на столъ. И столъ бы былъ чист, и скамъи, и лавки, и избы, и образы на стене уставлены, а изба метена и устроена. А уксусъ и огуречной росолъ и лимонной, и сливной, — все бы цежено в ситце, и огурцы, и лимоны, и сливы также бы очищено и перебрано, и на столе бы было чисто и скусно. А рыба прутовая и всякая вялая, и всякая студень, посная или мясная, и икра, и капуста — очищено, и по блюдомъ раскладено, до стола изготовлено. А питье бы всякое чисто, в ситце бы цежено. А ключники бы и повары, и хлебники, и всякие стряпчие сами бы къ столу при людехъ устроилися чистенко, а руки бы были мыты чисто во всяко стряпни. А всякие суды и всякая порядня у ключника и у всехъ стряпчихъ, все бы было мыто и чисто и бережьно и у государыни и у ее слугъ по тому же. А ества и питие на столъ понести осмотря, чтобъ то судно было чисто, в чемъ несешь, и ества или питие чисто же бес пороха и бес пригарины: осмотря ставить, а поставя еству или питие, да тут ни кашлять, ни сморкать, отшедъ на сторону, вычистить носъ или выкашлятся, ино не скаредно и вежливо.

50. КЛЮЧНИКУ ПРИКАЗЪ, КАКЪ ПИРЪ ЛУЧИТСЯ

А коли пиръ болшой, ино всюды самому дозирати и в поварне и в хлебне, а за столом ества отдавати приставити добра человека, а у поставца, у питья и у судовъ бережной же доброй человекъ надобе. А в столъ питье подавати по государеву наказу, кому што велено, а на сторону никому не давати без веления. И как пиръ минет, и весъ запасъ серебряной и оловяной, и всякие суды смотрити и счесьти, и поваренной, и хлебной, и ества перебрати и питие созрити, початое дополнивати. А в пиръ на дворе бреженъ же человекъ надобе, всего бы смотрилъ и берегъ, и домашние всякие порядни: не окрали бы чево. И гостя пьяново беречи, чтобы не истерялъ чево, и брань бы не была. А как столъ отойдет, ино суды сметити всякие и перемыти велети, и всякая ества перебрати, мясная или рыбная, и студень, и ухи, и устроити по преже писанному. А коево дни пиръ, тово вечера или порану самому государю пересъмотрити, все ли по здорову, и сметити и перепытати у ключника подлинно, колько чево сьедено и испито, и кому что отдано, и кому что послано, и всякой бы росход во всякомъ обиходе былъ в ведоме, и суды бы всякие были в счете, и умелъ бы государю сказати про все прямо, куды што розошлося и куда что дано, и сколко чево розошлося; и толко далъ Богъ — все по здорову и не исьтеряно, и не испорчено и ништо, ино государю ключника пригоже почтити и иныхъ служекъ по тому же: и поваров, и хлебниковъ, которые бережно стряпали, а не пили, ино всехъ прохладит, и накормить, и напоитъ.

51. НАКАЗЪ ОТ ГОСУДАРЯ КЛЮЧНИКУ, КАКЪ ЕСТВА ПОСТНАЯ И МЯСНАЯ ВАРИТЬ И КОРМИТЬ СЕМЬЯ В МЯСОЕДЪ И В ПОСТЪ

Да и то бы было от государя в наказе ключнику, в мясоед какая ества отдавати въ поварню про государя и про домашней обиходъ и про гость, а в постные дни по тому же. И о питьи потому же наказъ надобет от государя ключнику, какое питье носити про государя и государыне и про семью, и про гость, — и то все чинити и делати и отдавати по государеву наказу, а о всякомъ обиходе ключнику государя по вся утра спрашиватися о естьве и о питье, и о всякомъ обиходе, как государь накажет, такъ и творити. Государю съ женою о томъ о всяком обиходе в домашнемъ советовати и ключнику наказывати, какъ челядь кормити по вся дни: хлебъ решетной,[58] шти да каша с ветчиною житкая, а игда густая с саломъ, переменяя часто, мяса как лучится дадут к обеду, а в неделю и в празники иногды пироги, а иногды кисель, а иногды блины или иная какая ества; а у вужины шти да молоко или каша, а в посные дни шти да каша житкая, иногды с сокомъ, иногды сущь,[59] иногды репня, а у вужины иногды шти капуста, толокно, иногды росолъ, иногды ботьвинье, по неделямъ, по празникомъ к обеду пироги какие или гуща, или яглы, или селедавая каша и что богъ лучитъ. А у вужину копуста, росолъ, ботьвинья, толокно. А у женъ у челяденных и у девокъ и у робят по тому же, а страдымъ людемъ та же да прибавка остатковъ столовых государевых и гостиных, а лутчие люди, которые торгуют, техъ государь в столе у себя сажает; а коли гости ядят, и они стряпают, а после стола едят ествы с прибавкою, и столовых остатков. А у государыни мастерицамъ и швеямъ по тому же, сама за столомъ их кормит и подаетъ имъ от себя. А челяди питие — истокъ пивной, а в неделю и в празники брага, а торговымъ всегда брага; а питьемъ всякимъ государь жалуетъ или прикажет, а в прохлад и самимъ пивца дадуть.

Наказ от государя повару и ключнику или от государыни, варит на семью челяди или нишимъ скоромную и постную еству: капусту или натину, или крошиво — иссечено мелко, и вымыть хорошо, и уварить, и упарити горазно, в скоромные дни мяса или ветчина, или сальца ветчинного положить, забелъки поддать да припарить, а в постъ сочкомъ залить или иной какой навары прибавить да упаригь; хорошо или заспицы подсыпать да с солью и с кислы штями приварить, а кашку всякую по тому же уварить и упарить хорошо с саломъ или с масломъ, или селедовую, или с сокомъ, и всякую семеиную еству хорошенько усьтряпати, и хлебы семеиные тако ж месити и укъвасити, и вывалять хорошо и выпечь, и пирошки семеиные по тому же. И всякую еству хорошенко и чисьтенько устряпать, какъ своя душа любит, и всякой семеиной ествы государыня или дворецкой самъ кушаетъ, и толко не хорошо сварено или испечено, и о томъ бранит на повара или на хлебника, или на женки, которые то стряпают, а дворецкой того не брежетъ, ино на него бранит, а государыня того не брежет, ино мужу на нее бранити; какъ своя душа любит, такъ служокъ и нищих кормити, ино то Богу в честь, а себе во спасение. Да государю или государыне всегды ззирати и спрашивати слугъ и маломощьных и убогихъ о всякой нуже и о естве и о питии, и о одежи, и о всякой потребе, и о всякой скудости, и о недостатки, и о всякомъ обиходе, и о всехъ техъ нужах, о них Бога ради промышляти, и попечение имети, елико вмесьтимо, сколко Богь поможе, от всея душа, яко же о своихъ чадехъ и яко же о присныхъ, аще кто не радит о семъ и не болезнуетъ о сихъ, да будет анафема; а кто сие с любовию от всея душа и брежет и хранит, велию милость от Бога обрящет и грехомъ свободу получит и жизнь вечную наследитъ.

52. В ЖИТНИЦАХЪ И В ЗАКРОМЕХЪ О БЕРЕЖЕНЬИ

А в житницах бы у ключника былъ бы всякой запасъ и всякое жита, солод и рожь, и овесъ, пшеница, не згноено и не накапала бы, и не навьяло, не проточено от мышей, и не слеглося, и не затхло бы; а что в бочкахъ или в коробах мука и всякой запасъ, и горох, и конопли, и греча, и толокно, и сухари, и ржаные и пшеничьные, — то бы было все покрыто, и судно твердо, и не намокло бы, и не знило, и не затхлося. А всему бы тому была мера и счет, сколко чево ис села или ис торгу привезутъ, и записати, а что весовое — то взьвесити, и колко коли отдаст чево на росход или взаимы и на всякой обиход, ли кому государь велит что дати — то все записати же, и сколко чево зделают, то бы было ведомо ж; и хлебы, и колачи, и пиво, и вино, и брага, и квасъ, и кислые шти, и уксусъ, и высевъки, и отруби, и гуща всякая, и дрожьжи, и хмелины, — то бы было все у ключника в мере и записано, а хмель и медъ, и масло, и соль вешено.

53. В СУШИЛЕ ТАКО ЖЕ СМОТРИТИ

А в сушиле мясо полтевое и солонина ветреная, полотки и языки, и прутовая рыба, и пласти, и всякая рыба вялая и ветреная, и в рогожах и в крошнях[60] и вандыши и хохольки, чтобы было все в счете и в писме, сколко чево куплено и вывешено, провялено и положено; и держано бы то брежно и не згноено и не измочено, и не измято, убережено бы от всякие пакосьти, и всегда замъкнуто.

54. В ПОГРЕБЕ И НА ЛЕДНИКЕ ВСЕГО БЕРЕЧИ

А в погребе и на ледникех и на погребицех хлебы и колачи, сыры, яйца, забела и лукъ, чеснокъ и мясо всякое, свежее и солонина, и рыба свежая и просольная, и медъ пресной, и ества вареная мясная и рыбная, студенью и всяй запасъ естомой, и огурцы, и капуста соленая и свежая, и репа, и всякие овощи, и рыжики, и икра, и росолы ставленыя, и морсъ, и квасы яблочные, и воды брусничные, и вина флязские и горючие, и меды всякие, и пива сыченые и простые и брага, и всяго того запасу ключнику ведати. И столко чево на погребице поставлено, и на леднике и на погребе, — и все бы то сочтено и перемечено, што вполне, что не вполне, и перемечено, и записано, и сколко чево куды отдастъ по приказу государеву, и сколко чево разоидетца, — то бы было все в счете, было бы што господарю сказать и отчетъ во всемъ дати. А все бы то было чисто и в покрыте и не затхлося и не заплеснело, и прокисло. А вина фряские и сыченая перевара, и всякое лутчее питье в опришенномъ погребе за замкомъ держать, а самъ бы тамо ходилъ.

55. А В КЛЕТЕХ И В ПОДКЛЕТЕХ И В ОНБАРЕХ УСТРОИТИ ВСЯКАЯ ПОРЯДНЯ КЛЮЧНИКУ ПО ГОСУДАРЕВУ НАКАЗУ

А в клетехъ и в подклетехъ и в онъбарехъ устроити по государеву наказу ключнику всякая порядня: платье ветчаное, и дорожнее, и служне, и полсти, и епаньчи, и кепеняки,[61] и шляпы, и рукавицы, и медведна, и ковры, и попоны, и войлоки, и седла, и саадаки, и с луки и с стрелами, и сабли, и топорки, и рогатины, и пищали, и узды, и оброти, и морхи, лысины, и похви, и остроги, и плети, и кнутье, и вожжи моржовые, ременные, и шлеи, и хомуты, и дуги, и оглобли, и миндери, и мехи дымчатые, и сумы, и мехи холщовые, и припоны, и шатры, и пологи, и ленъ, и посконь, и веревки, и ужища, и мыло, и зола, и ветшаной всякой запасъ и обрески, ветшаное и новое, и пълатяные и коженые, и железные обломки всякие, и гвоздье, и чепи, и замки, и топоры, и заступы, и всякой железной запас, и всякая рухледь, — и все то разобрати, что пригоже — в коробьяхъ положити или в бочках, иное по гряткамъ, иное по спицамъ, иное в коробех, где что пригоже, то туто и строити, в сусе и в покрыте, от мышей и от мокра, и от снегу беречи, и от всякия пакости, и все бы было в счете и в писме, сколко чево нового и сколко ветчаного; а что попортилося, то починивати, а всегды бы было готово, всякой запасъ, какъ попытают. А в ынех подклетех или в подсенье или в онбаре устроити сани, дровни, телеги, колеса, одры страдные, дуги, хомуты, оглобли, рогожи, посконные вожжи, лыка и мочала, веревки лычьные, оброти, тяжи, шлеи, попоны, иной дворовой запас коньской, где что пригоже поставити или положити или повесити. А лутчие сани, возъ, коптана, калымага укрыть на подкладках, все бы было брежно в суше з замкомъ; а в ыномъ онбаре бочки и мерники, и цепники, высытки, корыта, жолобы, извары, корцы, сита, решота, фляги и всякая порядня поваренная и погребная; которые бочки и всякое судно попортилося или обручи огнили или свалились, и то велети окрепити или уторы переделати или дъна поправити и обручи новые наколотити, все бы то было готово и выпарено, и вымыто, и высушено, чтобы ни гнилью, ни плеснью и затъхолью не пахнуло; дрожьжи бы ни хмелины не засушены, ни загнилися. Какъ которое судно понадобитца, ино бы было готово, а дубник в запасе держати, что починити или зделати, а ветчаная бочка, извара и выситокъ, донце дощечки бочечные и вечка всякое судно, — все бы было припрятано, а все то ся пригожаетъ на худую потребу, и ты доброво не портишъ.

Источник: http://drevne-rus-lit.niv.ru/drevne-rus-lit/text/domostroj/domostroj-original.htm