В лето 6618.

Идоша весне на половце Святополкъ, и Володимеръ, Давыдъ. И дошедше Воиня, воротишася. Того же лета пришедше половци <...> воеваша около Переяславля по селомъ. Того же лета взяша полонъ половьци у Чина.[561] В то же лето бысть знаменье в Печерьскомъ манастыри февраля въ 11 день: явися столпъ огненъ от земля до небесе, а молнья освитиша всю землю, и на небеси погреме в час 1 нощи, весь миръ виде. Се сь же столпъ ста на тряпезници камяней, яко не видити хреста бяше, и стоя мало, ступи на церковь и ста надъ гробомъ Федосьевомъ, и потомъ надъ верхъ съступи, аки ко въстоку лицемъ, и потомъ невидимо бысть. Се же бяше не огнь, ни столпъ, но видъ ангельскый: ангелъ бо сице являеться ово столпомъ огненомъ, ово же пламеномь. Якоже рече Давидъ: «Творя ангелы своя духы и слугы своя огнь пламянъ,[562] и слеми суть повеленьемь Божьимъ, аможе хощеть Владыка, всихъ Творець, ангеломъ и человекомъ. Ангелъ бо приходить, кде благая места и молитвении домове, и ту показають нечто мало видинья своего, ово бо огнемь, ово столпомъ, ово инако, яко мощно зрети человеком, а не мощно бо зрети человекомъ естьства ангельскаго видити, аще и Моиси великий не возможе видети ангельскаго естьства: водяшеть бо я во дне столпъ облаченъ, а в нощи столпъ огненъ,[563] то се не столпъ водяше ихъ, но ангелъ Божий идяше пред нимь в нощи и во дне. Тако и се явленье которое показываше, емуже быти хотяше, еже бо и бысть на второе лето. Не сий ли ангелъ вожь бы на иноплеменникы, супостатъ бысть, якоже рече: «Ангелъ предъ тобою предъидеть», и пакы: «Ангелъ твой буди с тобою»?[564] Якоже пророк Давидъ глаголеть: «Яко ангеломъ своимъ заповесть о тебе сохранить тя».[565] Якоже пишеть премудрый Епифаний: «Къ коей же твари ангелъ приставленъ: ангелъ облакомъ и мъгламъ, и снегу, и граду, и мразу, ангелъ гласомъ и громомъ, ангелъ зимы, и зноеви, и осени, и весны, и лета, всему духу твари его на земли, и тайныя бездны, и суть скровены подъ землею, и преисподьнии тьмы, и сущи връху безны, бывшия древле верху земля, от неяже тмы, вечеръ, и нощь, и светъ, и день».[566] Ко всимъ тваремъ ангели приставлени, тако же ангелъ приставленъ къ которой убо земли, да соблюдають куюжьто землю, аще суть и погани. Аще Божий гневъ будеть на кую убо землю, повелевая ангелу тому на кую убо землю бранью ити, то оной земле ангелъ не вопротивится повеленью Божью. Яко и се бяше, и на ны навелъ Богъ, грехъ ради нашихъ, иноплеменникы поганыя, и побежахуть ны повеленьемъ Божьимъ: они бо бяху водими аньеломъ по повеленью Божью.[567] Аще ли кто речеть, яко аньела несть у поганыхъ, да слышить, яко Олександру Макидоньскому, ополчившю на Дарья и пошедшю ему, и побидившю землю всю от въстокъ и до западъ, и поби землю Егупетьскую, и поби Арама,[568] и приде в островы морьскыя; и врати лице свое взыти въ Ерусалимъ, побидити жиды, занеже бяху мирни со Дарьемь. И поиде со вси вои его, и ста на товарищи, и почи. И приспе ночь, и лежа на ложи своемь посреде шатра, отверзъ очи свои, види мужа, стояща над нимь и мечь нагъ в руце его, и обличие меча его яко молонии. И запряже мечемь своимъ на главу цареву. И ужасеся цесарь велми и рече: «Не бий мене». И рече ему ангелъ: «Посла мя Богь уимати цесаре великии предъ тобою и люди многи, азъ же хожю предъ тобою, помагая ти. А ныне ведай, яко умьреши, понеже помыслилъ еси взити въ Ерусалимъ, зло створити ереемъ Божьимъ и к людемъ его». И рече царь: «Молю тя, о Господи, отпусти ныне грехъ раба твоего, аче не любо ти, а ворочюся дому моему». И рече ангелъ: «Не бойся, иди путемъ твоимъ къ Иерусалиму, и узриши ту въ Ерусалими мужа въ обличении моем, и борзо пади на лици своемь, и поклонися мужу тому, и все, еже речеть к тобе, створи, не преступи речи ему. В онь же день приступиши речь его, и умреши». И въставъ, цесарь иде въ Ерусалимъ и, пришедъ, въспроси ереевъ: «Иду ли на Дарья?» И показаша ему книги Данила пророка и рекоша ему: «Ты еси козелъ, а онъ овенъ, и потолчеши и возмеши царство его».[569] Се убо не ангелъ ли вожаше Олексаньдра, не поганъ ли побежаше и вси елини кумирослужебници? Тако и си погании попущени грехъ ради нашихъ. Се же ведомо буди, яко въ хрестьянехъ не единъ ангелъ, но елико крестишася, паче же къ благовернымъ княземъ нашимъ; но противу Божью повеленью не могуть противитися, но молять Бога прилежно за хрестьяньскыя люди. Якоже и бысть: молитвами святыя Богородица и святыхъ ангелъ умилосердися Богъ и посла ангелы в помощь русьскимъ княземъ на поганыя. Якоже рече и Моисееви: «Се ангелъ мой предыпоидеть предъ лицемъ твоимъ».[570] Якоже рекохомъ преже, зьнаменье се бысть месяца февраля въ 11 день, исходяще сему лету 18.

В лето 6619. Вложи Богъ Володимеру въ сердце, и нача глаголати брату своему Святополку, понужая его на поганыя, на весну.[571] Святополкъ же поведа дружини своей речь Володимерю. Они же рекоша: «Не веремя ныне погубити смерьды от рольи». И посла Святополкъ к Володимерю, глаголя: «Да быхови ся сняла, и о томъ подумали быхомъ съ дружиною». Послании же приидоша к Володимеру и поведаша всю речь Святополчю. И прииде Володимеръ, и сретостася на Долобьске. И седоша въ единомъ шатре Святополкъ съ своею дружиною, а Володимеръ съ своею. И бывшу молчанью, и рече Володимеръ: «Брате, ты еси старей, почни глаголати, како быхъм промыслили о Русьской земли». И рече Святополкъ: «Брате, ты почни». И рече Володимеръ: «Како я хочю молвити, а на мя хотять молвити твоя дружина и моя, рекуще: хощеть погубити смерды и ролью смердомъ. Но се дивно мя, брате, оже смердовъ жалуете и ихъ коний, а сего не помышляюще, оже на весну начнеть смердъ тотъ орати лошадью тою, и, приехавъ, половчинъ ударить смерда стрелою, и поиметь лошадку, и жону его, и дети его, и гумно его зажжеть. То о семъ чему не мыслите?» И рекоша вся дружина: «Право воистину тако есть». И рече Святополкъ: «Се азъ, брате, готовъ есмь с тобою». И посласта ко Давыдови Святославичю, веляча ему съ собою. И въста Володимеръ и Святополкъ и целовастася, и поидоста на половце Святополкъ съ сыномъ, Ярославъ, и Володимеръ съ сынми, и Давыдъ со сыномъ. И поидоша, возложивше надежю на Бога и на пречистую матерь его, и на святыя ангелы его. И поидоша въ 2 неделю поста, а в пятокъ быша на Суле.[572] В субботу поидоша, и быша на Хороле, и ту и сани пометаша. А в неделю поидоша, в ню же хрестъ целують, и приидоша на Пселъ, и оттуди сташа на реце Голте. Ту пождаша и вои. И оттудо идоша Върьскла, ту же завътра, въ среду, хрестъ целоваша и възложиша всю свою надежю на хрестъ со многими слезами. И оттуде приидоша многи реки въ 6 неделю поста, и поидоша к Донови въ вторникъ. И оболичишася во броне, и полки изрядиша, и поидоша ко граду Шаруканю. И князь Володимеръ пристави попы своя, едучи предъ полкомъ, пети тропари и коньдакы хреста честнаго и канунъ святой Богородици. Поехаша ко граду, вечеру сущю, и в неделю выидоша из города, и поклонишася княземъ рускымъ, и вынесоша рыбы и вино, И перележаша нощь ту. И завътра, въ среду, поидоша к Сугрову и, пришедше, зажьгоша ̀и, а в четвергъ поидоша съ Дона, а в пятницю завътра, месяца марта въ 24 день, собрашася половци, изрядиша половци полки своя и поидоша к боеви. Князи же наши, възложише надежю свою на Бога, и рекоша: «Убо смерть намъ зде, да станемъ крепко». И целовашася другь друга, възведше очи свои на небо, призываху Бога вышняго. И бывшю же соступу и брани крепце, Богъ вышний возре на иноплеменникы со гневомъ, падаху предъ хрестьяны. И тако побежени быша иноплеменьници, и падоша мнози врази наши, супостати, предъ рускыми князи и вои на потоци Дегея. И поможе Богъ рускымъ княземъ. И въздаша хвалу Богу въ тъ день. И заутра, суботе наставше, празноваша Лазарево въскресенье, Благовещенья день, и похваливше Бога, проводиша суботу, и в неделю приидоша. Наставшю же понеделнику страстныя недели, паки иноплеменници собраша полки своя многое множество, и выступиша яко борове велиции и тмами тмы. И оступиша полкы рускыи. И посла Господь Богъ ангела в помощь русьскымъ княземъ. И поидоша половецьстии полъци и полъце русьстеи, и зразишася первое с полкомъ, и тресну аки громъ сразившимася челома. И брань бысть люта межи ими, и падаху обои. И поступи Володимеръ с полки своими и Давыдъ, и, возревше, половци вдаша плещи свои на бегъ. И падаху половци предъ полкомъ Володимеровомъ, невидимо бьеми ангеломъ, яко се видяху мнози человеци, и главы летяху, невидимо стинаемы на землю. И побиша я в понедельникъ страстный, месяца марта въ 27 день. Избьени быша иноплеменнице многое множество на реце Салнице. И спасе Богъ люди своя. Святополкъ же и Володимеръ, и Давыдъ прославиша Бога, давшаго имъ победу таку на поганыя, и взяша полона много, и скоты, и кони, и овце, и колодниковъ много изоимаша рукама. И въпросиша колодникъ, глаголюще: «Како васъ толка сила и многое множество не могосте ся противити, но воскоре побегосте?» Си же отвещеваху, глаголюще: «Како можемъ битися с вами, а друзии ездяху верху васъ въ оружьи светле и страшни, иже помагаху вамъ?» Токмо се суть ангели, от Бога послани помогатъ хрестьяномъ. Се бо ангелъ вложи въ сердце Володимеру Манамаху поустити братью свою на иноплеменникы, русьскии князи. Се бо, якоже рекохомъ, видинье видиша в Печерьскомъ манастыри, еже стояше столпъ огненъ на тряпезници, таже преступе на церковь и оттуда к Городцю; ту бо бяше Володимеръ в Радосыни. И тогда се ангелъ вложи Володимеру въ сердце, нача понужати, якоже рекохомъ.

Темже достойно похволяти ангелы,[573] якоже Иоанъ Златоустець[574] рече: ибо ти Творцю безначално поють, милостиву ему быти и тиху человекомъ. Ангелы бо, глаголю, наша поборникы, на противныя силы воюющимъ, имьже есть архангелъ Михаилъ, ибо со дьяволомъ тела ради Моисиева противяся,[575] на князь же перьский свободы ради людьския противяся. Повеленьемь Божьимъ всю тварь разделити и языкомъ старишины наставляюще. Симъ же некоего перьсямъ презрети оправда, Михаила же сущимъ обрезаномъ людемъ схранити повеле, съставити же пределы ихъ прогневаньемь, не по греховьныя ярости, но от божествьнаго некоего неизреченьнаго слова; сему же работати июдеемь персямъ нудящю, сему же на свободу изъвлекущю и прилежно к Богу молитву приносящю, глаголюще: «Господи вседержителю! Доколе не помилуеши Иерусолима и градъ июдовых, ихже презре семьдесятное лето?». Его же виде видиньемь и Данилъ летяща[576] — лице его, яко видъ молъиный, рещи, очи его, яко свещи, и мышьди его и голени, яко видъ меди блещащеся, и гласъ слова его, яко гласъ многаго народа. Отъ нихъ есть осла отвращая и Валама от нечистого волъшьвленья праздно творяй.[577] От нихъ же и мечь извлекъ противу Иисусу Наугину,[578] помощи ему на противныя образомъ повелевая. От нихъ есть 100 и 80 тысящь суриськиихъ единою нощью поразихъ и сонъ варварьскыхъ смеси смертью. От нихъ же есть, иже пророка Амбакума въздухомъ принесъ скочениемь, да пророка Данила посреде же левъ препитаеть.[579] Таковии же убо и тации на враги изящьствують. Такоже есть и боголепный Рафаилъ: от единыя рыбы уреза утрьникы, беснующися отроковицю ицели и слепа старца сълънъця видети створи ему.[580] Убо не великихъ ли честий достойни суть, нашю жизнь храняще? Не токмо бо хранитель языкомъ повелени быша аньгели, якоже речено бысть: «Егда разделяше Вышний языкы, ихъже разсея сыны Адамовы, постави пределы языкомъ по числу ангелъ Божиих, но и вернымъ человекомъ комуждо достася ангелъ. Ибо отроковица Роди изглаголавши апостоломъ, предъ дверьми стоящю Петру, Иродова лица избегь, глаголаху, не имущи веры: «И ангелъ его есть».[581] Свидительствуеть же и симъ Господь, глаголя: «Видите и не нерадите единого от малыхъ сихъ: глаголю бо вамъ, яко ангели ихъ видять лице воину Отца моего, сущаго на небесехъ». Еще же у коейждо церкви хранителя ангелы пристави Христосъ, якоже открываеть Иоан, глаголя: «Рци ангелу, сущему въ церкьви Измуреньсте: видихъ твою нищету и скорбь, нъ богатъ еси». ... Доброизвестьно убо есть любящимъ насъ ангеломъ, яко насъ ради къ Владыце молящимся. Ибо служебнии дуси суть, якоже и апостолъ глаголеть: «Въ служенье слеми хотящимъ ради наследити спасенье». Ихъ же и поборникы, и споборникы, якоже и ныня слышалъ еси Данила, како въводи архангела Михаила персемь в часъ прогневанья нашея ради свободы. Се бо людемъ работати персямъ нужаше, якоже речено бысть, се же раздришити пленьныя тщашеся. И одалаеть Михаилъ противнику, ибо Ефратъ жидове пришедше, отьне пакы селенье прияша, и градъ и церковь създаша. Тако же и великий Епифаний веща: «Коемуждо языку ангелъ приставленъ», и Списанье бо к Данилу глагола: «Ангелъ и властеля елиномъ и Михаила властеля июдеемъ»; глаголеть же: «И постави уставы по числу ангелъ».

И се пакы, якоже Иполитъ[582] глаголеть, толкуеть Данила: «В лето третьее Кура цесаря, азъ Данилъ плакахъся три недели: перваго же месяца смирихся, моля Бога дьний 20 и 1, прося от него откровенья тайны. И, услышавъ, Отець пусти слово свое, кажа хотящее быти имъ; и бысть на велице реце, лепо бяшеть ту ся явити, идеже хотяше и грехи отпущати. И возведъ очи свои, видехъ: и се мужь оденъ в багоръ. Первый рече виденьемь, аки Гаврилъ ангелъ летя, сде же не тако, но видъ самого Господа, видъ же не свершена человека, но образомъ человекомъ являющася, якоже глаголеть: “И се мужь оденъ въ пъстро, и лядвия его припоясани златомъ чистомъ, и тело его, аки фарсисъ, и лице ему, аки молнья, и очи ему, яко свещи огненеи, и мышци ему плещи подобни меди чисте, и глас его, аки народа многа”. И падохъ на земли, и се я мя аки рука, речи, человеку, и еще въстави мя на колену и рече ко мне: “Не бойся, Даниле, веси, что ради приидохъ к тобе? Брань хочю створити съ княземъ перьскымь. Но поведаю ти писаное в писаньи истинномь, и несть никогоже прящася о семь со мною, разве Михаила князя вашего. Того бо оставихъ ту: от него же бо дьне устремися молити предъ Богомъ твоимъ, услыша молитву твою, и пущенъ есмь азъ брань створити со княземь пръскым, съвет некоторый бысть не отпустити люди, да скоро убо будеть молитва твоя свершена; противихся ему и оставихъ ту Михаила князя вашего’. Кто есть Михаилъ, разве аньгела, преданаго людем?» Яко и к Моисиеви глаголеть: «Не имамъ с вами ити на путь, занеже суть людье жестокою выею», но «ангелъ мой идеть с вами».[583]

Якоже и се с Божьею помощью, молитвами святыя Богородица и святыхъ ангелъ, възъвратишася русьстии князи въсвояси съ славою великою къ своимъ людемъ; и ко всимъ странамъ далнимъ, рекуще къ Грекомъ и Угромъ, и Ляхомъ, и Чехомъ, дондеже и до Рима проиде,[584] на славу Богу всегда и ныня, и присно во веки, аминь.

Того же лета приставися княгини Всеволожая,[585] месяца октября въ 7 день, и положена бысть у святаго Андрея в манастыри. Того же лета приставися Иоанъ, епископъ черниговьский, месяца ноябьря въ 23.

В лето 6620. Индикта 5. Ярославъ ходи на ятвязе, сынъ Святополчь, и победи я, и, пришедъ с войны, посла Новугороду и поя Мьстиславлю дщерь собе жене, Володимерю внуку, месяца маия въ 12, а приведена бысть июня въ 29. Того же лета ведоша Володимерьну Офимью въ Угры за короля.[586] Того же лета преставися Давыдъ Игоревичь, месяца маия въ 25, и положено бысть тело его въ 29 въ церькви святыя Богородица Влахерне на Клове. Томъ же лете преставися Янка, дщи Всеволожа, сестра Володимера, месяца ноября въ 3 день, положена бысть у церкви святаго Андрея, юже бе создалъ отець ея; ту бо ся бе и постьригла у церкви тоя, девою сущи. Исходящю же сему лету, и поставиша Феоктиста епископомъ Чернегову, игумена Печерьскаго, месяца генваря въ 12 день, а посаженъ на столе въ 19. И радъ бе князь Давыдъ и княгини, бе бо ей отець духовный, и бояре, и вси людье радовахуся; бе бо пред нимъ епископъ боленъ и не моги служити, и лежа в болести летъ 25; темьже князь и людье жадаху епискупле службе и радовахуся, славяще Бога. Сему же тако бывьшю и братьи сущи безъ игумена, совокупившимся братьи всей, и нарекоша в собе игумена Прохора попина, и възвистиша митрополиту и князю Святополку о немь. И повеле князь митрополиту поставити с радостью. И поставленъ бысть неделе Масленое в четвергъ, месяца февраля въ 9 день. И тако внидоша в постъ братья и со игуменомъ.

В лето 6621. Бысть знаменье въ солнци въ 1 часъ дьне, бысть видити всемъ людемъ: остася солнца мало, аки месяца доловъ рогома, месяца марта въ 19 день, а луны въ 29. Се же бывають знаменья не на добро; бывають знаменья въ солнци и в луне или звездами не по всей земле, но в которой любо земле аще будеть знаменье, то та земля и видить, и ина земля не видить. Тако се древле, во дни <...> Онтиоховы быша знаменья въ Ерусалиме, ключися являтися на въздуси на конихъ рыщуще во оружьи, и оружьемь двизанье, то се бяше въ Иерусолиме токмо, а по инымъ землямъ не бяше сего.[587] Якожь бысть знаменье въ солнце, проявляше Святополчю смерть. По семь бо приспе празникъ пасхы, и празьноваша, и по празнице разболися князь. А преставися благоверный князь Михаилъ, зовемый Святополкъ, месяца априля въ 16 день за Вышегородомъ. И привезоша ̀и в лодьи Киеву, и спрятавше тело его, и възложиша на сане. И плакашеся по немь бояре и дружина его вся, певше над нимь обычныя песни, и положиша въ церкви святаго Михаила, юже бе самъ создалъ. Княгини же его много раздили богатьстьво монастыремъ и попомъ, и убогымъ, яко дивитися всемъ человекомъ, яко такоя милости никтоже можеть створити. Наутрия же, въ семы на 10 день, светъ створиша кияне, послаша к Володимеру, глаголюще: «Поиди, княже, на столъ отенъ и деденъ». Се слышавъ, Володимеръ плакася велми и не поиде, жаляси по брате. Кияни же разъграбиша дворъ Путятинъ, тысячького, идоша на жиды и разграбиша я. И послашася паки кияне к Володимеру, глаголюще: «Поиди, княже, Киеву; аще ли не поидеши, то веси, яко много зла уздвигнеться, то ти не Путятинъ дворъ, ни соцькихъ, но и жиды грабити, и паки ти поидуть на ятровь[588] твою и на бояры, и на манастыре, и будеши ответъ имети, княже, оже ти манастыре разъграбять». Се же слышавъ, Володимеръ поиде в Киевъ.

Начало княженья Володимеря, сына Всеволожа. Володимеръ Мономахъ седе Киеве в неделю. Усретоша же ̀и митрополитъ Никифоръ съ епископы и со всими кияне с честью великою. Седе на столе отца своего и дедъ своихъ, и вси людье ради быша, и мятежь влеже.[589] Слышавше же половце смерть Святополчю, и съвокупившеся, и придоша къ Выры.[590] Володимеръ же, совокупивъ сыны свои и сыновце, иде къ Выру и совокупися съ Олгомъ, половце же бежаша. Того же лета посади сына своего Святослава в Переяславле, а Вячьслава у Смоленьске. В се же лето преставися игуменья Лазорева манастыря, свята житьемь, месяца семьтября въ 4 на десять день, живши летъ шестьдесятъ в чернечестве, а от роженья девяносто летъ и два. В се же лето поя Володимеръ за сына своего Романа Володаревну, месяца семьтября въ 1 на десятъ день. В се же лето Мьстиславъ заложи церковь камяну святаго Николы на княже дворе, у торговища Новегороде.[591] Того же лета посади сына своего Ярополка в Переяславле. Томъ же лете поставиша епископа Данила Гургеву, а Белугороду Никиту.

В лето 6622. Преставися Святославъ, сынъ Володимеръ, месяца марта 16 день, и положенъ бысть во Переяславле у церкви святаго Михаила; ту бо отець ему далъ столъ, выведы ̀и изъ Смоленьска. В се же лето Мьстиславъ заложи Новъгородъ болий перваго. В се же лето заложена бысть Ладога камениемъ на приспе Павломъ посадникомъ при князе Мьстиславе.

Пришедшю ми в Ладогу, поведаша ми ладожане, яко сде есть: «Егда будеть туча велика, находять дети наши глазкы стекляныи, и малы и великыи, провертаны, а другые подле Волховъ беруть, еже выполоскываеть вода», от нихъ же взяхъ боле ста, суть же различь.[592] Сему же ми ся дивлящю, рекоша ми: «Се не дивно; и суть и еще мужи старии ходили за Югру и за Самоядь,[593] яко видивше сами на полунощныхъ странахъ: спаде туча, и в той тучи спаде веверица млада, акы топерво рожена, и възрастъши, и расходится по земли. И пакы бываеть другая туча, и спадають оленци мали в ней, и възрастають и расходятся по земли». Сему же ми есть послухъ посадникъ Павелъ ладожкый и вси ладожане.

Источник: http://drevne-rus-lit.niv.ru/drevne-rus-lit/text/povest-vremennyh-let/v-leto-6618.htm