Начало княженья Святославьля.

В лето 6454. Ольга съ сыномъ Святославомъ събра вои многы и храбры, и иде на Деревьскую землю. И изыдоша древляне противу. И снемъшемася обема полкома на скупь, суну копьемъ Святославъ на деревляны, и копье летевъ сквози уши коневи и удари в ногы коневи, бе бо велми детескъ.[141] И рече Свенгелдъ и Асмудъ: «Князь уже почалъ, потягнемъ, дружино, по князи». И победиша деревьляны.[142] Деревляне же побегоша и затворишася в городехъ своихъ. Ольга же устремися съ сыномъ своимъ на Искоростень городъ, яко те бяху убиле мужа ея, и ста около города съ сыномъ своимъ, а деревляне затворишася в городе, и боряху крепько из города, ведаху бо, яко сами убиле князя и на что ся предати. И стоя Ольга лето цело, и не можаше взяти города, и умысли сице: посла къ городу, ркущи: «Чего хощете доседети? А вси ваши городи передашася мне, и ялися по дань, и делають нивы своя и землю свою, а вы хощете голодомъ измерети, не имучися по дань». Деревляни же рькоша: «Ради быхомъ ся яли по дань, но хощеши мьшати мужа своего». Рече же имъ Ольга, яко «Азъ уже мьстила есмь мужа своего, когда придоша къ Киеву, и второе, и третьее, еже когда творяхут трызъну мужю моему. А уже не хощю отмщения творити, но хощю дань имати помалу и, смирившися с вами, поиду опять». Ркоша же древляне: «Что хощеши у нас? Ради даемъ и медом и скорою». Она же рече имъ: «Ныне у вас нету меду, ни скоры, но мала у васъ прошю: дайте ми от двора по три голуби и по три воробьи. Азъ бо не хощю тяжькы дани възложити на васъ, якоже мужь мой, но сего у вас прошю мала: изнемогли бо ся есте въ осаде, да вдайте ми се малое». Деревляне же ради быша, събраша же от двора по три голуби и по три воробьи, и послаша къ Ользе с поклоном. Ольга же рече имъ: «Се уже ся есте покориле мне и моему детяти, а идете в городъ, а язъ заутра отступлю от города и поиду в городъ свой». Деревьляне же ради быша, вънидоша в город и поведаша людемъ, и обрадовашася людье в городе. Ольга же раздая воемъ комуждо по голуби, а дьругимъ по воробьеви, и повеле къемуждо голубеви и воробьеви привязати черь и, оберътываючи въ платкы малы, нитькою поверьзаючи къ всемъ голубемъ и воробьемъ. И повеле Ольга, яко смерчеся, пустити голуби и воробии воемъ своимъ. Голуби же и воробьеве полетеша въ гнезда своя, ови в голубникы своя, воробьеве же подъ острехы, и тако загарахуться голубници, и от нихъ клети и одрины. И не бе двора, идеже не горяше, и не бе льзе гасити, вси бо дворе възгорешася. И побегоша людье из города, и повеле Олга воемъ своимъ имати я. И яко взя городъ и пожьже и́, старейшины же города изънима и прочая люди овехъ изби, а другия работе преда мужем своимъ, а прокъ остави ихъ платити дань.

И възложи на ня дань тяжьку, и две части идета Киеву, а третьяя — Вышегороду къ Ользе; бе бо Вышегородъ[143] Ольжинъ город. И иде Олга по Деревьской земли съ сыномъ своимъ и дружиною своею, уставляющи уставы и урокы, и суть становища ея и ловища ея. И приде в городъ свой Киевъ съ сыномъ своимъ Святославом и, пребывши лето едино, в лето 6455 иде Олга Новугороду. И устави по Мьсте погосты и дань, и по Лузе погосты[144] и дань, и оброкы; и ловища ея суть по всей земли, и знамения и места и погосты. И сани ея стоять въ Плесъкове и до сего дни, и по Днепру перевесища и по Десне, и есть село ея Ольжичи и до сего дни. Изрядивши, възвратися къ сыну своему в Киевъ и пребываше с ним въ любви.

В лето 6456. В лето 6457. В лето 6458. В лето 6459. В лето 6460. В лето 6461. В лето 6462.

В лето 6463. Иде Олга въ Грекы и приде к Цесарюграду.[145] И бе тогда цесарь Костянтинъ, сынъ Леонтовъ. И видевъ ю добру сущю лицем и смыслену велми, и удивися цесарь разуму ея, беседова к ней и рекъ ей: «Подобна еси царствовати в городе семъ с нами». Она же, разумевши, и рече къ цесарю: «Азъ погана есмь, да аще мя хощеши крестити, то крести мя самъ, аще ли — то не кресщюся». И крести ю цесарь с патриархом. Просвещена же бывши, радовашеся душею и теломъ. И поучи ю патриархъ о вере и рече ей: «Благословена ты еси в руськых князехъ, яко възлюби светъ, а тму остави. Благословити тя имуть сынове рустии и въ последний родъ внукъ твоихъ». И заповеда ей о церковнемъ уставе, и о молитве, и посте, и о милостыни и о въздержании тела чиста. Она же, поклонивши главу, стояше, аки губа напаяема, внимающи ученью, и, поклонившися патриарху, глаголаше: «Молитвами твоими, владыко, да съхранена буду от сети неприязнены». Бе же имя ей наречено въ кресщении Олена, якоже и древняя цесарица, мати Великого Костянтина. И благослови ю патриархъ и отпусти ю. И по кресщении призва ю цесарь и рече ей: «Хощю тя поняти жене». Она же рече: «Како мя хощеши поняти, а крестивъ мя самъ и нарекъ мя дщерь? А въ крестьянехъ того несть закона, а ты самъ веси». И рече цесарь: «Переклюка мя, Олга». И вдасть ей дары многы, золото и серебро, паволокы, съсуды разноличныя и отпусти ю, нарекъ ю дщерь себе. Она же, хотячи домови, приде къ патриарху, благословения просящи на домъ, и рече ему: «Людье мои погани и сынъ мой, дабы мя Богъ съблюлъ от вьсякого зла». И рече патриархъ: «Чадо верное! Въ Христа крестилася еси и въ Христа облечеся, и Христосъ съхранить тя, якоже съхрани Еноха в первыя роды, потомъ Ноя в ковчезе, Аврама от Авимелеха, Лота от содомлянъ, Моисея от Фараона, Давида от Саула, три отрокы от пещи, Данила от зверий,[146] тако и тебе избавить от неприязни и сетий его». И благослови ю патриархъ, и иде с миром в землю свою и приде къ Киеву.

Се же бысть, яко и при Соломони приде цесарица ефиопьская, слышати хотящи мудрость Соломоню, многу мудрость видети и зънамения: [147] тако и си блаженая Олга искаше добрые мудрости Божия, но она человецьскыя, а си Божия. «Ищющи бо премудрости обрящют»;[148] «Премудрость на исходищихъ поеться, на путехъ же дерзновение водит, на краихъ же стенъ забралныхъ проповедается, въ вратехъ же градныхъ дерзающи глаголеть: елико бо летъ незлобивии держатся по пьравду...».[149] И си бо от възвраста блаженая Олена искаше мудростью, что есть луче всего въ свете семъ, и налезе бисеръ многоценьный, еже есть Христосъ. Рече бо Соломонъ: «Желанье благоверныхъ наслажаеть душю»;[150] и «Приложиши сердце свое в разумъ»;[151] «Азъ бо любящая мя люблю, а ищющии мене обрящють мя»,[152] ибо Господь рече: «Приходящаго къ мне не иждену вонъ».[153]

Си же Ольга приде къ Киеву, и, якоже рькохом, и присла к ней цесарь грецкый, глаголя, яко «Много дарихъ тя. Ты же глагола ми, яко «аще възвращюся в Русь, многы дары послю ти: челядь, и воскъ и скору, и воя многы в помощь». Отвещавши же, Олга рече къ послом: «Аще ты, рци, тако же постоиши у мене в Почайне, якоже азъ в Суду, то тогда ти вдамъ». И отпусти слы, си рекши.

Живяше же Олга съ сыномъ своимъ Святославом, и учашет его мати креститися, и не брежаше того, ни въ уши внимаше, но аще кто хотяше волею креститися, не браняху, но ругахуся тому. «Невернымъ бо вера крестьяньская уродьство есть»;[154] «Не смыслиша бо, ни разумеша въ тме ходящии»,[155] и не видеша славы Господня. «Одобелеша бо сердца ихъ, и ушима бо тяшько слышати, очима видети».[156] Рече бо Соломонъ: «Дела нечестивых далече от разума»: [157] «Понеже звахъ вы, и не послушасте, и прострох словеса, и не разуместе, но отметасте моя светы и моихъ же обличений не внимасте»;[158] «Възненавидеша бо премудрость, а страха Господня не изволиша, ни хотяху моихъ внимати светъ, подражаху же моя обличения».[159] Якоже бо Олга часто глаголаше: «Азъ, сыну, Бога познах и радуюся, аще и ты познаеши Бога, то радоватися начнеши». Онъ же не внимаше того, глаголя: «Како азъ хочю инъ законъ одинъ язъ приняти? А дружина моя сему смеяти начнут». Она же рече ему: «Аще ты крестишися, вси имут то же створити». Онъ же не послуша матери и творяше норовы поганьскыя. Аще кто матери не слушаеть, в беду впадае, якоже рече: «Аще кто отца или матерь не слушаеть, смертью да умреть».[160] Се же тому гневашеся на матерь. Соломонъ бо рече: «Кажа злыя, приемлеть себе досажение, обличая нечестиваго, поречеть себе; обличения бо нечестивымъ мозолье имъ суть. Не обличай злыхъ, да не възненавидять тебе».[161] Но обаче любяше Олга сына своего Святослава, ркущи: «Воля Божия да будет: аще Богъ въсхощеть помиловати роду моего и земли Рускые, да възложит имъ на сердце обратитися къ Богу, якоже и мне Богъ дарова». И се рекши, моляшеся за сына и за люди по вся дни и нощи, кормячи сына своего до мужьства его и до възъраста его.

В лето 6464. В лето 6465. В лето 6466. В лето 6467. В лето 6468. В лето 6469. В лето 6470. В лето 6471.

В лето 6472. Князю Святославу възрастьшю и възмужавшю, нача воя съвокупляти многы и храбры. Бе бо и самъ хоробръ и легокъ, ходя аки пардусъ, войны многы творяше. Возъ бо по себе не возяше, ни котла, ни мясъ варя, но потонку изрезавъ конину, или зверину, или говядину, на угълехъ испекъ, ядяше, ни шатра имяше, но подъкладъ постилаше, а седло въ головах; тако же и прочии вои его вси бяху. И посылаше къ странам, глаголя: «Хочю на вы ити».[162] И иде на Оку реку и на Волгу, и налезе вятичи и рече имъ: «Кому дань даете?» Они же ркоша: «Козаром по щелягу от рала даем».

В лето 6473. Иде Святославъ на козары. Слышавше же, козаре изыдоша противу съ княземъ своим каганомъ, и съступиша ся бити, и бывши брани межи ими, одоле Святославъ козаром и городъ ихъ Белу Вежю взя.[163] И ясы победи и касогы, и приде къ Киеву.

В лето 6474. Победи вятичь Святославъ и дань на нихъ възложи.

В лето 6475. Иде Святославъ на Дунай на Болъгары.[164] И бившимъся, одоле Святославъ болгаромъ и взя городовъ 80 по Дунаю, и седе княжа ту въ Переяславци, емля дань на грецехъ.

В лето 6476. Придоша печенизи первое на Рускую землю, а Святославъ бяше в Переяславци. И затворися Ольга съ внукы своими Ярополкомъ, и Олгомъ и Володимеромъ в городе Киеве. И оступиша печенизи городъ в силе тяжьце, бещисленое множьство около города, и не бе лзе вылести изъ града, ни вести послати, и изънемогаху людье гладом и водою. И събравшеся людье оноя страны Днепьра в лодьяхъ и об ону страну стояху, и не бе лзе внити в Киевъ ни единому же ихъ, ни изъ города къ онемъ. И въстужиша людье в городе и ркоша: «Не ли кого, иже бы на ону страну моглъ доити и речи имъ: аще не приступите утро подъ городъ, предатися имамъ печенегом?» И рече одинъ отрокъ: «Азъ могу преити». Горожани же, ради бывше, ркоша отроку: «Аще можеши, како ити — иди». Онъ же изыде изъ града съ уздою и хожаше сквозе печенегы, глаголя: «Не виде ли коня никтоже?» Бе бо умея печенежскы, и ̀и мняхуть и-своихъ. И яко приближися к реце, свергъ порты съ себе, сунуся въ Днепръ, и побреде. И видевше, печенези устремишася на нь, стреляюще его, и не могоша ему ничтоже створити. Они же, видевше съ оноя страны, приехавше в лодьи противу ему, взяша и́ в лодью и привезоша и къ дружине. И рече имъ: «Аще не подъступите заутра рано подъ город, предатися имуть людье печенегом». Рече же имъ воевода ихъ, именемъ Претичь: «Подъступимъ заутра в лодьях и, попадъше княгиню и княжичи, умьчимъ на сю страну, и люди.[165] Аще ли сего не створим, погубити ны имать Святославъ». И яко бысть заутра, вседоша в лодья противу свету, въструбиша велми трубами, и людье въ граде кликоша. Печенизе же мнеша князя пришедша, побегоша розно от града. И изыде Олга съ внукы и съ людми к лодьямъ. И видевъ же, князь печенежьскый възвратися единъ къ воеводе Притичю и рече: «Кто се приде?» И рече ему: «Людье оноя страны». И рече князь печенежьскый: «А ты князь ли еси?» Онъ же рече: «Азъ есмь мужь его и пришелъ есмь въ сторожехъ, а по мне идеть вой бещисленое множьство». Се же рече, грозя имъ. И рече князь печенежьскый Претичу: «Буди ми другъ». Онъ же рече: «Тако буди». И подаста руку межю собою, и въдасть печенежьскый князь Претичю конь, саблю, стрелы. Онъ же дасть ему брони, щитъ, мечь. И отступиша печенезе от города, и не бяше лзе коня напоити: на Лыбеди печенегы. И послаша кияне къ Святославу, глаголюще: «Ты, княже, чюжей земли ищешь и блюдешь, а своея ся лишивъ: мале бо нас не възяша печенези, и матерь твою и детий твоихъ. Аще не придеши, ни оборониши нас, да пакы възмуть. Аще ти не жаль отьчины своея, и матерь, стары суща, и дети своих?» То слышавъ, Святославъ вборзе въседъ на кони съ дружиною своею и приде къ Киеву, и целова матерь свою и дети своя, съжалиси о бывшем от печенегъ. И събра воя и прогна печенегы в поле, и бысть мирно.

В лето 6477. Рече Святославъ къ матери своей и къ боярам своимъ: «Не любо ми есть в Киеве жити, хочю жити в Переяславци в Дунаи, яко то есть среда земли моей, яко ту вся благая сходяться: от Грекъ паволокы, золото, вино и овощи разноличьнии, и и-Щеховъ и изъ Угоръ — серебро и комони, изъ Руси же — скора, и воскъ, и медъ и челядь». И рече ему мати: «Видиши ли мя болну сущю, камо хощеши от мене?» — бе бо разболелася уже. Рече же ему: «Погребъ мя, иди аможе хощеши». И по трехъ днехъ умре Олга. И плакася по ней сынъ ея, и внуци ея и людье вси плачемъ великим и, несъше, погребоша ю на месте. И бе заповедала Олга не творити трызны над собою, бе бо имущи прозвутера, и тъ похорони блажену Олгу.

Си бысть предътекущия хрестьяньской земли, аки деньница пред солнцем и аки заря предъ светомъ. Си бо сияше аки луна в нощи, тако и си в неверныхъ человецехъ светяшеся аки бисеръ въ кале: калне бо беша грехом, не омовени святымъ кресщением. Си бо омыся святою купелью, съвлечеся греховныя одежда ветхаго человека Адама, и въ новый Адамъ облечеся, еже есть Христосъ. Мы же речемъ къ ней: «Радуйся, руское познание къ Богу, начатокъ примирению быхом». Си первое вниде въ царство небесное от Руси, сию бо хвалять рустии сынове акы началницю, ибо по смерти моляшеся къ Богу за Русь. Праправеднихъ бо душа не умирают, якоже рече Соломонъ: «Похваляему праведному възвеселятся людье»,[166] бесмертье бо есть память его, яко от Бога познавается и от человекъ. Се бо вси человеци прославляют, видяще лежащю в теле за многа лета, рече бо пророкъ: «Прославляюща мя прославлю».[167] О сяковыхъ бо Давидъ глаголаше: «В память вечную будеть праведникъ, от слуха зла не убоится; готово серце его уповати на Господа, утвердися сердце его и не подвижится».[168] Соломонъ бо рече: «Праведници въ векы живуть, и от Господа мьзда имъ есть и строение от Вышняго. Сего ради приимут царствие красоте и венець доброты от рукы Господня, яко десницею защитить я и мышьцею покрыеть я».[169] Защитилъ бо есть силою блаженую Ольгу от противника и супостата дьявола.

В лето 6478. Святославъ посади Ярополка в Кыеве, а Олга в Деревехъ. В се же время придоша людье новъгородьстии, просяще князя себе: «Аще не поидете к нам, то налеземъ князя себе». И рече к нимъ Святославъ: «А бы кто к вам шелъ». И отпреся Ярополкъ и Олгъ. И рече Добрыня: «Просите Володимиря». Володимиръ бо бе от Малуши, милостьнице Ольжины;[170] сестра же бе Добрыня, отець же бе има Малъко Любчанинъ, и бе Добрыня уй Володимеру. И реша новгородци Святославу: «Въдай ны Володимира». И пояша новгородьци Володимира себе, и иде Володимиръ съ Добрынею, уемъ своим, к Новугороду, а Святославъ къ Переяславцю.

В лето 6479. Прииде Святославъ Переяславцю, и затворишася болгаре в городе. И изълезоша болгаре на сечу противу Святославу, и бысть сеча велика, и одолеваху болгаре. И рече Святославъ воем своимъ: «Уже нам зде пасти, потягнемъ мужьскы, братье и дружино!». И к вечеру одоле Святославъ и взя город копьем, рькя: «Се городъ мой!». И посла къ греком, глаголя: «Хощю на вы ити и взяти городъ вашь, яко и сий». И ркоша греци: «Мы недужи противу вамъ стати, но возми на нас дань и на дружину свою, и повежьте ны, колько васъ, да вдамы по числу на головы». Се же ркоша греци, льстячи подъ русью: суть бо греци мудри[171] и до сего дни. И рече имъ Святославъ: «Есть нас 20 тысящь» и прирече 10 тысящь, бе бо руси 10 тысящь толко. И пристроиша греци 100 тысящь на Святослава и не даша дани. И поиде Святославъ на грекы, и изидоша противу руси. Видевъ же русь и убояшася зело множьства вой, и рече Святославъ: «Уже намъ некамо ся дети, и волею и неволею стати противу. Да не посрамим земли Руские, но ляжемы костью ту, и мертьвы бо сорома не имаеть. Аще ли побегнемъ, то срамъ нам. И не имамъ убегнути, но станемъ крепко, азъ же предъ вами поиду: аще моя глава ляжеть, то промыслите о себе». И ркоша вои: «Идеже глава твоя ляжеть, ту и главы наша сложим». И исполчишася русь и греци противу. И сразистася полка, и оступиша греци русь, и бысть сеча велика, и одоле Святославъ, и греци побегоша. И поиде Святославъ, воюя, къ городу[172] и другая городы разбивая, иже стоять пусты и до днешьнего дне.

И съзва цесарь в полату бояры своя и рече имъ: «Что створим? Не можемъ стати противу ему». И ркоша ему бояре: «Посли к нему дары, искусимъ ̀и, любезнивъ ли есть злату, или паволокам?». Послаша к нему злато и паволокы и мужа мудра и рькоша ему: «Глядай взора его и лица его и смысла его». Онъ же, вземъ дары, приде къ Святославу. И яко придоша греци с поклоном, рече: «Въведете я семо». И придоша, и поклонишася ему, и положиша предъ ним злато и паволокы. И рече Святославъ, прочь зря: «Похороните!». Отроци же Святославли, вземше, похорониша. Сли же цесаревы възвратишася къ цесарю и съзва цесарь бояры. И ркоша же послании, яко «Придохомъ к нему и въдахомъ дары, и не позре на ня и повеле схоронити». И рече единъ: «Искуси ̀и единою и еще — посли ему оружье». Они же послушаша его и послаша ему мечь и ино оружье. Онъ же, приимъ, нача любити, и хвалити, и целовати цесаря. И придоша опять къ цесарю и поведаша вся бывшая. И ркоша бояре: «Лють сей мужь хощеть быти, яко имения не брежет, а оружье емлеть. Имися по дань». И посла цесарь, глаголя сице: «Не ходи къ городу, но възми дань и еже хощеши», за маломъ бо бе не дошелъ Цесаря-града. И вдаша ему дань; имашеть же и за убьеныя, глаголя, яко «Родъ его възметь». Възя же и дары многы и възвратися в Переяславець с похвалою великою. Видевъ же мало дружины своея, рече в себе: «Егда како, прелестивше, изъбьють дружину мою и мене», беша бо мьнози погыбли на полку. И рече: «Поиду в Русь и приведу боле дружины».

И посла слы къ цесареви в Дерестеръ, бе бо ту цесарь, ркя сице: «Хочю имети миръ с тобою твердъ и любовь». Се же слышавъ, цесарь радъ бысть и посла дары къ нему болша первыхъ. Святославъ же прия дары и поча думати съ дружиною своею, ркя сице: «Аще не створимъ мира съ цесаремъ, а увесть цесарь, яко мало нас есть и, пришедше, оступят ны в городе. А Руская земля далече есть, а печенези с нами ратни, а кто ны поможет? Но створим миръ с цесаремъ, се бо ны ся по дань ялъ, и то буди доволно намъ. Аще ли начнет не управляти дани, то изнова изъ Руси, съвокупивше вои множайша, и придемъ къ Цесарюграду». И люба бысть речь си дружине, и послаша лепьшии мужи къ цесареви, и придоша въ Дерьстеръ, и поведаша цесареви. Цесарь же наутрея призва я, и рече цесарь: «Да глаголють сли руссции». Они же ркоша: «Тако глаголеть князь нашь: хочю имети любовь съ царем грецькымъ свершену прочая вся лета». Цесарь же, радъ бывъ, повеле письцю писати на харотью вься реци Святославли. И начаша глаголати сли вся речи, и нача писець писати. Глаголя сице:

«Равно другаго свещания,[173] бывшаго при Святославе, велицемь князи рустемъ и при Свенгельде, писано при Феофиле синкеле и ко Иоану, нарецаемому Цимьскому,[174] цесарю грецкому, в Дерьстре, месяца иулия, индикта 14, в лето 6479.

Азъ Святославъ, князь рускый, якоже кляхся, и утвержаю на свещании семъ роту свою и хочю имети миръ и свершену любовь съ всякымъ и великымъ цесаремь[175] грецьким и съ Васильем и съ Костянтином, и съ богодохновенными цесари, и съ всими людми вашими, иже суть подо мною Русь, бояре и прочии, до конца века. Яко николиже помышляю на страну вашю, ни сбираю людий, ни языка иного приведу на страну вашю и елико есть подъ властию грецькою, ни на власть Коръсуньскую и елико есть городовъ ихъ, ни на страну Болъгарьску. Да аще инъ кто помыслит на страну вашю, да язъ буду противенъ ему и бьюся с ним. Якоже и кляхся азъ к цесаремь грецьскымъ, и со мною бояре и русь вся, да хранимъ правая свещания. Аще ли от техъ самехъ и преждереченыхъ не храним, азъ же и со мною и подо мною, да имеемъ клятву от Бога, в неже веруемъ — в Перуна и въ Волоса, бога скотья, да будем золоте, якоже золото се,[176] и своимъ оружьемь да иссечени будемъ, да умремъ. Се же имеете во истину, якоже створихъ ныне к вамъ, и написахъ на харотьи сей и своими печатьми запечатахомъ».

Створивъ же миръ Святославъ съ грекы и поиде в лодьяхъ къ порогом. И рече ему воевода отень и Свенгелдъ: «Поиди, княже, около на конех, стоять бо печенези в порозехъ». И не послуша его и поиде въ лодьяхъ. Послаша же переяславци къ печенегом, глаголя: «Идеть Святославъ в Русь, възем именье много у грекъ и полонъ бещисленъ, а с маломъ дружины». Слышавше же печенези се, заступиша порогы.[177] И приде Святославъ къ порогомъ, и не бе лзе проити пороговъ. И ста зимовать въ Белобережьи, не бе в них брашна, и бысть гладъ великъ, яко по полугривне голова коняча, и зимова Святославъ. Весне же приспевъши, поиде Святославъ в порогы.

В лето 6480. Приде Святославъ в порогы, и нападе на ня Куря, князь печенежьскый, и убиша Святослава, и взяша голову его, и во лбе его зделаша чашю, оковавше лобъ его, и пьяху в немъ. Свенгелдъ же приде къ Киеву къ Ярополку. И бысть всехъ лет княжения Святославля лет 28.

В лето 6481. Нача княжити Ярополкъ.

В лето 6482.

В лето 6483. Ловы деюшю Свеньгелдичю, именемъ Лотъ, ишедъ бо изъ Киева, гна по звери в лесе. Узре ̀и Олегъ и рече: «Кто се есть?». И ркоша ему: «Свенгелдиць». И, заехавъ, уби ̀и, бе бо ловы дея Олегъ. И о том бысть межи има ненависть, Ярополку на Ольга, и молвяше всегда Ярополку Свенгелдъ: «Поиди на брата своего и приимеши власть един его», хотя отмьстити сыну своему.

В лето 6484.

В лето 6485. Поиде Ярополкъ на Олга, брата своего, на Деревьскую землю. И изыде противу ему Олегъ, и ополчистася, и сразившимася полкома, и победи Ярополкъ Олга. Побегъшю же Олгови с вои своими в город, рекомый Вручий,[178] и бяше мостъ чресъ гроблю к воротам городным, и, теснячися другъ друга, спехнуша Олга с моста въ дебрь. И падаху людье мнози с моста, и удавиша и кони и человеци. И вшедъ Ярополкъ в город Олговъ, прия волость его, и посла искати брата своего, и искавше его, не обретоша. И рече одинъ древлянинъ: «Азъ видехъ вчера, яко съпехънуша ̀и с моста». И посла Ярополкъ искатъ, и волочиша трупье изъ гробли от утра и до полудни, и налезоша исподи Олга подъ трупьемъ, и внесъше, положиша ̀и на ковре. И приде Ярополкъ надъ онь и плакася, и рече Свеньгелду: «Вижь, иже ты сего хотяше». И погребоша Ольга на месте у города Вручего, и есть могила его у Въручего и до сего дни. И прия волость его Ярополкъ. И у Ярополка жена грекини бе, и бяше была черницею, юже бе привелъ отець его Святославъ и въда ю за Ярополка, красы деля лица ея. Слышавъ же се Володимиръ в Новегороде, яко Ярополкъ уби Олга, убоявся, бежа за море. А Ярополкъ посади посадникъ свой въ Новегороде, и бе володея единъ в Руси.

В лето 6486. В лето 6487.

В лето 6488. Приде Володимиръ с варягы къ Новугороду и рече посадником Ярополъчимъ: «Идете къ брату моему и речете ему: Володимиръ идеть на тя, пристраивайся противу бится». И седе в Новегороде.

И посла к Роговолоду Полотьску, глаголя: «Хощю пояти дщерь твою жене». Онъ же рече дъщери своей: «Хощеши ли за Володимира?». Она же рече: «Не хощю розути Володимера,[179] но Ярополка хочю». Бе бо Рогъволодъ перешелъ изъ заморья, имяше волость свою Полотьске, а Туръ Турове, от него же и туровци прозвашася. И приидоша отроци Володимири и поведаша ему всю речь Рогнедину, дщери Рогъволоже, князя полотьского. Володимиръ же събра вои многы, варягы и словены, и чюдь и кривичи, и поиде на Рогъволода. В се же время хотяху вести Рогънедь за Ярополка. И приде Володимиръ на Полотескъ, и уби Рогъволода и сына его два, и дщерь его Рогънедь поя жене.

И поиде на Ярополка. И приде Володимиръ къ Киеву съ вои многыми, и не може Ярополкъ стати противу Володимиру, и затворися Ярополкъ въ Киеве съ людьми своими и съ Блудом; и стояше Володимиръ, обрывся на Дорогожичи,[180] межи Дорогожичемъ и Капичемъ, и есть ровъ и до сего дне. Володимиръ же посла къ Блуду, воеводе Ярополчю, с лестью глаголя: «Поприяй ми! Аще убью брата своего, имети тя начну въ отца место своего, и многу честь возмеши от мене: не я бо почалъ братью бити, но онъ. Азъ же того убояхъся и придохъ на нь». И рече Блудъ къ посланымъ Володимиром: «Азъ буду ти въ приязнь». О злая лесть чловечьская! Якоже Давидъ глаголеть: «Ядый хлебъ мой, възвеличилъ есть на мя лесть».[181] Сьи убо лукавоваше на князя лестью. И пакы: «Языкы своими льшаху. Суди имъ, Боже, да отпадут от мыслий своих; по множьству нечестиа их изърини я, яко прогневаша тя, Господи».[182] И пакы тоже рече Давидъ: «Мужи крови льстиви не припловят дний своих».[183] Се есть светъ золъ, еже свещевають <...> на кровопролитье, то суть неистовии, иже приимъше от князя или от господина своего честь и дары, ти мыслят о главе князя своего на погубление, горьше суть таковии бесовъ. Якоже и Блудъ предасть князя своего, приимъ от него чести многы, сь бо бысть повиненъ крови той. Се бо Блудъ затворивъся съ Ярополком, слаше къ Володимиру часто, веля ему приступати къ городу бранью, самъ мысля убити Ярополка; гражаны же не лзе убити его. Блуд же не възмогъ, како бы ̀и погубити, замысли лестью, веля ему не изълазити на брань изъ града. И рече же Блудъ Ярополку: «Кияне слются къ Володимирю, глаголюще: “Приступай къ городу бранью, яко предамы ти Ярополка”. Побегни изъ града». И послуша его Ярополкъ и бежа изъ града, и, пришедъ, затворися въ граде Родене на устьи Ръси,[184] а Володимиръ вниде в Киевъ, и оседяху Ярополка в Родне. И бе гладъ великъ в немъ, и есть притча и до сего дне: беда аки в Родне. И рече Блудъ Ярополку: «Видиши ли, колко вой у брата твоего? Намъ ихъ не перебороти. И твори миръ съ братомъ своимъ», льстя подъ ним, се рече. И рече Ярополкъ: «Тако буди». И посла Блудъ къ Володимеру, глаголя, яко «Събыся мысль твоя, яко приведу Ярополка к тебе, и пристрой убити ̀и». Володимиръ же, то слышавъ, въшедъ въ дворъ теремьный отень, о немьже преже сказахом, седе ту с вои и съ дружиною своею. И рече Блудъ Ярополку: «Поиди къ брату своему и рьци ему: что ми ни вдаси, то язъ прииму». Поиде же Ярополкъ, и рече ему Варяжько: «Не ходи, княже, убьють тя; побегъни в печенегы и приведеши воя». И не послуша его. И приде Ярополкъ къ Володимиру, и яко полезе въ двери, подъяста и́ два варяга мечема подъ пазусе. Блудъ же затвори двери и не дасть по немъ внити своимъ. И тако убьенъ бысть Ярополкъ. Варяжько же, видевъ, яко убьенъ бысть Ярополкъ, бежа съ двора в Печенеги и мьного воева с печенегы на Володимира, и одва приваби ̀и, заходивъ к нему роте. Володимиръ же залеже жену братьню грекиню, и бе непраздна, от нея же роди Святополка. От греховнаго бо корене злый плодъ бываеть: понеже была бе мати его черницею, а второе — Володимиръ залеже ю не по браку, прелюбодейчищь бысть убо. Темьже и отець его не любяше, бе бо от двою отцю — от Ярополка и от Володимира.

Посемъ реша варязи Володимеру: «Се град нашь, и мы прияхом ̀и, да хощем имати откупъ на них по 2 гривне от человека». И рече имъ Володимиръ: «Пожьдете, даже вы куны сберут за месяць». И жьдаша за месяць, и не дасть имъ. И реша варязи: «Съльстилъ еси нами, да покажи ны путь въ грекы». Онъ же рече: «Идете». Изъбра от нихъ мужа добры и смыслены и храбъры и раздая имъ грады; прочии же идоша Цесарюграду. И посла пред ними слы, глаголя сице цесареви: «Се идуть к тебе варязи, не мози ихъ держати в городе, или то створят ти въ граде, яко зде, но расточи я раздно, а семо не пущай ни единого».

И нача княжити Володимиръ въ Киеве одинъ и постави кумиры на холъму вне двора теремнаго: Перуна деревяна, а голова его серебряна, а усъ золот, и Хоръса, и Дажьбога, и Стрибога и Семарьгла, и Мокошь.[185] И жряхут имъ, наричуще богы, и привожаху сыны своя, и жряху бесомъ, и оскверняху землю требами своими. И осквернися требами земля Русская и холмъ тъ. Но преблагый Богъ не хотяй смерти грешником: на томъ холме ныне церкы есть святаго Василья, якоже последе скажем. Мы же на преднее възвратимся.

Володимиръ же посади Добрыню, уя своего, в Новегороде. И пришед Добрыня Новугороду, постави Перуна кумиръ надъ рекою Волховомъ, и жряхуть ему людье новгородьстии акы Богу.

Бе же Володимиръ побеженъ похотью женьскою. Быша ему водимыя: Рогънедь, юже посади на Лыбеди, идеже есть ныне селце Передславино, от нея же роди 4 сыны: Изеслава, Мьстислава, Ярослава, Всеволода, и две дщери; от грекини — Святополка; от чехыни — Вышеслава; а от другия — Святослава, а от болъгарыни — Бориса и Глеба. И наложьниць у него 300 въ Вышегороде, 300 в Белегороде, а 200 на Берестовемъ в сельци, еже зовут и ныне Берестовое. И бе несытъ блуда, и приводя к себе мужьскыя жены и девици растляя. Бе бо женолюбець, яко и Соломонъ: бе бо у Соломона, рече, женъ 700, а наложьниць 300.[186] Мудръ же бе, а на конець погибе; сь же бе невеглас, на конець обрете спасение. «Велий бо Господь, и велья крепость его, и разуму его несть числа!»[187] Зло бо есть женьская прелесть, якоже рече Соломонъ, покаявся, о женахъ: «Не внимати зле жене, медъ бо каплеть от устъ ея, жены любодеица, во время наслажаеть твой гортань, последе же горьчее желчи обрящеши. Прилепляющаяся ей вънидутъ съ смертью въ адъ. На пути бо животъныя не находит, блудна бо теченья ея и неблагоразумна».[188] Се же рече Соломонъ о прелюбодеицах. О добрыхъ же женахъ рече: «Дражьши есть каменья многоценьнаго. Радуется о ней мужь ея. Дееть бо мужеви своему благо все житье. Обретши волну и ленъ, створить благопотребная рукама своима. Бысть яко корабль, куплю деющь, издалеча събираеть себе богатьство, и въстаеть из нощи, и даеть брашно дому и дело рабынямъ. Видевши тяжание, куповаше, от делъ руку своею насадить тяжание. Препоясавши крепько чресла своя, и утверьди мышьци свои на дело. И вкуси, яко добро делати, и не угасает светилникъ ея всю нощь. Руце свои простираеть на полезная, локти же свои утвержает на веретено. Руце свои отверзаеть убогимъ, плодъ же простре нищим. Не печеться о дому своемъ мужь ея, егда кде будет. Сугуба оденья створит мужю своему, очерьвлена и багъряна себе оденья. Възоренъ бываеть въ вратехъ мужь ея, внегда аще сядеть на соньмищи съ старци и съ жители земля. Опоны створи и отдасть в куплю. Уста же своя отверзе смыслено и въ чинъ молвить языкомъ своим. Въ крепость и в лепоту облечеся. Милостыня ея въздвигоша чада ея, обогатеша, и мужь ея похвали ю. Жена бо разумлива благословлена есть, боязнь же Господню да хвалит. Дадите ей от плода устъну ея, да хвалять въ вратехъ мужа ея».[189]

В лето 6489. Иде Володимиръ к ляхомъ и зая грады ихъ: Перемышль, Червенъ[190] и ины городы, иже суть и до сего дне подъ Русью. Семъ же лете и вятичи победи и възложи на ня дань от плуга, якоже отець его ималъ.

В лето 6490. Заратишася вятичи, и иде на ня Володимеръ и победи я въторое.

В лето 6491. Иде Володимиръ на ятвягы[191] и взя землю ихъ. И приде къ Киеву и творяше требу кумиромъ с людми своими. И ркоша старци и бояре: «Мечемъ жребий на отрока и девицю, на негоже падеть, того зарежемы богомъ». И бяше варягъ одинъ, бе дворъ его, идеже бе церкви святыя Богородица, юже създа Володимиръ. Бе же варягь тъй пришелъ от Грекъ и держаше веру в тайне крестьяньскую. И бе у него сынъ красенъ лицем и душею, и на сего паде жребий по зависти дьяволи. Не терпяше бо дьяволъ, власть имея надъ всими, сьй бяше ему акы тернъ въ сердци, и тщашеся потребити оканный и наусти люди. И реша, пришедъша, послании к нему, яко: «Паде жребий на сынъ твой, изволиша бо ̀и бози себе, да створим требу богомъ». И рече варягъ: «Не суть то бози, но древо; днесь есть, а утро изъгнило есть, не ядять бо, ни пьють, ни молвять, но суть делани руками въ древе секирою и ножемъ. А Богъ единъ есть, емуже служать греци и кланяются, иже створилъ небо, и землю, и человека, и зъвезды, и солнце, и луну, и далъ есть жити на земли. И си бози что сделаша? Сами делани суть. Не дамъ сына своего бесом». Они же, шедъше, поведаша людемъ. Они же, вземъше оружье, поидоша на нь и разъяша дворъ около его. Онъ же стояше на сенехъ съ сыномъ своимъ. Реша ему: «Дай сына своего, дамы ̀и богомъ». Онъ же рече: «Аще суть бози, то единого себе послють бога, да поимуть сына моего. А вы чему перетребуете имъ?». И кликнуша и секоша сени подъ ними, и тако побиша я. И не свесть никтоже, кде положиша я. Бяху бо человеци тогда невегласи, погани, и дьяволъ радовашеся сему, не веды, яко близъ погибель хотяше быти ему. Тако бо и преди тъщашеся погубити родъ хьрестьяньскый, но прогонимъ бяше крестомъ честнымъ во иныхъ странах, зде же мняшеся оканьный, яко зде ми есть жилище, зде бо не суть учили апостоли, ни пророци прорекъли, не ведый пророка, глаголюща: «И нареку не люди моя люди моя»;[192] о апостолехъ же рече: «Во всю землю изидоша вещания ихъ и в конець вселеныя глаголи ихъ».[193] Аще бо и теломъ апостоли суть зде не были, но учения ихъ, яко трубы, гласять по вселений въ церьквахъ, имъже ученьемъ побежаемъ противнаго врага, попирающе подъ нозе, якоже попраста и сия отьченика, и приимъша венець небесный съ святыми мученикы и съ праведными.

В лето 6492. Иде Володимиръ на радимици. И бе у него воевода Волчий Хвостъ, и посла пред собою Володимиръ Волчия Хвоста, и срете радимичи на реце Пищане,[194] и победи Волчий Хвостъ радимичи. Темь и русь корятся радимичемъ, глаголюще: «Пещаньци волъчья хвоста бегають». Быша же радимичи от рода ляховъ; и, пришедше ту, ся вселиша, и платять дань в Руси, и повозъ везуть и до сего дне.

В лето 6493. Иде Володимиръ на Болъгары съ Добрынею, уемъ своимъ, в лодьяхъ, а торкы берегомъ приведе на конехъ. И тако победи болгары.[195] И рече Добърыня Володимиру: «Съглядахъ колодникъ, и суть вси в сапозехъ. Симъ дани намъ не платити, поидеве искать лапотникъ». И сътвори миръ Володимиръ с болгары, и роте заходиша межи собою, и реша болгаре: «Толи не буди мира межи нами, оли же камень начнеть плавати, а хмель грязнути». И приде Владимиръ къ Киеву.

Источник: http://drevne-rus-lit.niv.ru/drevne-rus-lit/text/povest-vremennyh-let/nachalo-knyazhenya-svyatoslavlya.htm