Аще ли ударить мечемь или бьеть кацемь любо сесудомъ, за то ударение или убьение да вдасть литръ 5 сребра по покону рускому; аще ли будеть неимовить тако створивый, да вдасть елико можеть, и да соиметь съ себе и ты самыя порты своя, в нихъже ходить, да о проче да роте ходить своею верою, яко никакоже иному помощи ему, да пребывает тяжа оттоле не взискаема.

О семь, аще украдет русинъ что любо у крестьянина, или пакы христьянинъ у русина, и ятъ будеть в томъ часе тать, егда татьбу створит, от погубившаго что любо, аще приготовится татьбу творяй: и убиенъ будеть, да не възыщется смерть его ни от хрестьянъ, ни от руси, но паче убо да възметь свое, иже будеть погубилъ. И аще въдасть руце украдый, да ятъ будет темь же, у негоже будеть украдено, и связанъ будеть, и отдасть то, еже сме створити, и створить трижды.

О семь, аще ли кто или русинъ хрестьяну или хрестьянъ русину мучения образомъ искусъ творити и насилье яве, или възмет что любо дружне, да въспятить троичь.

Аще вывержена лодья будет ветромъ великом на землю чюжю, и обрящються тамо иже от нас руси, да аще кто идеть снабьдети лодью с рухломъ своимъ и отсылати пакы на землю крестьяньску, да проводимъ ю сквозе всяко страшно место, дондеже придеть в бестрашно место. Аще ли таковая лодья или от буря, или боронения земнаго боронима,[97] не можеть възвратитися въ своя си места, спотружаемъся гребцемъ бо тоя лодья мы, русь, и допровадимъ с куплею ихъ поздорову. Ти аще ключится близъ земли Грецькы, аще ли ключится такоже проказа лодьи рустей, да проводимъ ю в Рускую земьлю, и да продають рухло тоя лодья, и аще что можеть продати от лодья, воволочимъ имъ мы, русь. Да егда ходимъ въ <...> Грекы или с куплею, или в солбу къ цесареви вашему, да пустимъ я съ честью проданое рухло лодья ихъ. Аще ли ключится кому от тоя лодья в ней убьену быти или бьену быти от нас, руси, или взяти что любо, да повиньни будуть то створшии преждереченную епитемьею от техъ.

Аще полоняникъ обою страну держим есть или от руси, или от грекъ, проданъ въ ину страну, оже обрящеться или русинъ или гречинъ, да искупять и възвратять искупленое лице въ свою страну, и възмуть цену его купящии, или мниться въ куплю над нь челядиная цена. Такоже аще от рати ятъ будеть, да от техъ грекъ, такоже да възвратится въ свою страну, и отдана будеть цена его, якоже речено есть, якоже есть купля.

Егда же требуеть на войну ити, егда же потребу творите, и си хотять почестити цесаря вашего, да аще въ кое время елико ихъ придет, и хотять оставити у цесаря вашего своею волею, да будуть.

О руси, о полоненьи. Многажды от коея убо страны пришедшимъ в Русь и продаемомъ въ крестьяны, и еще же и от хрестиянъ полоненых мьногажды от коея любо страны приходящимъ в Русь, се продаеми бывают по 20 золота, и да придуть в Грекы.

О том, аще украденъ будеть челядинъ рускый, или ускочить, или по нужи проданъ будет, и жаловати начнуть русь, да покажеться таковое о челядине, да имуть и́ въ Русь. Но и гостье, погубиша челядинъ и жалуют, да ищють и обретаемое, да имуть е. Аще ли кто искушения сего не дасть створити местникъ, да погубит правду свою.

О работающих въ Грецехъ руси у хрестьяньского цесаря. Аще кто умреть, не урядивъ своего именья, ци и своихъ не имать, да възратить именье к малымъ ближикамъ в Русь. Аще ли створить обряжение таковый, възмет уряженое его, кому будеть писалъ наследити именье его, да наследит е.[98]

О взимающихъ куплю руси.

О различныхъ ходящихъ въ Грекы и удолжающихъ. Аще злодей не възвратится в Русь, да жалують русь хрестьяньскому царству, и ятъ будеть таковый, и възвращенъ будет, не хотяи, в Русь, Си же вся да творять русь греком, идеже аще ключится таково.

На утвержение же и неподвижение быти межи вами, хрестьяны, и Русью, бывший миръ състворихом Ивановомъ написанием[99] на двою харотью, цесаря вашего и своею рукою, предлежаiдим честнымъ крестомъ и святою единосущною Троицею единоистиньнаго Бога вашего, извести и дасть нашим послом. Мы же кляхомся къ цесарю вашему, иже от Бога суще, яко Божие здание, по закону и по покону языка нашего, не переступати ни намъ, ни иному от страны нашея от уставленыхъ главъ мира и любве. И таково написание дахомъ царства вашего на утвержение обоему пребывати таковому свещанию, на утвержение и извещение межи нами бывающаго мира. Месяца сентября въ 2, в неделю 15,[100] в лето создания миру 6420».

Цесарь же Леонъ послы рускыя почьстивъ дарми — золотом, и паволоками и фофудьями[101] — и пристави къ нимъ мужи свои показати имъ церковьную красоту, и полаты златыя и в нихъ сущая богатьства, злато много и паволокы и каменье драгое, и страсти Господни, венець, и гвоздье,[102] и хламиду багряную, и мощи святыхъ, учаще я к вере своей, и показающе имъ истинную веру. И тако отпусти я въ свою землю съ честью великою. Послании же Ольгомъ посли придоша къ Ольгови и поведаша вся речи обою цесарю, како створиша миръ, и урядъ положиша межю Грецькою землею и Рускою, и клятвы не переступати ни грецемь, ни руси.

И живяше Олегъ, миръ имея къ всемъ странамъ, княжа въ Киеве. И приспе осень, и помяну Олегъ конь свой, иже бе поставилъ кормити, не вседати на нь. Бе бо преже въпрошалъ волъхвовъ и кудесникъ: «От чего ми есть умьрети?». И рече ему одинъ кудесникъ: [103] «Княже! Конь, егоже любиши и ездиши на немъ, от того ти умрети». Олегъ же приимъ въ уме, си рече: «Николи же всяду на конь, ни вижю его боле того». И повеле кормити и́ и не водити его к нему, и пребывъ неколко летъ не дея его, дондеже и на грекы иде. И пришедшю ему къ Киеву и пребысть 4 лета, на 5 лето помяну конь свой, от негоже бяху рекъли волъсви умрети Ольгови. И призва старейшину конюхомъ, ркя: «Кде есть конь мой, егоже бехъ поставилъ кормити и блюсти его?». Онъ же рече: «Умерлъ есть». Олегъ же посмеяся и укори кудесника, ркя: «То ть неправо молвять волъсви, но все то лъжа есть: конь умерлъ, а я живъ». И повеле оседлати конь: «Да ть вижю кости его». И приеха на место, идеже бяху лежаще кости его голы и лобъ голъ, и слезъ с коня, посмеяся, ркя: «От сего ли лъба смерть мне взяти»?» И въступи ногою на лобъ, и выникнучи змея и уклюну ̀и в ногу. И с того разболевся, умьре. И плакашася по немъ вси людие плачем великом, и несоша ̀и, и погребоша ̀и на горе, иже глаголеться Щековица; есть же могила его до сего дни, словеть могила Олгова.[104] И бысть всехъ летъ его княжения 33.

Се же не дивно есть, яко от волъхвования сбывается чародейством.[105] Якоже бысть во царство Деметьяново, некый волхвъ, именемъ Аполоня Тянинъ,[106] знаемъ бяше, шествуя и творя всюду, в городех и в селех, бесовьская чюдеса творя. От Рима бо пришедъ въ Узантию, умоленъ бысть от живущих ту, створити сия: отгна множьство змий и скоропия изъ града, яко не вьрежатися человекомъ от нихъ, ярость коньскую обуздавъ, егда схожахуся бояре. Тако же и въ Антиохию[107] пришедъ и умоленъ бывъ от них, томимомъ бо антиохомъ от скорпий и от комаровъ, створи скорпий медянъ и погребе и́ в земли, и малъ столпъ мраморянъ постави надъ ним. И повеле трость держати человекомъ, и ходити по городу, звати, тростемъ трясомомъ: «Бес комара граду». Тако изъщезоша изъ града комари и скорпия. И спросиша же и пакы о належащемь на граде трусе, въздохну, списа на дщице сия: «Увы тебе, оканьный городе, яко потрясешися много, одержимъ будеши огнемъ, оплачеть же тя и при березе си Оронтии». О немь же и великый Анастасий Божия города[108] рече: «Аполонию же доже и доныне на нецехъ местех сбываются створенаа, стоящая ова на отвращение четвероногъ, птица, могущи вредити человекы, другыя же на въздержание струямъ речнымъ, нездержаньно текущимъ, но ина некая на тленье и вредъ человекомъ суща на побежение стоять. И не точью бо за живота его така и таковая створиша бесове его ради, но и по смерти его пребывающа у гроба его знаменья творяху во имя его, а на прелещение оканнымъ человекомъ, болма крадомымъ на таковая от дьявола». Кто убо что речеть о творящихъ волшевныхъ делъ? Яко то таковый горазнъ бысть волшебнымъ прелщениемъ, яко воину зазряше ведый Аполоний, яко неистовьствен на ся философьскую хитрость имуща; подобашеть бо ему рещи, якоже и «Азъ словомъ точью творити, ихъже хотяша», а не свершениемъ творити повелеваемая от него. Та же вся ослаблениемъ Божиимъ и творениемь бесовьскымъ бываеть, таковыми вещьми искушатися нашея преславныя веры, аще тверда есть, искрь пребывающи Господеви, ни не влекома врагомъ мечетныхъ ради чюдесъ и сотонинъ делъ, творимомъ от рабъ и слугъ злобие. 2-е и еще и именемъ Господнимъ пророчьствоваша неции, яко Валамъ, и Саулъ, и Каияфа, и бесъ пакы изгнаша, яко Июда и сынове Скевави.[109] Убо и на недостойнии благодетьствует многажды, да етеры свидетельствуеть, ибо Валаамъ чюжь бе обоихъ — житья изящна и веры, но обаче сведельство в немъ благодать инехъ ради смотрения. И Фараонъ таковый бе, но и тому предбудущаа показа. И Навходъносоръ законопреступный, но и сему пакы по мнозехъ сущих посреде же града откры,[110] темь являя, яко мнози, прекостьни имуще умъ, предъ образомъ Христовымъ знаменають иною кознью на прелесть человекомъ, не разумеющимъ добраго, якоже бысть Симонъ[111] волъхвъ, и Менандръ,[112] ини таковыхъ ради, поистине рече: «Не чюдесы прельщати...».

В лето 6421. Поча княжити Игорь по Ользе. В се же время поча царствовати Костянтинъ, сынъ Леонтовъ, зять Романовъ.[113] И деревляне заратишася[114] от Игоря по Олгове смерти.

В лето 6422. Иде Игорь на древляны и, победивъ, възложи на ня дань болшю Ольговы. В то же лето приде Семеонъ Болгарьскый на Цесарьград и, створивъ миръ, иде въсвояси.

В лето 6423. Приидоша печенези первое на Рускую землю и, створивше миръ съ Игоремъ, идоша къ Дунаю. В си же времена приде Семеонъ, пленяя Фракию.[115] Греци же послаша по печенегы. Печенегомъ же пришедъшимъ и хотящимъ на Семеона, расваришася грецкыя воеводы. Видевъше печенизи, яко сами на ся реть имуть, отидоша въсвояси, а болгаре съ грекы съступишася, и посечени быша грецы. Семеонъ же прия градъ Одьрень, иже первое Орестовъ город нарицашеся, сына Агамемнонъ, иже первое въ трехъ рекахъ купався, недуга избы ту, сего ради град въ свое имя нарече. Последе же Андреянъ кесарь обновивый, въ свое имя нарече — Андреянъ; мы же зовемъ Ондреянем градом.[116]

В лето 6424. В лето 6425. В лето 6426. В лето 6427.

В лето 6428. Поставьленъ Романъ цесаремъ въ Грецехъ. Игорь же воеваше на печенегы.

В лето 6429. В лето 6430. В лето 6431. В лето 6432. В лето 6433. В лето 6434. В лето 6435. В лето 6436.

В лето 6437. Прииде Семеонъ на Цесарьград, и поплени Фракию и Македонью, и приде къ Цесарюграду в силе велице и в горъдости, и створи миръ с Романомъ цесарем и възвратися въсвояси.[117]

В лето 6438. В лето 6439. В лето 6440. В лето 6441.

В лето 6442. Первое придоша угри на Цесарьград и пленяху всю Фракию. Романъ же створи миръ со угры.[118]

В лето 6443. В лето 6444. В лето 6445. В лето 6446. В лето 6447. В лето 6448.

В лето 6449. Иде Игорь на Грекы.[119] И яко послаша болгаре весть къ цесарю, яко идуть Русь на Цесарьград, скедий[120] 10 тысящь. Иже и поидоша, и приплуша, и почаша воевати Вифаньскыя страны, и пленоваху по Понту до Ираклия и до Фофлагоньскы земля, и всю страну Никомидийскую пополониша,[121] и Судъ всь пожьгоша. Ихъже емъше, овехъ растинаху, и другия же сторожи поставьляюще,[122] стрелами растреляху и изъламляху опакы руци связавше, и гвозды железны посреде головъ въбивахуть има. Мьного же и святыхъ церквий огьневи предаша, и именье немало обою сторону взяша. Потомъ же пришедшемъ воемъ от въстока, Панфиръ деместникъ съ четырмидесятъ тысящь, Фока же патрикий съ македоны, Феодоръ же стратилатъ съ фракы,[123] и с ними же и сановницы боярьстии, обидоша русь около. И свещаша русь, и изидоша противу, въоружившеся на грекы, и брани межю има бывши зле, одва одолеша греци. Русь же възвратишася къ дружине своей к вечеру и, на ночь влезъше въ лодья, отбегоша. Феофанъ же усрете я въ олядехъ съ огнемъ, и нача пущати огнь трубами на лодья рускыя.[124] И бысть видети страшно чюдо. Русь же, видяще пламень, вметахуся въ воду морьскую, хотяще убрести, и тако прочии възвратишася въсвояси. Темьже пришедъшимъ в землю свою, поведаху кождо своимъ о бывшемъ и олядьнемъ огни: «Якоже молонья, — рече, иже на небесихъ, греци имуть в себе, и сию пущающе, жьжаху насъ, и сего ради не одолехом имъ». Игорь же, пришедъ, и нача съвокупляти вои многы, и посла по варягы за море, вабя и́ на грекы, паки хотя поити на ня.

В лето 6450. Семеонъ иде на хорваты, и побеженъ бысть хорваты, и умре, оставивъ Петра, сына своего, княжить.[125] В се же лето. родися Святославъ у Игоря.[126]

В лето 6451. Пакы приидоша угре на Цесарьград и, миръ створивше с Романом, възвратишася въсвояси.

В лето 6452. Игорь совокупи воя многы — варягы, и русь, и поляны, и словены, и кривичи, и тиверцы, и печенегы ная и тали в нихъ поемъ, поиде на грекы в лодьяхъ и на конехъ, хотя мьстити себе. Се слышавше, корсунци послаша къ Роману, глаголюще: «Се идуть Русь, покърыли суть море корабли». Тако же и болгаре послаша весть, глаголюще: «Идуть Русь и печенегы наяли суть к собе». Се слышавъ, цесарь посла къ Игореви лутьшии бояры, моля и глаголя: «Не ходи, но возьми дань, юже ималъ Олегъ, и придамъ еще къ той дани». Такоже и печенегомъ послаша паволокы и золото много. Игорь же, дошедъ Дуная, съзва дружину, и нача думати и поведа имъ речь цесареву. Ркоша же дружина Игорева: «Да аще сице глаголеть цесарь, то что хощемъ боле того: не бившися, имати злато, и серебро, и паволокы? Еда кто весть: кто одолееть, мы ли, они ли? Или с моремъ кто светенъ? Се бо не по земли ходимъ, но по глубине морьстий — и обьча смерть всемъ». И послуша ихъ Игорь, и повеле печенегомъ воевати Болгарьскую землю, а самъ, вземъ у грекъ злато и паволокы на вся воя, възвратися въспять и приде къ Киеву въсвояси.

В лето 6453. Присла Романъ, и Костянтинъ и Стефанъ слы къ Игореви построити мира перваго. Игорь же глаголавъ с ними о мире. Посла Игорь мужи свои къ Роману. Романъ же събра бояры и сановникы. И приведоша рускыя слы, и повелеша глаголати и писати обоихъ речи на харотью:

«Равно другаго свещания, бывшаго при цесаре Романе, и Костянтине, и Стефане,[127] христолюбивыхъ владыкъ. Мы от рода рускаго слы и гостье: Иворъ, солъ Игоревъ, великаго князя рускаго, и обьчии сли: Вуефастъ Святославль, сына Игорева, Искусеви Олгы княгыня, Слуды Игоревъ, нетий Игоревъ, Улебъ Володиславль, Каницарь Предславинь, Шигобернъ Сфандръ, жены Улебовы, Прастенъ Турдуви, Либиарь Фастов, Гримъ Сфирковъ, Прастенъ Якунъ, нетий Игоревъ, Кары Тудковъ, Каршевъ Тудоровъ, Егри Ерлисковъ, Воистовъ Иковъ,[128] Истръ Яминдовъ, Ятьвягъ Гунаревъ, Шибьридъ Алдань, Колъ Клековъ, Стегги Етоновъ, Сфирка, Алвадъ Гудовъ, Фудри Тулбовъ, Муторъ Утинъ, купець Адунь, Адолбъ, Ангивладъ, Улебъ, Фрутанъ, Гомолъ, Куци, Емигъ, Турьбридъ, Фурьстенъ, Бруны, Роалъдъ, Гунастръ, Фрастенъ, Инъгелдъ, Турбернъ и другий Турбернъ, Улебъ, Турбенъ, Моны, Руалдъ, Свень, Стиръ, Алданъ, Тилий, Апубкарь, Свень, Вузелевъ, и Синько биричь, послании от Игоря, великаго князя рускаго, и от всея княжья и от всех людий Руское земли. И от техъ заповедано объновити ветхый миръ и от ненавидящаго добра, вьраждолюбца дьявола разореный от многъ лет, утвердити любовь межю Грекы и Русью.

И великый нашь князь Игорь, и бояре его, и людие вси рустии послаша ны къ Роману, и Стефану, и Костянтину, великымъ цесаремъ грецкымъ, створити любовь съ самими цесари, и съ всемъ боярьствомъ и съ всими людми грецкыми на вся лета, дондеже солнце сияеть и всь миръ стоить.

Иже помыслить от страны Рускыя раздрушити таковую любовь, и елико ихъ крещенье прияли суть, да приимуть месть от Бога вседержителя, осужение и на погибель и в сий векъ и в будущий, а елико ихъ не кресщено есть, да не имуть помощи от Бога, ни от Перуна, да не ущитятся щиты своими, и да посечени будуть мечи своими, и от стрелъ и от иного оружья своего, и да будуть раби и в сий векъ и будущий.

Великый князь рускый и бояре его да посылають на то въ Грекы к великымъ цесаремъ грецкым корабля, елико хотять, съ послы своими и гостьми, якоже имъ уставлено есть. Ношаху слы печати златы, а гостие серебряны. Ныне же уведалъ есть князь вашь посылати грамоту къ царству нашему,[129] иже посылаеми бывають от нихъ послы и гостье, да приносять грамоту, пишюще сице, яко «послах корабль селико». И от техъ да увемы и мы, оже с миромъ приходят. Аще ли безъ грамоты приидуть, и предани будуть намъ, держимъ и хранимъ, дондеже възвестимъ князю вашему. Аще ли руку не дадят и противятся, да убьени будуть, и да не изыщеться смерть ихъ от князя вашего. Аще ли, убежавше, приидуть в Русь, и мы напишемъ къ князю вашему, и яко имъ любо, тако створять. И аще придуть русь безъ купля, да не взимають месячины. И да запретить князь слом своимъ и приходящий руси сде, да не творять бещинья в селехъ, ни въ стране нашей. И приходящимъ имъ, да витають у святаго Мамы, да послеть царство наше, да испишеть имена ихъ, и тогда възмуть месячное свое, сли слебное свое, а гостье месячное свое, первое от града Киева, и пакы ис Чернигова и ис Переяславля и прочии городи. И да входять в город одиными вороты съ цесаревомъ мужемъ безъ оружья, 50 мужь, и да творять куплю, якоже имъ надобе, и пакы да исходять; и мужъ цесарьства нашего да хранить я, да аще кто от руси или от грекъ створить криво да оправляет тъ. Входя же русь в городъ, да не творят пакости и не имеють власти купити паволокъ лише по пятидесятъ золотникъ; и от техъ паволокъ аще кто купить, да показаеть цесареву мужеви, и тъ я запечатаеть и дасть имъ. И отходящи руси отсюду, взимають от нас, еже надоби брашно на путь, и еже надобе лодьямъ, якоже уставлено есть первое, и да възвращаются съ спасениемъ въ свою сторону, и да не имуть волости зимовати у святаго Мамы.

И аще ускочить челядинъ от Руси, по не же приидуть въ страну царства нашего, и от святаго Мамы, и аще будеть и обрящеться, да поимуть и́, аще ли не обрящется, да на роту идут наши христеяне руси, а не христьянии — по закону своему, ти тогда взимають от нас цену свою, якоже уставлено есть преже, 2 паволоце за челядинъ.

Аще ли кто от людий царства нашего, ли от города нашего, или от инехъ городъ ускочить челядинъ нашь къ вамъ и принесеть что, да взвратять е опять, и еже что принеслъ будеть цело все, да возмет от него золотника два имечнаго.

Аще ли покусится кто взяти от руси и от людий царства нашего, иже то створить, покажьненъ будеть вельми; аще ли и взялъ будеть, да заплатит сугубо. Аще ли створить то же грецинъ русину, да приимет ту же казнь, якоже приялъ есть онъ.

Аще ли ключится украсти русину от грекъ что, или гречину от руси, достойно есть, да възвратит е не точью едино, но и цену его. Аще украденое обрящется продаемо, да вдасть цену его сугубу, и тъ покажненъ будеть по закону грецкому, и по уставу грецкому и по закону рускому.

И елико християнъ от власти нашея пленена приведут русь ту, аще будеть уноша или девица добра, да въдадять золотникъ 10 и поимуть ̀и. Аще ли есть средовечь, да вдасть золотникъ 8 и поиметь ̀и. Аще ли будеть старъ или детичь, да вдастъ золотникъ 5.

Аще ли обьрящются русь работающе у грекъ, аще суть полоняници, да искупають а русь по 10 золотникъ; аще ли купилъ и будет гречинъ, под крестомъ достоить ему, да възметь цену, елико же далъ будеть на нем.

О Корсуньсций стороне.[130] Колко же есть городъ на той части, да не имуть власти князи рускыи, да воюеть на техъ сторонахъ, а та страна не покоряется вам, и тогда, аще просит вой от насъ князь рускый, дамы ему, елико ему будет требе, и да воюет.

И о томъ, аще обрящют русь кувару[131] гречьску, вывержену на некоемъ любо месте, да не приобидять ея. Аще ли от нея възметь кто что или человека поработить или убьеть, да будеть повиненъ закону рускому и грецкому.

И аще обрящють русь коръсуняны, рыбы ловяща въ устьи Днепра, да не творят имъ зла никакогоже.

И да не имеють русь власти зимовати въ устьи Днепра, Белобережии, у святаго Елеуферья,[132] но егда придеть осень, да идуть в домы своя в Русь.

А о сихъ, иже то приходять черьнии болгаре и воюють въ стране Корсуньстий, и велимъ князю рускому, да ихъ не пущаеть, и пакостять стороне его.

Или аще ключится проказа некака от грекъ, сущихъ подъ властью царства нашего, да не имате власти казнити я, но повеленьемь царства нашего, да приимет, якоже будеть створилъ.

И аще убьеть крестьянинъ русина, да держимъ будеть створивый убиство от ближнихъ убьенаго, да убьють ̀и. Аще ли ускочить створивы убой и убежить, и аще будеть имовит, да возмуть именье его ближнии убьенаго; аще ли есть неимовитъ створивый убийство и ускочить, да ищють его, дондеже обрящется, да убьенъ будет.

Или аще ударит мечемъ, или копьемъ, или кацемъ инымъ съсудом русинъ гречина, или гречинъ русина, да того деля греха заплатить серебра литръ 5 по закону рускому. Аще ли есть неимовит, да како можеть, въ толко же и проданъ будеть, яко да и порты, в нихъже ходить, и то с него сняти, а о прочи да на роту ходит по своей вере, яко не имея ничтоже, ти тако пущенъ будеть.

Аще ли хотети начнеть наше царьство от вас вои на противящася намъ, да пишют к великому князю вашему, и пошлеть к намъ, елико хощемъ; и оттоле уведять иныя страны, каку любовь имеют греци с русью.

Мы же свещание все положимъ на двою харатью, и едина харотья есть у царства нашего, на нейже есть крестъ и имена наша написана, а на другой сли ваши и гостье ваши. А отходяче со слом царства нашего да допроводять к великому князю Игореви рускому и к людемъ его, и ти, приимающе харотью, на роту идуть хранити истину, якоже мы свещахом и написахом на харотью сию, на нейже суть написана имена наша.

Мы же, елико насъ крестилися есмы, кляхомся церковью святаго Ильи въ зборней церкви и предлежащимъ честнымъ крестомъ, и харотьею сею, хранити же все, еже есть написано на ней, и не преступати от того ничтоже. А оже переступить се от страны нашея, или князь, или инъ кто, или кресщенъ или некрещенъ, да не имать от Бога помощи, и да будуть рабы в сий векъ и в будущий, и да заколенъ будеть своимъ оружьемъ.

А некрещении русь да полагають щиты своя и мечи свои нагы, и обручи свои и прочая оружья, и да кленуться о всем, и яже суть написана на харотье сей, и хранити от Игоря и от всехъ бояръ и от всех людий и от страны Рускыя въ прочая лета и всегда.

Аще ли же кто от князь и от людий рускыхъ или крестьянъ, или некресщеный переступить все, еже написано на харотье сей, и будеть достоинъ своимъ оружьемь умрети, и да будет клятъ от Бога и от Перуна, и яко преступи свою клятъву.

Да обаче будеть добре Игорь великый князь да хранить любовь вьсю правую, да не раздрушится, дондеже солнце сияет и всь миръ стоить, въ нынешняя векы и в будущая».

Послании же сли Игоремъ придоша къ Игореви съ слы грецкими и поведаша вся речи цесаря Романа. Игорь же призва послы грецкыя, рече «Молвите, что вы казалъ цесарь?» И ркоша сли цесареви: «Се посла ны цесарь, радъ есть миру и хочеть миръ имети съ князем рускымъ и любовь. И твои сли водили суть цесаря нашего роте, и насъ послаша роте водить тебе и мужь твоихъ». И обещася Игорь сице створити. И наутрея призва Игорь сли, и приде на холъмы, кде стояше Перунъ, и покладоша оружья своя, и щиты и золото, и ходи Игорь роте и мужи его, и елико поганыя руси, а хрестьяную русь водиша въ церковь святаго Ильи, яже есть надъ Ручьемъ, конець Пасыньце беседы, и козаре: се бо бе сборная церкви, мнози бо беша варязи хрестьяни.[133] Игорь же, утвердивъ миръ съ грекы, отпусти слы, одаривъ скорою, и челядью и воском, и отпусти я. Сли же придоша къ цесареви и поведаша вся речи Игоревы и любовь, яже къ греком.

Игорь же нача княжити въ Киеве, и миръ имея къ всемъ странамъ. И приспе осень, и нача мыслити на деревляны, хотя примыслити болшюю дань.[134]

В лето 6453. Ркоша дружина Игореви: «Отроци Свенделжи[135] изоделеся суть оружьемь и порты, а мы нази. И поиди, княже, с нами в дань, да и ты добудешь и мы». И послуша ихъ Игорь, иде в Дерева в дань, и примысляше къ первой дани, и насиляше имъ и мужи его. И возмя дань и поиде въ свой городъ. Идущю же ему въспять, размысли, рече дружине своей: «Идете вы с данью домови, а язъ възвращюся и похожю еще». И пусти дружину свою домови, с маломъ же дружины възвратися, желая болшая именья. Слышавше же древляне, яко опять идеть, съдумавше древляне съ княземъ своимъ Маломъ и ркоша: «Аще ся въвадить волкъ въ овце, то относить по единой все стадо, аще не убьють его; тако и сий, аще не убьем его, то вси ны погубить», И послаша к нему, глаголюще: «Почто идеши опять? Поималъ еси вьсю дань». И не послуша ихъ Игорь, и шедше из города Искоростеня[136] противу древляне и убиша Игоря[137] и дружину его, бе бо ихъ мало. И погребенъ бысть Игорь, и есть могила его у Искоростиня города в Деревехъ и до сего дни.

Ольга же бяше в Киеве съ сыномъ своимъ детьском Святославомъ, и кормилець бе его Асмудъ, и воевода бе Свинделдъ, — то же отець Мьстишинъ. Ркоша же деревляне: «Се князя рускаго убихомъ, поимемъ жену его Олгу за князь свой Малъ и Святослава, и створимъ ему, якоже хощемъ». И послаша деревляне лучьшии мужи свои, числомъ 20, в лодьи къ Ользе. И присташа подъ Боричевом въ лодьи. Бе бо тогда вода текущи возле горы Киевьскыя, и на Подоле не седяхуть людье, но на горе. Городъ же бяше Киевъ, идеже есть ныне дворъ Гордятинъ и Никифоровъ, а дворъ кьняжь бяше в городе, идеже есть ныне дворъ Воротиславль и Чюдинь, а перевесище бе вне города. Дворъ теремный и другый — идеже есть дворъ демесниковъ[138] за святою Богородицею, надъ горою. Бе бо ту теремъ каменъ. И поведаша Олзе, яко деревляни придоша, и възва Ольга к собе и рече имъ: «Добре, гостье, приидоша?» И ркоша древляне: «Придохомъ, княгини». И рече имъ Ольга: «Да глаголите, что ради приидосте семо?» И ркоша деревляни: «Посла ны Деревьская земля, ркущи сице: мужа твоего убихомъ, бяшеть бо мужь твой яко волкъ, въсхыщая и грабя, а наши князи добри суть, иже роспасли суть Деревьскую землю, да иди за нашь князь за Малъ» — бе бо ему имя Малъ, князю деревьскому. Рече же имъ Олга: «Люба ми есть речь ваша, уже мне своего мужа не кресити, но хощю вы почтити наутьрея пред людми своими, а ныне идете в лодью свою и лязьте в лодьи величающеся. Азъ утро пошлю по вы, вы же речете: “Не едемъ ни на конехъ, ни пеши идемъ, но понесете ны в лодьи”, и възьнесуть вы в лодьи». И отпусти я в лодью. Ольга же повеле ископати яму велику и глубоку на дворе теремьскомъ вне города. И заутра Ольга, седящи в тереме, посла по гости, и приидоша к нимъ, глаголюще: «Зоветь вы Ольга на честь велику». Они же ркоша: «Не едемъ ни на конехъ, ни на возех, ни пешь идемъ, но понесите ны в лодьи». Ркоша же кияне: «Намъ неволя: князь нашь убитъ, а княгини наша хощеть за вашь князь», и понесоша я в лодьи. Они же седяху в перегбех въ великихъ сустогахъ[139] гордящеся. И принесоша я на дворъ къ Ользе, и, несъше я, и вринуша въ яму и съ лодьею. И приникши Олга и рече имъ: «Добьра ли вы честь?» Они же ркоша: «Пуще ны Игоревы смерти». И повеле засыпати я живы, и посыпаша я.

И пославши Олга къ деревляном, рече: «Да аще мя право просите, то пришлите къ мне мужи нарочиты, да въ велице чести поиду за вашь князь, еда не пустять мене людье киевьсции». Се слышавше, древляне изъбраша лучьшая мужи, иже держать Деревьскую землю, и послаша по ню. Деревляномъ же пришедъшим, повеле Олга мовницю створити, ркущи сице: «Измывшеся, придета къ мне». Они же пережьгоша мовницю, и влезоша древляне и начаша мытися, и запроша мовницю о них, и повеле зажечи я от дверий, и ту изгореша вси.

И посла къ деревляном, ркущи сице: «Се уже иду к вамъ, да пристройте меды мьногы у города, идеже убисте мужа моего, да поплачюся надъ гробомъ его, и створю трызну мужю моему». Они же, слышавше, свезоша меды многы зело. Олга же, поемши мало дружине и легъко идущи, приде къ гробу его и плакася по мужи своемъ. И повеле людем съсути могилу велику, и, яко съспоша, повеле трызну творити. Посем седоша деревляне пити, и повеле Олга отроком своимъ служити передъ ними. И ркоша деревляне къ Олзе: «Кде суть друзе наши, ихъже послахомъ по тя?» Она же рече: «Идуть по мне съ дружиною мужа моего». И яко упишася деревляне, повеле отрокомъ своим пити на ня, а сама отиде прочь и потомъ повеле отроком сечи я, и исъсекоша ихъ 5000. А Ольга възвратися къ Киеву и пристрои воя на прокъ ихъ.[140]

Примечания.

[1] ... черноризца Федосьева манастыря Печерьскаго — В Х после слова «черноризца» добавлено — «Нестера». Косвенное указание на создателя ПВЛ имеется также в Киево-Печерском патерике: в главе «О Никите Затворнике» упоминается «Нестеръ, иже написа летописець». Слов «черноризца... Печерьскаго» нет в Л и Р. Если считать, что чтение И (даже без уточнения, имеющегося только в X) восходит к авторскому тексту, то оно является дополнительным указанием на причастность Нестора к созданию ПВЛ.

[2] Яся въстокъ Симови... — С этих слов начинается перечень земель, доставшихся каждому из сыновей Ноя. В ПВЛ он восходит не к Библии (ср.: Быт. 10, 10—12, 19 и 30), а в большей своей части к тексту хроники Амартола (см. с. 58—59).

[3] Солиду — все списки ПВЛ приводят это написание; в Хронике Амартола — «Еолиду».

[4] Словене — этот этноним добавлен в текст извлечения из Хроники Амартола летописцем.

[5] ... часть всякоя страны... — В Л «всяческой страны», в Хронике Амартола также, вместо — «Асийскыя страны».

[6] ... до Понетьского моря... — С этих слов начинается описание славянских земель, принадлежащее уже самому летописцу. Греки называли Черное море — Понт Евксинский, то есть «Море гостеприимное».

[7] ... Кавькасийскыя горы, рекше Угорьскыя... — Речь идет о Карпатах, которые назывались «Кавказскими горами» в некоторых источниках XI—XII вв.

[8] ... чюдь и вси языце... либь. — Чудь — предки эстонцев, пермь и печера — предки коми, меря — племя, обитавшее в районе Ростова Великого, мурома — племя, жившее в районе одноименного города, весь — вепсы, обитавшие между Ладожским и Белым озерами, заволочьская чудь обитала за волоками на Северной Двине, в бассейне реки Ваги и ее притоков. Ямь — предки финнов, угра — предки манси и хантов. Зимигола, корсь и летьгола — балтийские племена, давшие впоследствии названия областям Земгалия и Латгалия (ныне на территории Латвии), курши обитали южнее Рижского залива, ливы — по северному берегу Западной Двины.

[9] Пруссы — литовские племена, населявшие побережье Балтийского моря от Вислы до Немана.

[10] Варяги — скандинавские народы; варягами именовали также наемные дружины.

[11] ... до земли Агаряньски... — В Л — «до земле Агнянски», то есть, по предположению, — до Англии.

[12] ... до Волошьскые. — По предположению В. Д. Королюка, — до Италии.

[13] Готы — жители острова Готланд в Балтийском море.

[14] Галичане — значение этого термина спорно: жители Уэльса? Галлии? Галисии?

[15] ... волохове...— В. Д. Королюк полагает, что летописец отличал древних римлян (волохов) от современных жителей Рима, Венеции и Генуи, именуя последних римлянами, венедиками, фрягами (Королюк В. Д. Славяне и восточные романцы в эпоху раннего средневековья. М., 1985. С. 174).

[16] ... корлязи... — подданые каролингов?

[17] Симъ же, и Хамъ... хранимъ останокъ. — Библейский рассказ (Быт. 11, 1—9) дополнен апокрифическими подробностями о разрушении столпа и его размерах. Сходный текст находится в Хронике Амартола (с. 57).

[18] ... норци... — норики, жители одноименной римской провинции к югу от Дуная, между Ретией и Паннонией.

[19] Хорутане — предки сербов и словенцев.

[20] Волохомъ бо... насиляющимъ имъ. — Представления летописца о римлянах, «покоривших дунайские славянские племена и принудивших их начать расселение из прародины», восходит, по мнению В. Д. Королюка, к великоморавской историографической традиции, пытавшейся установить связи славян с первыми апостолами (Королюк. Славяне и восточные романцы. С. 175).

[21] ... ляхове... поморяне. — Летописец упоминает польские племена: полян, обитавших в Малой Польше, мазовшан, живших между Вислой и Бугом, поморян — на южном побережье Балтики (см. о них: Лециевич Л. Летописные поморяне // Древности славян и Руси. М., 1988. С. 133—138). Славянское племя лютичей населяло южный берег Балтийского моря между Эльбой и Одером.

[22] Полота — правый приток Западной Двины.

[23] Семь — Сейм, левый приток Десны. Область эта впоследствии именовалась Посемьем и принадлежала черниговским князьям.

[24] Сула — левый приток Днепра.

[25] Северяне — славянское племя.

[26] ... озеро великое Нево... море Варяское. — Реку Неву считали протоком, ведущим из озера Нево (Ладожского) в Балтийское море.

[27] Оковский лес — урочище на Валдайской возвышенности.

[28] Море Хвалисское — Каспийское море; хвалисы — жители Хорезма и само государство.

Источник: http://drevne-rus-lit.niv.ru/drevne-rus-lit/text/povest-vremennyh-let/se-nachnem-povest-siyu.htm