ПОВЕСТЬ ВРЕМЕННЫХЪ ЛЕТ ЧЕРНОРИЗЦА ФЕДОСЬЕВА МАНАСТЫРЯ ПЕЧЕРЬСКАГО,[1] ОТКУДУ ЕСТЬ ПОШЛА РУСКАЯ ЗЕМЛЯ <...> И ХТО В НЕЙ ПОЧАЛЪ ПЕРВЕЕ КНЯЖИТИ, И ОТКУДУ РУСКАЯ ЗЕМЛЯ СТАЛА ЕСТЬ

Се начнемь повесть сию.

По потопе бо 3-е сынове Ноеви розделиша земьлю: Симъ, Хамъ, Афетъ. Яся въстокъ Симови: [2] Перьсида, Ватрь, доже и до Иньдикия в долготу, и в широту и до Нирокуриа, якоже рещи от въстока доже и до полуднья, и Сурия, и Мидиа по Ефратъ реку, и Вавилонъ, Кордуна, асуриане, Месопотамиа, Аравиа Старейшая, Елумаисъ, Индия, Аравия Силная, Кулии, Комагины, Финикия вся.

Хамови же яся полуденья часть: Егупетъ, Ефиопья, прилежащия къ Индомъ, другая же Ефиопья, из неяже исходить река ефиопьскаа Чермьна, текущия на въстокъ, Фива, Луви, прилежащи доже до Куриния, Мармариа, сурите, Ливуи другая, Нумидия, Масурия, Мавритания, противу сущи Гадире. Сущимъ же къ встоком имать Киликию, Памфилию, Писидию, Мосию, Лукаонию, Фругию, Камалию, Ликию, Карию, Лудию, Масию другую, Троаду, Солиду,[3] Вифунию, Старую Фругию. И островы пакы имать: Сарданию, Критъ, Купръ, и реку Гиону, зовемую Нилу.

А Афетови же яся полунощная страна и западная: Мидия, Олъвания, Армения Малая и Великая, Каподокия, Фефлагони, Галатия, Кольхысъ, Воспорий, меоти, дереви, сармати, тавриани, Скуфия, фраци, Македония, Далматия, молоси, Фесалия, Локрия, Пеления, яже и Полопонисъ наречется, Аркадия, Ипириноя, Илурикъ, словене,[4] Лухития, Аньдриакия, Аньдриатиньска пучина. Имать же и островы: Вританию, Сикелию, Евию, Родона, Хиона, Лезвона, Куфирана, Закуньфа, Кефалиния, Ифакину, Керкуру, и часть всякоя страны,[5] и нарицаемую Онию, и реку Тигру, текущюю межи Миды и Вавилономъ; до Понетьского моря,[6] на полунощныя страны, Дунай, Днепръ и Кавькасийскыя горы, рекше Угорьскыя,[7] и оттуда, рекше, доже и до Днепра, и прочаая рекы: Десна, Припеть, Двина, Волховъ, Волга, иже идеть на въстокъ, въ часть Симову. Въ Афетови же части седить русь, чюдь и вси языце: меря, мурома, всь, мордва, заволочьская чюдь, пермь, печера, ямь, югра, литва, зимигола, корсь, летьгола, либь.[8] Ляхове же, и пруси[9] и чюдь приседять к морю Вяряскому. По сему же морю седять варязи[10] семо къ вьстоку до предела Симова, по тому же морю седять къ западу до земли Агаряньски[11] и до Волошьскые.[12]

Афетово же колено и то: варязи, свеи, урмане, готе,[13] русь, агляне, галичане,[14] волохове,[15] римляне, немци, корлязи,[16] венедици, фрягове и прочии, приседять от запада къ полуденью и съседятся съ племенем Хамовомъ.

Симъ же, и Хамъ и Афетъ, разделивше землю, и жребии метавше, не переступати никомуже въ жребий братень, и живяху кождо въ своей части. И бысть языкъ единъ. И умножившимся человеком на земли, и помыслиша создати столпъ до небеси въ дни Нектана и Фалека. И събравшеся на месте Сенарь поле здати <...> столпъ до небесе и городъ около его Вавилонъ, и здаша столпъ за 40 лет, и не свершенъ бысть. И сниде Господь Богъ видеть город и столпа, и рече Господь: «Се родъ единъ и языкъ единъ». И смеси Богъ языкы, и раздели на 70 и на два языка, и рассея по всей земли. По размешеньи же языкъ Богъ ветромъ великомъ раздруши столпъ, и есть останокъ его межи Асура и Вавилона, и есть въ высоту и въ шириню лакотъ 5433 локотъ, въ лета многа хранимъ останокъ.[17]

По раздрушении же столпа и по разделении языкъ прияша сынове Симовы въсточныя страны, а Хамовы же сынове полуденныа страны. Афетови же сынове западъ прияша и полунощьныя страны. От сихъ же 70 и дву языку бысть языкъ словенескъ, от племени же Афетова, нарецаемеи норци,[18] иже суть словене.

По мнозехъ же временехъ селе суть словени по Дунаеви, кде есть ныне Угорьская земля и Болгарьская. От техъ словенъ разидошася по земьли и прозвашася имены своими, кде седше на которомъ месте. Яко пришедше седоша на реце именемъ Мораве, и прозвашася морава, а друзии чесе нарекошася. А се ти же словене: хорвати белии, серпь и хорутане[19] Волохомъ бо нашедшим на словены на дунайскые, и седшимъ в нихъ и насиляющимъ имъ.[20] Словене же ови пришедше и седоша на Висле, и прозвашася ляхове, а от техъ ляховъ прозвашася поляне, ляхове друзии — лютице, инии мазовшане, а инии поморяне.[21]

Такоже и те же словене, пришедше, седоша по Днепру и наркошася поляне, а друзии деревляне, зане седоша в лесехъ, а друзии седоша межи Припетью и Двиною и наркошася дреговичи, и инии седоша на Двине и нарекошася полочане, речькы ради, яже втечеть въ Двину, именемь Полота,[22] от сея прозвашася полочане. Словене же седоша около озера Илмера, и прозвашася своимъ именемъ, и сделаша городъ и нарекоша и́ Новъгородъ. А друзии же седоша на Десне, и по Семи,[23] и по Суле[24] и наркошася северо.[25] И тако разидеся словенескъ языкъ, темьже и прозвася словеньская грамота.

Поляномъ же живущим о собе по горамъ симъ, и бе путь из Варягъ въ Грекы, и изъ Грекъ по Днепру, и верхъ Днепра волокъ до Ловоти, и по Ловоти внити в Илмерь озеро великое, из негоже озера потечеть Волховъ и втечеть въ озеро великое Нево, и того озера внидет устье в море Варяское.[26] И по тому морю внити доже и до Рима, а от Рима прити по тому же морю къ Цесарюграду, и от Царяграда прити в Понтъ море, в неже втечет Днепръ река. Днепръ бо течеть изъ Воковьского леса,[27] и потечеть на полудни, а Двина изъ того же леса потечет, и идеть на полуночье и внидет в море Варяское. Ис того же леса потечеть Волга на въстокъ и вътечет седьмьюдесятъ жерелъ в море Хвалийское.[28] Темьже из Руси можеть ити по Волзе в Болгары и въ Хвалисы, и на въстокъ доити въ жеребий Симовъ, а по Двине въ Варягы, а изъ Варягъ и до Рима, от Рима же и до племени Хамова. А Днепръ втечет в Понтеское море треми жералы, иже море словеть Руское, по нему же училъ святый апостолъ Андрей, братъ Петровъ.

Якоже ркоша, Андрею учащю в Синопии, пришедшю ему в Корсунь, увиде, яко ис Коръсуня близъ устье Дьнепръское, и въсхоте поити в Римъ, и приде въ устье Днепръское, и оттоле поиде по Днепру горе.[29] И по приключаю приде и ста подъ горами на березе. И заутра, въставъ, рече к сущимъ с нимъ ученикомъ: «Видите горы сия? Яко на сихъ горахъ въсияеть благодать Божия: имать и городъ великъ быти и церкви мьногы имат Богъ въздвигнути». И въшедъ на горы сиа, и благослови я, и постави крестъ, и помолився Богу, и слезе съ горы сея, идеже послеже бысть Киевъ, и поиде по Днепру горе. И приде въ словены, идеже ныне Новъгород, и видевъ люди ту сущая, какъ ихъ обычай и како ся мыють и хвощются, и удивися имъ. И иде въ Варягы, и приде в Римъ, исповеда, елико научи и елико виде, и рече имъ: «Дивно видехъ землю словеньску, идущю ми семо. Видехъ бане древяны, и пережьгуть я велми, и съвлекутся, и будуть нази, и обольются мытелью, и возмуть веникы, и начнуть хвостатися, и того собе добьють, одва вылезуть еле живы,[30] и обольются водою студеною, и тако оживут. И тако творять по вся дни, не мучими никымже, но сами ся мучать, и то творят не мытву себе, а <...> мученье».[31] И се слышавше, дивляхуся. Андрей же, бывъ в Риме, приде въ Синопию.

Поляномъ же живущиим о собе и владеющимъ роды своими, яже и до сея братья бяху поляне, и живяху кождо съ родом своимъ на своихъ местехъ, володеюще кождо родомъ своимъ. И быша 3 брата: а единому имя Кий, а другому Щекъ, а третьему Хоривъ, и сестра ихъ Лыбедь. И седяше Кий на горе, кде ныне увозъ Боричевъ,[32] а Щекъ седяше на горе, кде ныне зовется Щековица, а Хоривъ на третьей горе, отнюду же прозвася Хоривица. Створиша городокъ во имя брата ихъ старейшаго и наркоша и́ Киевъ.[33] И бяше около города лесъ и боръ великъ, и бяху ловяще зверь, бяхуть бо мудре и смыслени, и нарицахуся поляне, от нихъ же суть поляне — кияне и до сего дни.

Инии же, не ведуще, ркоша, яко Кий есть перевозникъ бысть, у Киева бо перевозъ бяше тогда съ оноя страны Днепра, темь глаголаху: «На перевозъ на Киевъ». Аще бо былъ перевозникъ Кый, то не бы ходилъ къ Цесарюграду. Но сий Кий княжаше в роду своем, и приходившю ему къ цесарю — не свемы, но токмо о семъ вемы, якоже сказають: яко велику честь приялъ есть от цесаря, которого не вемъ и при котором приходи цесари.[34] Идущю же ему опять, приде къ Дунаеви, и възлюби место, и сруби городокъ малъ, и хотяше сести с родомъ своимъ, и не даша ему близъ живущии; еже и доныне наречють дунайци городище Киевець. Киеви же пришедшю въ свой городъ Киевъ, ту и сконча животъ свой, и брата его — Щекъ и Хоривъ, и сестра ихъ Лыбедь ту скончашася.

И по сей братьи почаша держати родъ ихъ княжение в поляхъ, а въ деревляхъ свое, а дрьговичи свое, а словене свое въ Новегороде, а другое на Полоте, иже и полочане. От сихъ же и кривичи, иже седять на верхъ Волгы, и на верхъ Двины и на верхъ Днепра, ихъже и городъ есть Смоленескъ; туда бо седять кривичи. Таже северо от них. На Беле озере седять весь, а на Ростове озере меря, а на Клещине озере[35] седять меря же. А по Оце реце, кде втечеть въ Волгу, языкъ свой — мурома, и черемиси свой языкъ, и мордва свой языкъ. Се бо токмо словенескъ языкъ в Руси: поляне, деревляне, новъгородьци, полочане, дьрьговичи, северо, бужане, зане седять по Бугу, послеже же волыняне.

И се суть инии языце, иже дань дают Руси: чудь, весь, меря, мурома, черемись, мордва, пермь, печера, ямь, литва, зимегола, корсь, нерома, либь: си суть свой языкъ имуще, от колена Афетова, иже живуть на странахъ полунощныхъ.

Словеньску же языку, якоже ркохом, живущю на Дунаи, придоша от скуфъ, рекше от козаръ, рекомии болгаре, и седоша по Дунаеви, населнице словеномъ беша. А посемъ придоша угре белии и наследиша землю словеньскую, прогнавше волохы, иже беша прияле землю словеньску. Си бо угри почаша быти пр-Ираклии цесари, иже ходиша на Хоздроя, цесаря перьскаго.[36] В си же времена быша и обре,[37] иже воеваша на цесаря Ираклия и мало его не яша. Си же обри воеваша на словены и примучиша дулебы,[38] сущая словены, и насилье творяху женамъ дулебьскымъ: аще поехати бяше обрину, не дадяше въпрячи коня, ни волу, но веляше въпрячи 3, или 4, ли 5 женъ в телегу и повести обрина, и тако мучаху дулебы. Бяху бо обри теломъ велице, а умомъ горди, и потреби я Богъ, и помроша вси, и не оста ни единъ обринъ. И есть притча в Руси и до сего дни: погибоша аки обри, ихъ же несть ни племене, ни наследка. По сихъ бо придоша печенизе,[39] и пакы идоша угри чернии[40] мимо Киевъ послеже при Ользе.

Поляномъ живущимъ о себе, якоже ркохомъ, сущии от рода словеньска и наркошася поляне, а деревляне от словенъ же и нарекошася древляне; радимичи бо и вятичи от ляховъ. Бяста бо два брата в лясехъ: Радимъ, а другый Вятко, и, пришедша, седоста: Радимъ на Съжю, и прозвашася радимичи, а Вятко седе своимъ родомъ по Оце, от него прозвашася вятичи. И живяху в мире поляне, и древляне, и северо, и радимичи, и вятичи и хорвати.[41] Дулеби же живяху по Бугу, кде ныне волыняне, а уличи, тиверци седяху по Бугу и по Днепру,[42] и приседяху къ Дунаеви. И бе множество ихъ, седяху бо по Бугу и по Днепру оли до моря, и суть городы ихъ и до сего дне, да то ся зовяху от Грекъ Великая скуфь.[43]

Имеяхуть бо обычая своя и законы отець своихъ и предания, кождо своя норовъ. Поляне бо своихъ отець обычай имяху тихъ и кротокъ, и стыденье къ снохамъ своимъ и къ сестрамъ, и къ матеремъ своим, и снохы къ свекровамъ своимъ и къ деверемъ велико стыденье имуще. И брачный обычай имеаху: не хожаше женихъ по невесту, но привожаху вечеръ, а заутра приношаху что на ней вдадуче. А деревляни живяху зверьскымъ образомъ, живуще скотьскы: и убиваху другъ друга, ядуще все нечисто, и браченья в нихъ не быша, но умыкаху у воды девица. А радимичи, и вятичи и северо одинъ обычай имяху: живяху в лесе, якоже всякый звер, ядуще все нечисто, и срамословье в нихъ предъ отьци и пред снохами, и бьраци не бываху в нихъ, но игрища межю селы, и схожахуся на игрища, на плясанья и на вся бесовьскыя песни, и ту умыкаху жены собе, с неюже кто свещевашеся. Имяхут же по две и по три жены. И аще кто умряше, творяху трызну надъ нимь, и посемъ творяху кладу велику, и възложать на кладу мертвеца и съжигаху, и посемъ, събравше кости, вложаху въ <...> ссудъ малъ и поставляху на столпе на путехъ, иже творять вятичи и ныне. Си же обычаи творяху и кривичи и прочии погании, не ведуще закона Божиа, но творяху сами себе законъ.

Глаголеть Георгий в летописьце: [44] «Ибо комуждо языку овемь законъ исписанъ есть, другымъ же обычая, зане безаконнымъ отечьствиемь мнится. От нихъ же перьвое сирии, живущии на конець земля, законъ имуть отець своих и обычая: не любодеяти, ни прелюбодеяти, ни красти, ни клеветати, ли убити, ли зло деяти всема отинудь. Законъ же и у ктириянъ, глаголемии върахмане и островичи,[45] иже от прадедъ показаньемь и благочестьемь мясъ не ядуще, ни вина пьюще, ни блуда творяще, никакояже злобы творяще, страха ради многа. Ибо яве таче прилежащим к нимъ индомъ: убийстводеица, сквернотворящии, гневливи паче естьства; въ нутренейший же стране ихъ человекы ядуще и страньствующихъ убиваху, паче же ядять яко пси. Етеръ же законъ халдеемь[46] и вавилоняномъ: матери поимати, и съ братними чады блудъ деяти, и убивати. Всяко бестудьное деяние яко добродетелье мнятся деюще, любо аще и далече страны своея будут.

Инъ же законъ гилиомъ: [47] жены у нихъ орють, и хоромы зижють, и мужьскыя дела творять, но и любы творить елико хощеть, не въздержаемы от мужий своихъ отинудь, ни зазрятъ. В нихъ же суть и хоробры жены ловити звере крепькы. Владеють жены мужьми своими и въдобьляють ими. Въ Вритании же мнози мужи съ единою женою спять, тако же и многыя жены съ единымъ мужемъ похотьствують и безаконьная законъ отець творять независтьно и невъздержанно.

Амазоняни[48] же мужа не имуть, акы скотъ бесловесный, но единою летом к вешнимъ днемъ оземьствени будуть и съчитаються съ окрестныхъ <...> мужи, яко некоторое имъ торжество и велико празднество время те мнять. От нихъ заченшим въ чреве, и пакы разбегнутся отсюду вси. Въ время же хотящимъ родити, аще родится отроча — погубять и́, аще ли девическъ полъ, то въздоять и прилежьно и въспитают».

Якоже се и ныне при насъ половци законъ держать отець своихъ: кровь проливати, а хвалящеся о семъ, и ядуще мертвечину и всю нечистоту, хомякы и сусолы, и поимають мачехы своя и ятрови, и ины обычая отець своихъ. Но мы же, християне, елико земль, иже верують въ святую Троицю, и въ едино крещение, и въ едину веру, законъ имамъ одинъ, елико в Христа крестихомъся и въ Христа облекохомся.

По сихъ же летехъ, по смерти братья сея, быша обидими деревляны и инеми околными. И наидоша я козаре,[49] седящая в лесехъ на горах, и ркоша козаре: «Платите намъ дань». Здумавше же поляне и вдаша от дыма мечь. И несоша козаре къ князю своему и къ старейшинамъ своим и реша имъ: «Се, налезохомъ дань нову». Они же реша имъ: «Откуду?», Они же реша имъ: «В лесе на горах, над рекою Днепрьскою». Они же ркоша: «Что суть вдале?» Они же показаша мечь. И реша старце козарьстии: «Не добра дань, княже! Мы доискахомся оружьемь одиноя страны, рекше саблями, а сихъ оружье обоюду остро, рекше мечи. Си имуть имати и на нас дань и на инехъ странахъ». Се же събысться все: не от своея воля ркоша, но от Божия изволенья. Яко и при фараоне, цесари егупетьстемь, егда приведоша Моисея пред фараона, и ркоша старци фараони: «Сий хощеть смирити область Егупетьску»; якоже и бысть: погыбоша егуптяне от Моисея, а первее беша работающе имъ.[50] Тако и си: первее владеша, а последе самеми владеют; якоже и бысть: володеють бо козары русьстии князи и до днешняго дне.

В лето 6360, индикта 15,[51] наченшю Михаилу цесарьствовати,[52] нача ся прозывати Руская земля. О семъ бо уведахом, яко при сем цесари приходиша Русь на Цесарьград, якоже писашеть в летописании грецком Темьже и отселе почнем и числа положим, яко от Адама до потопа лет 2242, а от потопа до Аврама лет 1082, от Аврама до исхожения Моисеева летъ 430; от исхожения Моисеова до Давида лет 601, от Давида и от начала царства Соломоня до пленения Иеросалимова лет 448, от пленения до Александра лет 318, от Лександра до Христова рожества лет 333, от Христова рожьства до Костянтина лет 318, от Костянтина же до Михаила сего лет 542.[53] От перьваго лета Михаила сего до перваго лета Олгова рускаго князя, лет 29, от перваго лета Олгова, понележе седе в Киеве, до перваго лета Игорева лето 31, от перваго лета Игорева до перваго лета Святославля лет 33, от перваго лета Святославля до перваго лета Ярополча лет 28, Ярополкъ княжи лет 8, Володимеръ княжи лет 37, Ярославъ княжи лет 40. Темьже от смерти Святославля до смерти Ярославли лет 85, от смерти Ярославли до смерти Святополчи лет 60.[54]

Но мы на предлежащее възъвратимся и скажемъ, что ся удеяло в лета си, якоже преже почали бяхомъ первое лето Михаила, и по ряду положимъ числа.

В лето 6361-е. В лето 6362-е. В лето 6363-е. В лето 6364-е. В лето 6365-е.

В лето 6366-е. Михаилъ цесарь изыде с вои берегом и моремъ на болъгары. Болгар(е) же увидевьше, не могоша стати противу, креститися просиша, покорятися греком. Цесарь же крести князя ихъ и бояры вся и миръ сътвори съ болгары.[55]

В лето 6367. Имаху дань варязи, приходяще изъ заморья, на чюди, и на словенехъ, и на меряхъ и на всехъ, кривичахъ.[56] А козаре имахуть на полянех, и на северехъ, и на вятичихъ, имаху по беле и веверици[57] тако от дыма.

В лето 6368. В лето 6369.

В лето 6370. И изгнаша варягы за море, и не даша имъ дани, и почаша сами в собе володети. И не бе в нихъ правды, и въста родъ на род, и быша усобице в них, и воевати сами на ся почаша. И ркоша: «Поищемъ сами в собе князя, иже бы володелъ нами и рядилъ по ряду, по праву.» Идоша за море к варягом, к руси. Сице бо звахуть ты варягы русь, яко се друзии зовутся свее, друзии же урмани, аньгляне, инеи и готе, тако и си.[58] Ркоша руси чюдь, словене, кривичи и вся: «Земля наша велика и обилна, а наряда въ ней нетъ. Да поидете княжить и володеть нами». И изъбрашася трие брата с роды своими, и пояша по собе всю русь, и придоша къ словеномъ первее. И срубиша город Ладогу. И седе старейший в Ладозе Рюрикъ, а другий, Синеусъ на Беле озере, а третей Труворъ въ Изборьсце.[59] И от техъ варягъ прозвася Руская земля. По дъвою же лету умре Синеусъ и братъ его Труворъ. И прия Рюрикъ власть всю одинъ, и пришед къ Ильмерю, и сруби город надъ Волховом, и прозваша и́ Новъгород, и седе ту, княжа, и раздая мужемъ своимъ волости и городы рубити: овому Полътескъ, овому Ростовъ, другому Белоозеро. И по темь городомъ суть находнице варязи; первии населници в Новегороде словене, и в Полотьске кривичи, Ростове меряне, Белеозере весь, Муроме мурома. И теми всеми обладаше Рюрикъ.

И бяста у него два мужа, не племени его, но боярина, и та испросистася къ Цесарюграду с родом своимъ. И поидоста по Дънепру, идуче мимо и узреста на горе городокъ. И въспрошаста, ркуще: «Чий се городъ?» Они же ркоша: «Была суть три братья — Кий, Щекъ, Хоривъ, иже сделаша городъ сий, и изъгыбоша, а мы седимъ род ихъ,[60] и платимы дань козаром». Асколдъ же и Диръ остаста в городе семъ, и многы варягы съвокуписта и начаста владети польскою землею, Рюрику же княжящу в Новегороде.

В лето 6371. В лето 6372. В лето 6373.

В лето 6374. Иде Асколдъ и Диръ на Грекы, и приде въ 14 лето ( Михаила цесаря.[61] Цесарю же отшедъшю на агаряны,[62] и дошедшю ему Черное рекы,[63] весть епархъ[64] посла ему, яко русь идеть на Цесарьград, и воротися цесарь. Си же внутрь Суда[65] вшедъше, много убийство християномъ створиша, и въ двою сту кораблий Цесарьград оступиша. Цесарь же одва в городъ вниде, и с патриарьхом Фотиемъ[66] къ сущий церкви святий Богородици Вълахерни всю нощь молитву створиша, такоже божественую ризу святыя Богородица с песьнеми изнесъше, в реку омочиша.[67] Тишине сущи и морю укротившюся, абье буря с ветром въста,[68] и волнамъ великымъ въставшим засобь, и безъбожных руси корабля смяте, и къ берегу приверже, и изби я, яко малу ихъ от таковыя беды избыти и въсвояси възвратишася.

В лето 6375.

В лето 6376. Поча цесарствовати Василий.[69]

В лето 6377. Крещена бысть вся земля Болгарьская.[70]

В лето 6378. В лето 6379. В лето 6380. В лето 6381. В лето 6382. В лето 6383. В лето 6384. В лето 6385. В лето 6386.

В лето 6387. Умершю же Рюрикови предасть княжение свое Олгови, от рода ему суща, въдавъ ему на руце сына своего Игоря, бяше бо молодъ велми.[71]

В лето 6388. В лето 6389.

В лето 6390. Поиде Олгъ, поемъ вои свои многы: варягы, чюдь, словены, мерю, весь, кривичи. И прия городъ Смольнескъ и посади в нем мужь свой. Оттуда поиде внизъ и, пришедъ, взя Любечь,[72] и посади мужь свой. И придоста къ горамъ киевьскымъ, и увиде Олгъ, яко Осколдъ и Диръ княжита, и похорони вои въ лодьях, а другыя назади остави, а самъ приде, нося Игоря молода. И приступль под Угорьское, похоронивъ вои свои, и посла къ Асколду и Диру, глаголя, яко «Гостье есмы, идемъ въ Грекы от Олга и от Игоря княжича. Да придета к роду своему, к нам». Асколдъ же и Диръ придоста, и выскакаша вси из лодей, и рече Олгъ къ Асколъдови и Дирови: «Вы неста князя, ни роду княжя, но азъ есмь роду княжа», и вынесоша Игоря: «Сь сынъ Рюриковъ». И убиша Асколъда и Дира, и несоша на гору, и погребоша на горе, еже ся ныне зоветь Угорьское, идеже ныне Олминъ дворъ; на той могиле поставилъ божницю святаго Николы: и Дирова могила за святою Ориною.[73] И седе Олегъ, княжа в Киеве, и рече Олегъ: «Се буди мати городом русскымъ». И беша у него словени и варязи и прочии, прозвашася русью. Се же Олегъ нача городы ставити, и устави дани словеном, и кривичемъ и мерямъ, и устави варягом дань даяти от Новагорода 300 гривенъ на лето, мира деля, еже до смерти Ярославля даяше варягом.

В лето 6391. Поча Олегъ воевати на древляны, и примучивъ я, поча на них дань имать по черьне куне.

В лето 6392. Иде Олегъ на севяры, и победи северы, и възложи на нихъ дань легъку, и не дасть имъ козаромъ дани даяти, рекъ: «Азъ имъ противенъ, а вамъ не чему».

В лето 6393. Посла Олегъ к радимичем, ркя: «Кому дань даете?» Они же реша: «Козаром». И рече имъ Олегъ: «Не давайте козаромъ, но мне давайте». И вдаша Олгови по щелягу,[74] якоже и козаромъ даяху. И бе обладая Олегъ деревляны, полями, радимичи, а со уличи и тиверьци имеяше рать.

В лето 6394.

В лето 6395. Леонъ царствова, сынъ Васильевъ, иже Левъ прозвася, и брат его Александръ, иже цесарствоваша <...> лет 26.[75]

В лето 6396. В лето 6397. В лето 6398. В лето 6399. В лето 6400. В лето 6401. В лето 6402. В лето 6403. В лето 6404. В лето 6405.

В лето 6406. Идоша угре мимо Киевъ горою, еже ся зоветь ныне Угорьское, и пришедше къ Днепру, сташа вежами; беша бо ходяще, яко и половци. И пришедше от въстока и устремишася чересъ горы великыя, иже прозвашася горы Угорьскыя, и почаша воевати на живущая ту. Седяху бо ту преже словене и волохове, переяша землю Волыньскую.[76] Посемъ же угре прогнаша волохы, и наследиша землю ту, и седоша съ словеньми, покоривше я подъ ся. И оттоле прозвася земля Угорьска. И начаша воевати угре на Грекы, и пополниша землю Фрачьскую и Македоньску доже и до Селуня.[77] И начаша воевати на Мораву и на Чехы. Бе бо единъ языкъ словенескъ: [78] словене, иже седяху по Дунаю, ихъже прияша угре, и морава, и чеси, и ляхове, и поляне, яже ныне зовемая Русь. Симъ бо первее положены[79] книгы мораве, яже и прозвася грамота словеньская, яже грамота е в Руси и в болгарехъ дунайскых.

Словеномъ бо живущимъ кресщеным и княземъ ихъ, Ростиславъ, и Святополкъ и Коцелъ[80] послаша къ цесарю Михаилу, глаголюще: «Земля наша крещена, и несть в нас учитель, иже бы нас училъ и казалъ, и протолоковалъ святыя книгы. Не разумеемъ бо ни гречькому языку, ни латиньскому — оны бо ны инако учать, а друзии — инако, темьже не разумеем книжнаго разума, ни силы ихъ. А послете ны учителя, иже могуть ны сказати книжная словеса и разумъ ихъ». Се слышавъ, Михаилъ цесарь съзъва философы вся и сказа имъ речи вся словеньскыхъ князь. И ркоша философы: «Есть мужь в Селуни, именемь Левъ, И суть у него сынове, разумиви язьку словеньску, и хытра два сына у него и философа». Се слышавъ, цесарь посла по ня в Селунь къ Лвови, глаголя: «Пошли к намъ сына своя, Мефедья и Костянтина».[81] Се слышавъ, Левъ въскоре посла я. И придоста къ цесареви, и рече има цесарь: «Се прислалася ко мне словеньская земля, просяще учителя себе, иже бы моглъ имъ истолковати святыя книгы, сего бо желают». И умолена быста цесаремъ, и послаша я въ словеньскую земьлю къ Ростиславу, и Святополку и Коцьлови. Сима же пришедъшима, начаста съставляти писмена азъбуковьная словеньскы, и преложиста Апостолъ и Еуангелие. И ради быша словене, яко слышаша величья Божия своимъ языком. Посемъ же переложиста Псалтырь и Октаикъ[82] и прочая книгы. Неции же начаша хулити словеньскыя книгы, глаголюще, яко: «Не достоить никоторому же языку имети буковъ своихъ, разъве евреи, и грекъ и латины, по Пилатову писанию, еже на кресте Господни написа».[83] Се же услышавъ, папежь римьскый[84] похули техъ, иже ропьщют на книгы словеньскыя, рька: «Да ся исполнит книжное слово: яко “Въсхвалять Бога вьси языци”; другое же: “Вси възглаголють языкы различными величья Божия, якоже дасть им Святый Духъ отвещевати”. Да аще кто хулить словеньскую грамоту, да будут отлучени от церкве, дондеже исправятся; ти бо суть волци, а не овце, яже достоить от плодъ познати я и хранитися ихъ. Вы же, чада, Божия послушайте учения и не отринете наказания церковнаго,[85] якоже вы наказалъ Мефедий, учитель вашь». Костяньтинъ же възвратися въспять и иде учить болгарьска языка, а Мефедий оста въ Мораве. Посемь же Коцелъ князь постави Мефедия епископа въ Пании, на месте святаго апостола Андроника, единого от 70, ученика святаго апостола Павла. Мефедий же посади 2 попа борзописца велми, и преложи вся кьнигы исполнь от грецька языка въ словенескъ шестью месяць, наченъ от марта месяца до двунадесяту и 6 дний октября месяца. Окончавъ же, достойную хвалу и славу Богу въздасть, дающему таку благодать[86] епископу Мефедью, настолнику Андроникову. Темьже словеньску языку есть учитель Андроникъ апостолъ. Моравы бо доходилъ и апостолъ Павелъ и училъ ту; ту бо е Илурикъ, егоже доходилъ апостолъ Павелъ, ту бо бяша словени первее. Темьже словеньску языку учитель есть Павелъ, от негоже языка и мы есме русь, темже и намъ руси учитель есть Павелъ апостолъ, понеже училъ есть языкъ словенескъ и поставилъ есть епископа и наместника по себе Андроника словеньску языку. А словенескъ языкъ и рускый одинъ. От варягъ бо прозвашася Русью, а первее беша словене; аще и поляне звахуся, но словеньская речь бе. Полями же прозвашася, занеже в поле седяху, языкъ словеньскый бе имъ единъ.

В лето 6407. В лето 6408. В лето 6409.

В лето 6410. Леонъ цесарь ная угры на болгары. Угре же, нашедше, всю землю Болгарьскую пленоваху. Семеонъ же, уведавъ, на угры възвратися, угри противу поидоша и победиша болгары, яко одъва Семеонъ въ Деръстеръ убежа.[87]

В лето 6411. Игореви възрастъшю, и хожаше по Олзе и слушаше его, и приведоша ему жену от Плескова, именемь Ольгу.

В лето 6412. В лето 6413. В лето 6414.

В лето 6415. Иде Олегъ на Грекы, Игоря оставивъ Кыеве.[88] Поя же множьство варягъ, и словенъ, и чюди, и кривичи, и мерю, и поляны, и северо, и деревляны, и радимичи, и хорваты, и дулебы, и тиверци, яже суть толковины;[89] си вси звахуться Великая скуфь.[90] И сь семи всеми поиде Олегъ на конехъ и в кораблех, и бе числомъ кораблий 2000. И приде къ Цесарюграду, и греци замкоша Судъ, а городъ затвориша. И вылезе Олегъ на берегъ, и повеле воемъ изъволочити корабля на берегъ, и повоева около города, и много убийство створи греком, и полаты многы разбиша, а церькви пожьгоша, А ихъже имяху полоняникы, овехъ посекаху, другыя же мучаху, иныя же растреляху, а другыя въ море вметаша, и ина многа зла творяху русь греком, елико же ратнии творять.

И повеле Олегъ воемъ своим колеса изъделати и въставити корабля на колеса.[91] И бывшю покосну ветру, успяша парусы с поля, и идяше къ городу. Видевше же греце, убояшася, и ркоша; выславше ко Ольгови: «Не погубляй город, имемься по дань, якоже хощеши». И устави Олегъ вои, и вынесоша ему брашна и вино, и не прия его — бе бо устроено съ отравою. И убояшася греце и ркоша: «Несть се Олегъ, но святый Дмитрий,[92] посланъ на ны от Бога». И заповеда Олегъ дань даяти на 2000 кораблий, по 12 гривне на человека, а в корабли по 40 мужь.

Няшася греци по се, и почаша греци мира просити, дабы не воевалъ Грецькой земли. Олегъ же, мало отступивъ от города, нача миръ творити съ цесарема грецькыма, съ Леономъ и съ Александром. Посла к нима в городъ Карла, Фарлофа, Велмуда, Рулава и Стемида, глаголя: «Имете ми ся по дань». И ркоша греце: «Чего хочете и дамы ти». И заповеда Олегъ дати воемъ на 2000 кораблий по двенатьчать гривне на ключь, и потом даяти углады на руские городы: первое на Киевъ, таже и на Черниговъ, и на Переяславлъ, и на Полътескъ, и на Ростовъ и на Любечь и на прочая городы; по темь бо городомъ седяху князья, подъ Ольгом суще.

«Да приходять русь сълебное емлють, елико хотят, а иже придуть гостье, да емлють месячину на 6 месяць, и хлебъ, и вино, и мяса, и рыбы и овощемъ. И да творять имъ мовь, елико хотять. И поидут же русь домови, да емлют у цесаря вашего на путь брашно, и якоря, и ужа, и парусы и елико надобе.» И яшася греци, и ркоша цесаря и боярьство все: «Аще приидуть русь бес купли, да не взимают месячины. Да запретить князь людем своимъ, приходящим руси зде, да не творят пакости в селехъ и въ стране нашей. Приходящии русь да витают у святаго Мамы, и послеть царство наше, да испишют имена ихъ, и тогда возмут месячное свое — первое от города Киева, и пакы ис Чернигова и Переяславля и прочии городи. И да входять в городъ одиными вороты съ цесаревымъ мужемъ, безъ оружья, мужь 50, и да творят куплю, якоже имъ надобе, и не платяче мыта ни в чемьже».

Цесарь же Леонъ съ Александром миръ створиста съ Ольгом, имъшеся по дань, и роте заходивше межи собою, целовавше сами крестъ, а Ольга водиша и мужий его на роту по рускому закону: кляшася оружьемь своимъ, и Перуномъ, богомъ своимъ, и Волосом,[93] скотьимъ богомъ, и утвердиша миръ. И рече Олегъ: «Исшийте парусы паволочиты руси, а словеном кропийнныя». И бысть тако. И повесиша щиты своя[94] въ вратехъ, показающе победу, и поиде от Цесаряграда. И въспяша русь парусы паволочитые, а словене кропийнныя, и раздра я ветръ. И ркоша словене: «Имемъся своим толъстинамъ — не даны суть словеном парусы кропинныя». И приде Олегъ къ Киеву, неся золото, и паволокы, и овощи, и вина, и всяко узорочье. И прозваша Ольга «вещий» — бяху бо людие погани и невеголоси.

В лето 6416. В лето 6417. В лето 6418.

В лето 6419. Явися звезда велика на западе копейнымъ образомъ.[95]

В лето 6420. Посла Олегъ мужи свои построити мира и положити ряды межи Грекы и Русью, и посла глаголя:

«Равно другаго свещания,[96] бывшаго при техъже цесарихъ Лва и Александра. Мы от рода рускаго — Карлы, Инегелдъ, Фарлофъ, Веремудъ, Рулавъ, Гуды, Руалдъ, Карнъ, Фрелавъ, Рюаръ, Актеву, Труанъ, Лидуль, Фостъ, Стемиръ, иже послани от Олга, великаго князя рускаго, и от всех, иже суть под рукою его, светълыхъ бояръ, к вамъ, Львови и Александру и Костянтину, великьмъ о Бозе самодержьцем, цесаремь грецкымъ, на удержание и на извещение от многыхъ летъ межю християны и Русью бывшюю любовь, похотеньемъ наших князь и по повелению и от всехъ, иже суть подъ рукою его сущих руси. Наша светлость боле инехъ хотящихъ же о Бозе удержати и известити такую любовь, бывшюю межю хрестияны и русью многажды, право судихом, не точью простословесенъ и писаниемь и клятвою твердою, кленшеся оружьемь своимъ, такую любовь известити и утвердити по вере и по закону нашему.

Суть, яко понеже мы ся имали о Божии вере и любви, главы таковыя: по первому слову да умиримся с вами, грекы, да любимъ другъ друга от всея душа и изволенья, и не вдадимъ, елико наше изволение, быти от сущих под рукою нашихъ князь светлыхъ никакомуже съблазну или вине. Но потщимся, елико по силе, на схранение прочихъ и вьсегда летъ с вами, грекы, исповеданиемь и написанием съ клятвою извещаемую любовь непревратну и непостыжну. Тако же и вы, греци, да храните таку же любовь къ княземъ же светлымъ нашим рускымъ и къ всемъ, иже суть подъ рукою светлаго князя нашего, несъблазнену и непреложну всегда и въ вся лета.

А о главах, иже ся ключит проказа, урядимся сице: да елико яве будеть показании явлеными, да имеють верное о тацехъ явлении, а емуже начнуть не яти веры, да кленется часть та, иже ищеть неятью веры, да егда кленется по вере своей, будеть казнь, якоже явится съгрешение.

О семъ, аще кто убиеть крестьяна русинъ, или христьянъ русина, да умреть, идеже аще створить убийство. Аще ли убежить створивый убийство, еще есть имовить, да часть его, сиречь иже его будеть по закону, да возметь ближний убьенаго, а и жена убившаго да имееть, толцемь же прибудеть по закону. Аще ли есть неимовит створивый убой и убежавъ, да держится тяжи, доньдеже обрящется, яко да умреть.

Источник: http://drevne-rus-lit.niv.ru/drevne-rus-lit/text/povest-vremennyh-let/se-nachnem-povest-siyu.htm