В лето 6572. Бежа Ростиславъ кь Тмутороканю, сынъ Володимирь, внукъ Ярославль, и с нимъ бежа Порей и Вышата, сынь Остромирь, воеводы новгородьского. И, пришедъ, выгна Глеба изь Тмуторокана, а самъ седе в него место.[378]

В лето 6573. Иде Святославъ на Ростислава кь Тмутороканю. Ростиславъ же отступи прочь из града, не убоявься его, не не хотя противу строеви своему оружья взяти. Святослав же, пришедъ кь Тмутороканю, посади сына своего пакы Глеба и вьзвратися вьсвояси. Пришедъ пакы опять Ростиславъ и выгна Глеба, и приде Глебъ кь отцю своему, Ростиславъ же, пришедъ, седе вь Тмуторокане. В то же лето Всеславъ <...> рать почалъ.

В та же времена бысть знамение на западе: звезда превелика, луче имущи акы кроваве, вьсходящи с вечера по заходе солънечнемь, и бысть за 7 дний.[379] Се же проявляющи не на добро. По сем же быша усобице многы и нашествие поганыхъ на Руськую землю, си бо звезда, акы кровава, проявьляющи крови пролитье. В та же времена бысть детище вьвержено вь Сетомле. Сего же детища выволокоша рыболове в неводе, его же позоровахомъ и до вечера, и пакы вывергоша и́ вь воду. Бяше бо на лице его сице срамнии удове, а иного нельзе казати срама ради. Пред сим же временемь солнце пременися,[380] не бысть светло, но акы месяць бысть. Его же невегласии глаголють снедаему сущю.

Се же бывають сия знамения не на добро, мы бо по сему разумехом. Якоже древле, при Антиосе, вь Ерусалиме ключися внезапу по всему граду за 40 дний являтися на вьздусе на конихъ рищющимъ, вь оружьи, златыя одежа имущи, и полкы обоямо являемы, и оружью движащюся. Се же являше нахожение Антиохово, нашествие рати на Ерусалимъ.[381] По сем же при Нероне цесаре в том же Ерусалиме въсия звезда вь образъ копийный надъ городомъ: се же проявляше нахожение рати от римлянъ.[382] И пакы сице бысть при Устияне цесаре, звезда вьсия на западе, испущающи луча, юже прозываху блисталницю. И бысть сияющи за 20 дний. По сем же бысть звездамъ течение с вечера до утрия, яко мнети всимъ, яко падають звезды. И пакы солнце без лучь сияше. Се же проявляше крамолы, недузи, человекомъ умертвие бяше.[383] Пакы же при Маврикии цесари бысть се: жена детище роди безъ очью, безъ руку, вь чресла бе ему рыбьий хвостъ прирослъ. И песъ родися шестоногъ. Въ Африкии же 2 детища родистася, единъ о 4 ногах, а другий о двое главу.[384] По сем же бысть при Костянтине иконоборци, сына Леонова: течение звездьное бысть на небесех, оттергаху бо ся на землю, и яко видящимъ мнети кончину. Тогда же вьздух вьзлияся повелику. В Сурии же бысть трусъ велий, земле раседшися трий поприщь, изииде дивно изь земли мьска, человецскымъ гласомъ глаголющи, проповедающи наитье языка, еже и бысть: наидоша бо срацини на Палестинскую землю.[385] Знаменья бо вь небеси, или вь звездах, или вь солнци, или птицами, или етеромъ чимъ не благо бывають, но знамения сица на зло бывають, или проявление рати, или гладу, или на смерть проявьляеть.

В лето 6574. Ростиславу седящу вь Тмуторокани и емлющи дань у касогъ и в ыных странахъ, сего же убоявъ же ся греци, послаша с лестью котопана.[386] Оному же пришедшю кь Ростиславу и уверившюся ему, и чьтяше ̀и Ростиславъ. Единою же пьющу Ростиславу с дружиною своею, рече котопанъ: «Княже! Хощю на тя пити». Оному же рекшу: «Пий». Онъ же, испивъ половину чаши, а половину вдасть князю пити, дотиснувься палцемь в чашю, бе бо имея подъ ногътемь растворение смертьное, и дасть князю, урекъ смерть до осми дний. Оному же испившю, котопанъ же, пришедъ Кьрсуню, поведа, яко в сий день умреть Ростиславъ, якоже и бысть. Сего же котопана побиша камениемь людье корсуньстии. Бе же Ростиславъ мужь добръ на рать, вьзрастом же лепъ и красенъ лицемь, милостивъ убогимъ. Умре же месяца февраля вь третий день, и тако положенъ бысть вь церкви святыя Богородица.

В лето 6575. Заратися Всеславъ, сынъ Брячьславль, Полотьский, и зая Новъгородъ. Ярославичи же трие — Изяславъ, Святославъ, Всеволодъ, — совокупивше воя, идоша на Всеслава, зиме сущи велице. И придоша кь Меньску, и меняне затворишася вь граде. Си же братья взяша Менескъ, исьсекоша мужи, а жены и дети взяша на щиты, и поидоша кь Немизе, и Всеславъ поиде противу. И совокупившеся обои на Немизе, месяца марта вь 3 день. И бяше снегъ великъ. И поидоша противу собе, и бысть сеча зла, падоша мнозе, и одоле Изяславъ, Святославъ, Всеволодъ, а Всеславъ бежа.[387] По сем же, месяца иуня вь 10 день, Изяславъ, Святославъ и Всеволодъ целовавше крестъ честный кь Всеславу, рекше: «Приди к нама, а не створим ти зла». Он же, надеяся целованию креста, перееха в лодьи чресъ Днепръ. Изяславу же в шатеръ предъидущю.[388] И тако яша Всеслава на Рши у Смоленьска, преступивше крестъ. Изяславъ же приведе Всеслава Кыеву, и вьсадиша ̀и в порубъ съ двеима сынома.

В лето 6576. Придоша иноплеменьници на Рускую землю, половци мнозе. Изяславъ же, и Святославъ и Всеволодъ изиидоша противу имъ на Льто. И бывши нощи, поидоша противу собе. Грехъ ради нашихъ попусти Богъ на ны поганыя, и побегоша русьскыя князи, и победиша половци.[389]

Наводить Богъ по гневу своему[390] иноплеменьники на землю, и тако скрушенымъ имъ вьспомянуться к Богу; усобная же рать бываеть от сважения дьяволя. Богъ бо не хощеть зла вь человецехъ, но блага, а дьяволъ радуеться злому убийству, кровопролитью, вьздвизая свары, зависти, братоненавидения, клеветы. Земли же согрешивши которей любо, то казнить Богъ смертью, или гладомъ, или наведениемь поганыхъ, или ведромъ, или гусеницею, или инеми казньми. Аще ли покаавшеся будемь, в немже ны Богъ велить быти, глаголеть бо намъ пророкомъ: «Обратитеся ко мне всимъ сердцемь вашимъ, постомъ и плачемь».[391] Да аще сице творимъ, всихъ грехъ прощени будемь, но мы на злое възвращаемься, аки свинья в кале греховьнемь присно валяющеся, и тако пребываемь. Темже и пророкомъ намъ глаголеть: «Разумехъ, — рече, — яко жестокъ еси, и шия железна выя твоя»,[392] того ради «удержах от васъ дождь, пределъ единъ одождихъ, а другаго не одождихъ, исьше»; «И поразихъ вы зноемь и различными казньми, то и тако не обратитеся ко мне».[393] Сего ради винограды ваша, и смоквие ваша, нивы и дубравы ваша истьрохъ, глаголеть Господь, а злобъ вашихъ не могохъ истерти. «Послахъ на вы различныя болезни и смерти тяжькы»,[394] и на скоте ихъ казнь свою послахъ, «то и тако не обратистеся», ко мне, но ресте: «Мужаимъся». Доколе не насытистеся злобъ ваших? Вы бо уклонистеся от пути моего, — глаголеть Господь, — соблазните многы, сего ради «свидитель скоро на противьныя, на прелюбодеица, и на кленущаяся именемь моимъ во лжю, и на лишающая мьзды наимника, и насильствующе сироте и вдовици, и на укланяющая судъ криво. Почто не здерьзастеся вь гресехъ вашихъ? Но уклонисте законы моя и не схранисте ихъ. И обратитеся ко мне — и обращюся кь вамъ, — глаголеть Господь, — и азъ отверзу вамъ хляби небесныя и възвращю от васъ гневъ свой, дондеже все обилуеть вамь, и не имут изнемощи виногради ваши и нивы. Но вы отяжасте на мя словеса ваша, глаголюще: суетень работая Богу».[395] Темже усты чтуть мя, а сердце ваше далече отстоить от мене»,[396] — глаголеть Господь. Того ради, ихже просимь и не улучимъ. «Будет бо, рече, егда призовете мя, и азъ не послушаю васъ».[397] Взищете меня злии и не обрящете: не вьсхотеша бо ходити по путемь моимъ. Да того ради затворяеться небо, ово зле отверзаеться, градъ в дождя место пущая, ово ли сланою плоды узнабляя и земьлю зноемь томя, нашихъ ради грехъ. Аще ли ся покаемь о злобахъ своихъ, то «аки чадомъ своимъ подасть намъ вся прошения, и одождить намъ дождь ранъ и позденъ. И наполняться гумна ваша пшеници, и прольються точила виньная и маслиньная. И вьздамъ вамъ за лета, яже пояша прузи, и хрустове, и гусиница; сила моя великая, юже послахъ на вы»,[398] — глаголеть Господь вседержитель. И си слышаще, вьстягнемся от зла на добро: вьзищете суда, избавите обидимаго, на покаяние придемь, не вьздающе зла за зло, и ни клеветы за клевету, но любовию прилепимся Господе Бозе нашем, постомъ и рыданиемь, слезами омывающе вся прегрешения, не словомъ наречающеся крестьани, а поганьскы живуще. Се бо не поганьски ли живемь, аще въ стречю верующе: аще бо кто усрящеть чернорисца, то вьзвращаеться, или единець, или свинью — то не поганьскии ли есть се? Се бо по дьяволю научению кобь сию держать. Друзии же чиханию веруют, еже бываеть на здравье голове. Но сими дьяволъ льстить и другыми нравы, всякыми льстьми превабляеть ны от Бога: трубами, скомрахы, и гусльми и русальями.[399] Видимъ бо игрища утолочена, и людий множьство на нихъ, яко упихати начнуть другъ друга, позоры деюще от беса замышленаго дела, а церкви стоять. Егда же бываеть годъ молитвы, мало ихь обретаеться вь церкви. Да сего ради казни приемлемь от Бога всякыя, нахожение ратныхъ; по Божью повелению приемлемь казнь грехъ ради нашихъ.[400] И мы же на предлежащее возвратимся.

Изяславу же со Всеволодомъ Кыеву пришедшю, а Святославу — Чернигову, и людье кыевьстии прибегоша Кыеву, и створивше вече на торговищи, и реша, пославшеся ко князю: «Се половци росулися по земли, да вдай, княже, оружья и кони, и еще бьемся с ними». Изяслав же сего не послуша. И начаша людье говорити на воеводу на Коснячька, и идоша с веча <...> на гору, и придоша на дворъ Коснячьковъ и не обретоша его, у двора сташа Брячьславля и реша: «Поидемь, высадимь дружину ис погреба».[401] И разделишася надвое: и половина ихъ иде кь погребу, а половина иде по Мосту, сии же идоша на княжь дворъ. Изяславу седящю на сенехъ с дружиною своею, и начаша претися сь княземь стояще доле, а кьнязю изо оконца зрящю и дружине стоящи у князя, рече Тукы, Чюдиновь брат, Изяславу: «Видиши, княже, людье вьзвыли, посли, ать блюдуть Всеслава». И се ему глаголющю, и другая половина людий приде от погреба, отворивше погребъ. И реша дружина князю: «Се зло есть, посли ко Всеславу, ать призвавше ко оконьцю и проньзут и́ мечемь». И не послуша сего князь. Людье же кликнуша и идоша к порубу Всеславлю. Изяслав же, се видивъ, со Всеволодомь побегоста с двора. Людье же высекоша Всеслава ис поруба вь 15 день сентября и поставиша ̀и среде двора княжа. И дворъ княжь разъграбиша, бещисленое множьство злата и сребра, и кунами и скорою. Изяслав же бежа в Ляхы.

По сем же половцемь воюющимъ по земли Рустей, а Святославу же сущю в Чернигове, а половцемь воюющимъ около Чернигова, Святославъ же, собравъ дружины неколико, изыиде на ня ко Сновьску.[402] И узреша половци идущя въя и пристрояшася противу. И видивъ Святославъ множьство ихъ и рече дружине своей: «Потягнемь, уже намъ не льзе камо ся дети». И удариша вь коне, и одоле Святославъ вь трехъ тысящах, а половець 12 тысящь; и тако изби я, и друзии потопоша вь Снъви, а князя ихъ руками яша вь 1 день ноября. И вьзвратися с победою вь градъ свой Черниговъ Святославъ.

Всеслав же седе в Кыеве. Се же Богъ яви крестьную силу: понеже Изяслав целовавъ крестъ и я ̀и, темже наведе Богь поганыя, сего же яве избави кресть честьный. Вь день бо Вьздвижения Всеславъ <...> въздохнувъ, рече: «О кресте честный! Понеже к тобе веровахъ, избави мя от рова сего».[403] Богъ же показа силу крестьную на показание земли Рустей, да не преступають честнаго креста, целовавше его; аще ли кто преступить, то и сде приимуть казнь и на преидущемь веце казнь вечную. Понеже велика есть сила крестьная: крестомъ бо побежени бывають силы бесовьскыя, крестомъ бо Господь княземь пособить в бранехъ, крестомь огражени вернии человеци и побежають супостаты противныя, крестомъ бо вьскоре избавляеть от напасти призывающимъ его с верою. Ничто <...> беси бояться, токмо креста. Аще бо бываеть от бесовъ мечтание, знаменавъше лице крестомь, прогоними бывають. Всеслав же седе вь Кыеве месяць 7.[404]

В лето 6577. Поиде Изяславъ с Болеславомъ[405] на Вьсеслава, Всеславъ же поиде противу. И приде к Белугороду Всеславъ, бывши нощи, утаися кыянъ, бежа из Белагорода кь Полотьску. Заутра же видивьше людье бежавша князя и вьзвратишася Кыеву, и створиша вече, послашася кь Святославу и кь Всеволоду, глаголюще: «Мы же зло створили есмы, князя своего прогнавше, а се ведеть на ны землю Лядьскую, а поидете вь град отца своего. Аще ли не хощета, то намъ неволя: зажегши городъ свой <...> ступити вь Грецискую землю». И рече имъ Святославъ: «Ве послеве кь брату своему: да аще поидеть на вы с ляхы погубить васъ, то ве противу ему ратью, не дадиве погубити града отца своего; аще ли хощет с миромъ, то в мале придеть дружине». И утешиста кыяне. Святослав же и Всеволодъ посласта кь Изяславу, глаголюще: «Всеславь ти бежалъ, а не води ляховъ Кыеву, противнаго ти нетуть; аще ли хощеши гневомъ ити и погубити град, то веси, яко намъ жаль отня стола». То слышавъ, Изяславъ остави ляхы, иде с Болеславомъ, мало ляховъ поемъ; посла же предъ собою сына своего Мьстислава Кыеву. И, пришедъ, Мьстиславъ исьсече кыяны, иже бяху высекли Всеслава, числомь 70 чади, а другыя исьслепиша, другыя без вины погубивъ, не испытавъ. Изяславу же идущю кь граду, и изиидоша людье противу с поклономъ, и прияша князь свой кыане. И седе Изяславъ на столе своемь, месяца мая вь 2 день. И распуща ляхы на покормъ, и изьбиваху ляхы отай. Възвратися Болеславъ вь землю свою. Изяслав же вьзгна торгь на гору[406] и прогна Всеслава ис Полотьска, и посади сына своего Мьстислава вь Полотьске, иже вьскоре умре ту. И посади в него место брата его Святополка, а Всеславу же бежавшю.

В лето 6578. Родися у Всеволода сынъ, и нарекоша именемь Ростиславъ. Того лета заложена бысть церквы святаго Михаила в манастыре Вьсеволожи на Выдобичи.[407]

В лето 6579. Воеваша половци у Растовца и у Неятина.[408] Того же лета выгна Всеславъ Святополка ис Полотьска. Того же лета победи Ярополкъ Всеслава у Голотичьска.[409] В та же времена приде волъхвь, прельщенъ бесомъ. Пришедъ бо Кыеву, глаголаше: «Явили ми ся есть 5 богъ, глаголюще: сице поведай людемь, яко на пять лет Днепру потещи вьспять, а землямь переступати на ина места, яко стати Гречкой земли на Руской земли, а Руской на Гречкой, и прочимъ землямъ изменитися». Его же невегласии послушахуть, а вернии насмехахуся, глаголюще ему: «Бесъ тобою играеть на пагубу тобе». Еже и бысть ему: вь едину бо нощь бысть без вести. Беси бо подтокше и на зло вьводять и по сем же насмихающися, вринуша и в пропасть смертьную, научивше <...> глаголати, яко се скажемь бесовьское наущение и действо.

Бывши бо единою скудости вь Ростовьстей области, и вьстаста два волъхва от Ярославьля, глаголюща, яко «Ве свемы, кто обилье держить».[410] И поидоста по Волзе, и кде придучи в погость, ту же нарекаста лучьшия жены, глаголюща, яко «Си жито держать, а сии — медъ, а сии рыбы, а сии скору». И привожаху к нима сестры своя, и матери и жены своя. Она же вь мьчте прорезавше за плечемь, вынимаста любо жито, любо рыбы, или веверицю, и убиваша <...> многы жены, имения ихъ имаша собе. И приидоста на Белоозеро и бе у нею людий инехъ 300. В то же время приключися прити от Святослава дань емлющю Яневи, сыну Вышатину, и поведаша ему белоозерьци, яко два кудесника избила многы жены по Волъзе и по Шьксне и пришла есть семо. Янь же, испытавъ, чья еста смерда, и уведевъ, яко своего ему князя, пославь же кь нимь, иже около ею суть, и рече имъ: «Выдайте волъхва та семо, яко смерда еста моего князя». Они же сего не послушаша. Янь же поиде самъ безъ оружья, и реша ему отроци его: «Не ходи безъ оружья, осоромять тя». Онь же повеле взяти оружье отрокомь, и бяста 12 отрока с нимь, и поиде к нимь кь лесу. Они же сташа, сполчившеся противу. Яневи же идущю с топорцемь, выступиша от нихъ трие мужи и придоша кь Яневи, рекуще ему: «Видя, идеши на смерть, не ходи». Оному же повелевшю бити я, кь прочим же поиде. Они же сунушася на ня, единъ грешися Яня топоромъ. Янь же, оборотя топоръ, и удари тыльемь, и повеле отрокомъ сещи я. Они же бежаша в лесъ, убиша же ту попа Янева. Янь же, вшедъ в горъдъ к белоозерьчемь и рече имъ: «Аще не имете волъхву сею, и не иду от васъ за лето». Белоозерьци же, шедше, и яша я и приведоша я к нему. И рече има: «Что ради погубисте толико человекъ?» Онима же рекшима, яко «Си держать гобину, да аще истребиве, избьеве всихъ, и будеть обилье. Аще ли хощеши, то предъ тобою выемлеве жито, или рыбу, или ино». Янъ же рече: «Поистине лжете: створилъ бо есть Богъ человека от земля, и съставленъ костьми и жилами от крови, и несть в немь ничтоже и не весть ничтоже, токмо Богъ единъ весть». Она же рекоста: «Ве два ведаеве, како есть створенъ человекъ». Онъ же рече: «Како?» Она же рекоста: «Мывся Богъ в мовьници и вьспотився, отерься вехтемь, и сверже с небеси на землю. И распреся сотона сь Богомь, кому в немь створити человека. И створи дьявьлъ человека, а Богъ душю во нь вложи. Темже, аще умреть человекь, в землю идеть, а душа кь Богу». Рече же има Янь: «Поистине прельстилъ есть васъ дьяволъ. Которому Богу веруета?» Она же рекоста: «Антихръсту». Он же рече има: «То где есть?» Она же рекоста: «Седить вь бездне». И рече има Янь: «То кий есть Богъ, седя вь бездне? То есть бесъ, а Богь есть седя на небесехъ и на престоле, славимъ от ангелъ, иже предъстоять ему со страхомъ, не могуще на нь зрети. А сий бо от ангелъ сверженъ бысть, егоже вы глаголете антихръста, за величание его, и сверженъ бысть с небеси и есть в бездне, якоже вы глаголета, ждя, егда придеть Богъ с небесе и, сего емь антихръста, свяжеть узами и посадить во огни вечнемь со слугами его и иже к нему веруеть. А вама же зде муку прияти от мене, а по смерти — тамо». Онема же рекшима: «Нама бози поведають, не можеши нама створити ничтоже». Онъ же рече има: «Лжють вама бози ваши». Она же рекоста: «Нама предстати предъ Святославомъ, а ты намъ не можеши створити ничтоже». Янь же повеле бити я и поторъгати браде ею.[411] Сима же битыма, и браде поторгане проскепомъ, рече има Янь: «Что вамъ бозе молвять?» Онема же рекьшима: «Стати намъ предъ Святославомъ». И повеле Янь вложити има рубля въ уста и привязати ко упругамъ, и пустити я предъ собою в лодии, а самъ по нихъ иде. И сташа на устьи Шекъсны, и рече има Янь: «Што вамъ молвять бози ваши?» Она же рекоста: «Сице намъ бози молвять: не быти нама живымъ от тебе». И рече има Янь: «То вамъ право молвять бозе ваши». Она же рекоста: «Аще насъ пустиши, много ти добра будеть, аще насъ погубиши, многу печаль приимеши и зло». Онъ же рече има: «Аще васъ отпущю, то зло ми будеть от Бога, аще ли васъ погублю, то мьзда ми будеть от Бога». И рече Янь к повозникомъ: «Ци кому васъ родинъ убьенъ от сею?» Они же реша: «Мне мати, а другому сестра, иному родичь».[412] Онъ же рече имъ: «Мьстите своихъ». Они же, поимше я, избиша <...> и повесиша я на древе: отместье приимша от Бога по правде. Яневи же идущю домовь, вь другую нощь медведь влезъ, угрызъ я и снеде кудеснику. И тако погыбоста научениемь дьяволимь, инемь ведуща и гадающа, а своея пагубы не ведуща. Аще быста ведала, то не бы пришла на место се, идеже ятома быти; аще ли ята быста, то почто глаголаста, яко «Не умрети нама», а оному мыслящю убити я? Но се есть бесовьское научение; беси бо не ведають мысли человечьскыя, но влагають помыслъ вь человека, а тайны не ведуща. Богъ же единъ весть помышления человецьска, беси бо не ведають ничегоже, суть бо немощнии и худи взоромь.

Яко се скажемь о взоре ихъ и о омрачении их. В си бо времена и в се лета приключися некоему новгородьцю прити в чюдь. И приде кудесьнику, хотя волъхвования от него. Онъ же по обычаю своему нача призывати бесы вь храмину свою. Новгородцю же седящю на порозе тоя храмины вь стороне, кудесникъ лежаше оцепъ, и шибе имъ бесъ. Кудесникъ же, вьставъ, рече новгородцю: «Бози наши не смеють внити, нечто имаши на собе, егоже бояться». Онъ же помяну кресть на собе и, отъшедъ, повеси кроме храмины тоя. Онъ же нача изнова призывати бесы. Беси же, метавше имъ, поведаша, что ради пришелъ есть. По сем же нача просити его: «Что ради бояться его, егоже носимъ на собе — крестъ?» Онъ же рече: «То есть знамение небеснаго Бога, егоже наши бози бояться». Онъ же рече: «То каци суть бози ваши, кде живуть?». Онъ же рече: «Бози наши живуть вь безднахъ. Суть же образомъ черни, крилати, хвостъ имущи; вьсходять же и подъ небо, слушающе вашихъ боговъ. Ваши бози на небесе суть. Аще кто умреть от вашихъ людий, то возносимь есть на небо, аще ли от нашихъ умираеть, но носимъ есть к нашимъ богомъ вь бездну». Якоже грешници вь аде суть, ждуще мукы вечныя, а праведници вь небеснемь <...> жилищи вьдворяються съ ангелы.

Сица ти есть бесовьская сила, и лепота и немощь. Темьже и прельщають человекы, велящи имъ глаголати виденья, являющеся имъ, несвершенным верою являющеся вь сне, инемь вь мечте, и тако волъхвують научениемь дьяволимъ. Паче же женами бесовьская волъхвованиия бывають: исконе бо бесъ жену прельсти, жена же — мужа, тако в си роди много волъхвують жены чародействомь, и отравою, инеми бесовьскыми козньми, Но и мужи прельщени бывають от бесовъ невернии. Яко и се вь первый родъ при апостолехъ бо бысть Симонъ волъхвъ, иже вълъшествомъ творяше, повеле псомь человечьскы глаголати и самъ пременяшеться ово старъ, ово молодъ, ово ли иного пременяше въ иного образъ в мечтаньи.[413] Сице творяшеть Аньний, Замврий, волъшвеньемь чюдеса творяшеть противу Моисееви, но въскоре не возмогоста. Но и Кунопъ творяшеть мьчтаниемь бесовьскымъ, яко и по водамъ ходити, и ина мечтания творяше, бесомъ льстимь, на пагубу собе и инемь.[414]

Сице бысть волъхвъ вьсталъ при Глебе в Новегороде; глаголашеть бо людемь и творяшеть бо ся аки богъмъ, и многы прельсти, мало не весь городъ, глаголаше бо, яко «Все ведаю», хуля веру крестьяньскую, глаголашеть бо, яко «Преиду по Волъхову предъ всими». И бысть мятежь в городе, и вси яша ему веру и хотя победити епископа. Епископъ же, вземь крестъ и оболкъся в ризы, ста, рекъ: «Иже хощеть веру яти волъхву, да за нь идеть, аще ли веруеть кто кресту, да идеть к нему». И разделишася надвое: князь бо Глебъ и дружина его сташа у епископа, а людье вси идоша за волъхва. И бысть мятежь великъ вельми. Глебъ же, возма топоръ подъ скутъ, и приде к волъхву и рече ему: «То веси ли, что утре хощеть быти, что ли до вечера?» Онъ же рече: «Все ведаю». И рече Глебъ: «То веси ли, что ти хощеть днесь быти?» Онъ же рече: «Чюдеса велика створю». Глебъ же, выня топоръ, и ростя ̀и, и паде мертвъ, и людие разиидошася. Он же погибе теломъ и душею предався дьяволу.

В лето 6580. Принесоша святая страстотерпца Бориса и Глеба. Совокупившеся Ярославличи — Изяславь, Святъславъ и Всеволодъ, митрополитъ же бе тогда Георгий, епископъ Петръ Переяславьскый, Михаилъ Юрьевьскый, Федосий же игуменъ Печерьскый, Софроний же святаго Михаила игуменъ, Герьманъ святаго Спаса игуменъ и Никола, игумень Переяславьский,[415] и прочии игумени вси, створивше праздникъ светелъ и преложиша я в новую церковь, юже здела Изяславъ, яже стоить и <...> ныне. Вземше бо первое Бориса в деревяний раке Изяславъ, и Святославъ и Всеволодъ, вземше на плещи своя и понесоша и, предъидущимъ черноризьцемъ, свеща держаще в рукахъ, и по нихъ дьякони с кандилы, и по семь прозвутери, и по нихъ епископи с митрополитомъ, и по нихъ с ракою идяхуть. И принесъше ̀и в новую церковь, отверзоша раку, исполнися церкви благоухания, воне благы; видивше се, прославиша Бога. И митрополита ужасъ обииде, бяше бо не твердо веруя к нима; и падъ ниць, прося прощения. И целовавше мощи его, вложиша и в раку камену. По сем же вземше Глеба в раце камени, и вьставиша ̀и на сани и, емше за вужа, везоша ̀и. Яко быша вь дверехъ, ста рака, не поидущи. И повелеша народу звати: «Господи помилуй», и повезоша. И положиша я месяца мая вь 20.[416] И отпевше литургию, обедаша братья си вся накупь, когождо с бояры своими и с любовью великою. Бе бо тогда держа Вышегородъ Чюдинъ, а церковь Лазорь. И по семь разиидошася вьсвояси.

В лето 6581. Вьздвиже дьяволъ котору вь братьи сей Ярославличихъ. И бывши распре межи ими, быста сь себе Святославъ со Всеволодомъ на Изяслава. И изииде Изяславъ ись Кыева. Святослав же и Всеволодъ внидоста в Кыевъ месяца марта вь 22 и седоста на столе на Берестовомъ, преступивша заповедь отню. Святослав же бе начало выгнанию братню, желая болшая власти, Всеволода бо прельсти и глаголя, яко «Изяславь сватается сь Всеславомъ, мысля на наю; да аще его не вариве, имать насъ прогнати». И тако взостри Всеволода на Изяслава. Изяслав же иде в Ляхы со имениемь многимъ и сь женою, уповая богатьствомъ многымь, глаголя, яко «Симь налезу воя». Еже взяша у него ляхове, показаша ему путь от себе. А Святославъ седе в Кыеве, прогнавъ брата своего, преступивъ заповедь отьню, паче же и Божию. Великъ бо есть грехъ преступати заповедь отца своего: ибо исперва преступиша сынове Хамове на землю Сифову, по 400 лет отмьщение прияша от Бога; от племени бо Сифова суть евреи, иже избиша хананейско племя, вьсприяша свой жребий и свою землю.[417] И пакы преступи заповедь Исавъ[418] отца своего и прия убийство; не добро есть преступати придела чюжаго.

Того же лета основана бысть церковь Печерьская Святославомъ княземь, сыномь Ярославлимь, игуменомъ Федосьемь, епископомъ Михаиломъ, митрополиту Георгиеви тогда сущю вь Грецехъ, а Святославу в Кыеве седящю.

В лето 6582. Федоси, игуменъ Печерьскый, преставися. Скажемь о успении его мало. Федосий бо обычай имяше, приходящю бо постьному времени, в неделю масленую,[419] вечеръ, бо по обычаю целовавъ братью и поучивъ ихъ, како проводити постьное время, вь молитвахъ нощьных и дневныхъ, и блюстися от помыслъ скверныхъ, и от бесовьскаго насеянья. «Беси бо, — рече, — всевають черноризьцемь помышлениа, похотения лукава, вжагающе имъ помыслы, темьже врежаеми бывають имъ молитвы. Да приходящая таковыя мысли вьзбраняти <...> знамениемь крестнымь, глаголюще сице: “Господи Иисусе Христе, Боже нашь, помилуй насъ, аминъ”. И к симъ вьздержание имети от многаго брашна; въ еденьи бо мьнозе и вь питьи безмерне вьзрастають помысли лукавии, помысломъ же вьзьрастьшимь стваряеться грехъ». «Темже, — рече, — противитися бесовьскому действу и пронырьству ихъ, и блюстися от лености и от многаго сна, и бодру быти на пение церковьное, и на предания отецьская и на почитания книжная. Паче же имети во устехъ псаломъ Давидовъ подабаеть черноризьцемь — симь бо прогонити бесовьское уныние. Паче же всего имети любовь в себе к меншимь и кь старейшимъ покорение и послушание, <...> старейшимь же <...> кь меншимь любовь и наказание. Образъ бывати собою вьздержаниемь и бденьемь, и хожениемь смиренымь, и тако наказывати и меньшая, утешивати я, и тако проводити постъ». Глаголашеть бо сице, яко «Богъ далъ есть намъ сию 40 дний на очищение души; се бо есть десятина, от лета даема Богу: дний бо есть от года до года 300 и 60 и 5 дний, и от сихъ дний десятый день вьздаяти Богу — десятину, еже есть постъ си четыредесятный, в ня же дни очистившися душа, празнуеть светло вьскресение Господне, веселящеся о Бозе. Постьное бо время очищаеть убо умъ человеку. Пощение бо исперва проображено бысть: Адаму не вкусити от древа единого; пости бо ся Моисей дний 40, сподоби бо ся прияти законъ на горе Синайстей и ведевъ славу Божию; постомъ Самуила мати роди; постивьшеся ниневгитяне гнева Божия избыша; постився, Данилъ виденья сподобися великаго; постився Илья акы на небо взятъ бысть и в пищю породную; постившеся трие отроци угасиша силу огненую; постивься Господь дний 40, намъ показа постное время».[420] Постомъ апостоли искорениша бесовьское учение; постомъ явишася отци наши акы светила в мире и сияють и по смерти, показавше труды великыя и вьздьрьжания, яко сей великий Антоний, и Евьфимий, и Сава[421] и прочии отци, ихже и мы поревнуемь, братье». Сице поучивъ братью и целовавъ вся по имени, и тако изиидяше из манастыря, возмя мало коврижекъ. И вшедъ в пещеру, и затворяше двери пещеры и засыпаше пьрьстью, и не глаголаше никомуже. Аще ли будяше нужное орудье, то оконцемь мало беседоваше в суботу или в неделю, а по иныи дни пребываше в посте и вь молитве, и вьздержашеся крепко. И прихожаше в манастырь в пятокъ на канунъ Лазоревъ,[422] в сий бо день кончаеться постъ 40-ный, начинаеться от перваго понеделника наставшии Федорове неделе,[423] кончаеть же ся в пятокъ Лазоревъ; а Страстная неделя[424] уставлена есть поститися страсти ради Господня.

Федосьеви же пришедшю по обычаю, целова братью и празнова сь ними неделю Цветную,[425] и дошедъ великаго дни Вьскресениа, по обычаю празновавъ светло, впаде в болезнь. И разболевшюся ему и болевшю ему дний 5, по семь, бывшу вечеру, и повеле изьнести ся на дворъ. Братья же, вземше ̀и на санехъ, и поставиша ̀и прямо церкви. Онъ же повеле братью собрати всю. Братья же удариша в било, и собравшеся вси. Онъ же рече имъ: «Братье моя, и отци мои, и чада моя! Се азъ отхожю от васъ, якоже яви ми Господь в постьное время, в пещере ми сущю, изыити от света сего. Вы же кого хощете игуменомь поставити себе; да и азъ благословение подалъ быхъ ему?» Они же рекоша ему: «Ты еси отець намъ всемъ, да его же изволиши самъ, то намъ будеть отець и игуменъ, и послушаемь его, яко и тебе». Отець же нашь Федосий рече: «Шедше кроме мене, наречете, егоже хощете, кроме двою брату, Николы и Игната; вь прочихъ кого хощете, от старейшихъ даже и до меншихъ». Они же, послушавъше его, отступивше мало кь церкви, сдумавьше, и послаша два брата, глаголюще сице: «Егоже изволить Богъ и твоя честная молитва, егоже тобе любо, того нарци». Федосий же рече имъ: «Да аще от мене хощете игумена прияти, то азъ створю вамъ, но не по своему изволению, но по Божию строенью». И нарече имъ Якова прозвутера. Братьи же нелюбо бысть, глаголюще, яко «Не зде есть постригълъся»; бе бо Ияковъ пришелъ сь Летьца с братомъ своимъ Павломъ. И начаша братья просити Стефана деместника,[426] суща тогда ученика Федосьева, глаголюще, яко «Се сь есть вьздраслъ подъ рукою твоею и <...> тебе послужилъ есть, сего ныне вдай». Рече же имъ Федосий: «Се азъ по Божию повелению нареклъ бехъ вам Якова; се же вы своею волею створити хощете». И послушавъ ихъ, и предасть имъ Стефана, да будеть имъ игуменъ. И благослови Стефана и рече ему: «Чадо! Се предаю ти манастырь, блюди с опасением его, якоже устроихъ и вь службахъ, то держи. Преданья манастырьская и устава не изменяй, но твори вся по закону и по чину манастырьскому». И по семь вземше ̀и братья, и несоша ̀и в келью и положиша ̀и на одре. И шестому дни наставшю, и болну сущю велми, приде к нему Святославъ сь сыномъ своимъ Глебомъ. И седящима има у него, рече ему Федосий: «Се отхожю света сего и се предаю ти манастырь на сблюденье, еда будеть что смятение в немь. Се поручаю Стефану игуменьство, не давай его въ обиду». И князь, целовавъ его, и обещася пещися манастыремь, и отиде от него. Семому же дни пришедшю, изнемогающю Федосьеви, и призва Стефана и братью и нача имъ глаголати сице: «Аще по моемь отшествии света сего, аще буду Богу угодилъ, и приялъ мя будеть Богъ, то по моемь отшествии манастырь ся начнеть строити и прибывати в немь, то вежьте, яко приялъ мя есть Богъ. Аще ли по моемь животе оскудевати начнетьь манастырь <...> черноризьци, потребами манастырьскыми, то ведуще будете, яко не угодилъ буду Богу». И се ему глаголющю, плакахуся братья, глаголюще: «Отче! Моли за ны Господа; вемы бо, яко Богъ труда твоего не презре». И преседеша братья у него ту нощь всю, и наставшю дни осмому, вь вторую суботу по Пасце вь 2 час дни, и предасть душю в руце Божии месяца мая вь 3 день, индикта вь 11 лето. И плакашася по немь братья. Бе же Федосий заповедалъ братьи положити ся в пещере, идеже показа труды многы, и рекъ сице: «В нощи похраните тело мое», якоже и створиша. Вечеру бо приспевшю, вся братья вземше тело его и положиша ̀и в пещере, проводивьше сь песньми, и сь свещами, честьно, на хвалу Господу нашему Иисусу Христу.

Стефану же предержащю манастырь и блаженое стадо, яже бе совокупилъ Феодосий...[427] Таки черноризьци, аки светила в Руськой земли сияху: ово бо бяху постьници, овии же на бдение, овии же на кланяние коленьное, овии на пощение чересъ день и чересъ два дни, овии же ядяху хлебъ с водою, инии же зелье варено, и друзии сыро. В любви пребывающе, меншии покоряющеся старейшимъ, не смеюще пред ними глаголати, но все с покорениемь и с послушаниемь великомъ. И тако же и старейшии имяху любовь к меншимъ, наказаху и утешающе аки чада вьзлюбленая. Аще который братъ впадеть в кое любо согрешение, и утешаху ̀и, и епитемью[428] единого брата разделяху 3-е или 4 за великую любовь. Такова бо бяше любовь в братьи той и вьздержание велико. Аще братъ етеръ вънъ идяше изь манастыря, и вся братья имяху о томъ печаль велику и посылають по нь, приводяху брата кь манастырю и, шедше, вси покланяхуся игумену, и умолять игумена и приимаху в манастырь брата с радостью. Таци бо беша любовници, и вьздерьжници. От нихъ же наменю неколико мужь чюдьныхъ.

Первый Демьань прозвутерь, бяше постьникъ и вьздерьжьник, яко развее хлеба и воды ясти ему до смерти своей. Аще бо коли кто принесяше детищь боленъ, кацимъ любо недугомъ одерьжимъ, приношаху в манастырь, или свершенъ человекъ, кацимъ любо недугомъ одръжим, прихожаше в манастырь кь блаженому Федосьеви, и повелеваше сему Демьяну молитву творити над болящимъ. И абье творяше молитву и масломъ святымъ помазаше, и абье исцелеваху приходящии к нему. Единою же ему разболевшюся, и конець прияти лежащю ему в болести, и приде к нему ангелъ вь образе Федосьеве, даруя ему царство небесное за труды его. По семь же приде Федосий съ братьею, и седоша у него, оному же изнемогающю, вьзревъ на игумена и рече: «Не забывай, игумене, еже ми еси ночесь обещалъ». И разуме Федосий великий, яко видение виде, и рече ему: «Брате Демьяне! Еже ти есмь обещалъ, то ти буди». Онь же смеживъ очи и предасть духъ в руце Божии. Игумен же и братья похоронивше тело его.

Тако же и другый братъ, именемъ Еремей, иже помняше крещение земли Руськой. Сему даръ данъ от Бога: проповедаше, провиде будущая. И аще кого видяше в помышлении, обличаше втайне и наказаше блюстися от дьявола. Аще который братъ мысляше изыити из манастыря, узряше и, пришедъ к нему, и обличаше мысль его и утешаше брата. И аще кому речаше, любо добро, любо зло, сбывашеться старцево слово.

Бе же и другий братъ, именемь Матфей, той бе прозорливъ. Единою ему стоящю вь церкви на месте своемь, и вьзведе очи свои, и позре по братьи, иже стоять, поюще, по обеими сторонама, и виде обьходяща беса вь образе ляха в луде, носяща вь приполе цтветокъ, еже глаголеться лепокъ. И обьходя подле братью, взимая из лона цьветокъ и вержаше на кого любо. Аще прилпяше кьму цтветокъ поющих от братья, и тъ, мало стоявъ и раслабевъ умомъ, вину створивъ каку любо, исходяше изь церкви, и шедъ в келью и спаше, и не възвратяшеся вь церковь до отпетья. Аще ли верже на другаго, и не прилпяше к нему цтветокъ, стояше бо крепко вь пеньи, дондеже отпояху утренюю, и тогда идяше в келью свою. И се видя, старець поведа братьи своей. И пакы же сий старець виде се: по обычаю бо сему старцю отстоявшю утренюю, братьи отпевши заутренюю, предъ зорями идоша по кельямь своимъ, сий же старець последи исхожаше ись церкви. Идущю же ему единою, и седе, почивая, подъ биломъ, бе бо келья его подале церкви, и види се, акы толпа поиде от врать. И вьзведе очи свои, виде единого седяiда на свиньи, а другыя текуща около его. И рече имь старець: «Камо идете?» И рече бесъ, седя на свиньи: «По Михаля по Толбоковича». Старець знаменася крестьнымъ знаменьемь и приде в келью свою. И бысть свет, и разуме старець и рече келейнику: «Иди, вьспроси, есть ли Михаль в кельи?» И реша ему, яко «Выскочилъ есть чресъ столпъе по заутрени». И поведа старець видение се игумену и всей братьи. При семь бо старьци Федосий преставилъся, и бысть Стефанъ игуменъ, и по Стефани Никонъ,[429] и сему старцю и еще сущю. Единою ему стоящю на заутрении, вьзведе очи, хотя видити игумена Никона, и виде осла, стояща на игумени месте, и разуме, яко не вьсталъ есть игуменъ. Тако же ина многа видения провидяше старець сь, и почи вь старости добре в манастыре семь.

Яко се бысть другый черноризець, именемь Исакий, яко еще сущю в мирьскомъ житьи и богату сущю ему, бе бо купець, родомъ торопчанинъ,[430] и помысли быти мнихомъ, и раздая имение свое требующимъ и по манастыремь, иде кь великому Антонию в пещеру, моляшеся ему, дабы створилъ черьноризьцемь. И приятъ ̀и Антоний, и возложи на нь порты чернецькие и нарече имя ему Исакий, бе бо имя ему мирьское Чернь. Сий же Исакий вьсприя житье крепко: облечеся въ власяницю,[431] и повеле купити собе козелъ и одерти мешькомь козелъ, и возьвлече ̀и на власяницю, и осъше около его кожа сыра. И затворися в пещере, вь единой улици, вь кельице мале, яко 4 лакотъ, и ту моляше Бога беспрестани день и нощь со слезами. Бе же ядение его проскура[432] одина, и та же чресъ день, и воды в меру пьяше. Приношаше же ему великий Антоний и подаваше оконьцемь ему, яко ся вместяше рука, и тако приимаше пищю. И того створи лет 7, на светъ не вылазя, ни на ребрехъ лежа, но, седя, мало приимаше сна. И единою, по обычаю, наставшю вечерю, и поча кланятися, поя псалмы оли до полунощи, и яко трудяшеться, седяше же на седале своемь. И единою же ему седящю по обычаю и свещю угасившю, и внезапу светъ восия, яко солнце, вь пещере, яко зрак вынимаа человеку. И поидоста две уноши к нему прекрасьна, и блистася лице има, яко и солнце, и глаголаста к нему: «Исакье! Ве есве ангела, а се идеть к тобе Христосъ, сь ангелы». И, вьставъ, Исакий виде толпу, и лица ихъ паче солнца, и единъ посреде ихъ и сьяху от лица его паче всихъ. И глаголаста ему: «Исакье, то ти Христосъ, падъ, поклонися ему». Онь же не разуме бесовьскаго действа, ни памяти прекреститися, выступя поклонися, акы Христу, бесовьскому действу. Беси же кликнуша и рекоша: «Нашь еси уже, Исакье», и вьведоша ̀и в кельицю, и посадиша ̀и, и начаша садитися около его — полна келья и улица печерьская. И рече единъ от бесовъ, глаголемый Христосъ: «Возмите сопели и бубны и гусли, и ударяйте, ать ны Исакье сьпляшеть». И удариша в сопели и вь гусли и вь бубни и начаша имъ играти. И утомивше ̀и, оставиша ̀и еле жива сущи, и отъидоша, поругавшеся ему.

Заутра же бывши свету и приспевшю вкушению хлеба, и приде Антоний кь оконцю по обычаю и глагола: «Благослови, отче Исакье!» И не бысть гласа, ни послушания. И многажды глагола Аньтоний, и не бысть ответа. И глагола Антоний: «Се уже яко преставилъся есть». И посла в манастырь по Федосья и по братью. И откопавше, где бе загражено устье, и пришедше и взяша ̀и, мняще ̀и мертваго, и вынесьше, положиша ̀и предъ пещерою. И узреша, яко живъ есть. И рече игуменъ Федосий, яко «Се имать от бесовьскаго действа». И положиша ̀и на одре, и служаше около его Антоний. В то же время приключися Изяславу прити из Ляховъ, и нача гневатися Изяславъ на Антония изо Всеслава.[433] И приславъ Святьславъ нощью, поя Антония к Чернигову. Антоний же, пришедъ кь Чернигову, и вьзлюби Болъдину гору,[434] и ископавъ пещеру, и ту вселися. И есть манастырь святоi Богородице на Болдинахъ горахъ и до сихъ дний.

Федосий же, уведа, яко Антоний шелъ кь Чернигову, и, шедъ с братьею, вьзя Исакья и принесе кь собе в келью, и служаше около его. Бе бо раслабленъ теломъ и умомъ, яко не мощи ему обратитися на другую страну, ни вьстати и ни седити, но лежа на единой стране и подъ ся поливаше многажды, и червье кыняхуся подъ бедру ему с мочения. Федосий же самъ своима рукама омываше и спряташе ̀и, за 2 лете створи се около его. Се же бысть чюдно и дивно, яко, за две лете лежа, сий ни хлеба вькуси, ни воды, ни от какаго брашна, ни от овоща, ни языкомъ проглагола, но немъ и глухъ лежа за 2 лете. Федосий моляшеть Бога за нь и молитву творяшеть над нимь нощь и день, дондеже на 3-ее лето проглаголавъ и слыша, и на ногы нача вьставати акы младенець, и нача ходити. И не брежаше кь церкви ити, но нужею привлечахуть его кь церкви, и тако по малу научиша ̀и. И по семь научися и на тряпезницю ходити, и посажаше ̀и кроме братья и положаху пред нимь хлебъ, и не взимаше его, олны вложити будяше в руце ему. Федосий же рече: «Положите хлебъ пред нимь и не вькладайте в руце ему, ать самъ ясть», и не бреже за неделю ясти и, помалу оглядавься, кушавше хлеба, и тако научися ести, и тако избави ̀и Федосий от козни дьяволя и от прелести.

Исакий же вьсприя дерьзновение и вьздержание жестоко. Федосью же преставившюся и Стефану в него место бывшю, Исакий же рече: «Се уже прельстилъ мя еси, дьяволе, седяща на единомъ месте, а уже не имамъ затворитися в пещере, но имамъ тя победити, ходя в манастыре». И облечеся въ власяницю, и на власяницю свиту вотоляну, и нача уродьство творити, и помагати нача поваромъ и варити на братью. И на заутренюю ходя преже всихъ, и стояше крепко и неподвижно. Егда же приспеяше зима и мрази лютии, и сьтояше вь прабошняхъ, вь черевьихъ и вь протоптаныхъ, яко примерьзняше нози его кь камени, и не двигняше ногами, дондеже отпояху заутренюю. И по заутрени идяше в поварницю и приготоваше огнь, и воду, и дрова, и приходяху прочии повари от братья. Единъ же поваръ, такоже бе именемь Исакий, и рече, посмихаяся: «Исакьи! Оно седить вранъ черьный, иди, ими его». Онъ же, поклонився ему до земли и, шедъ, я врана и принесе ему предо всими повары. И ужасошася и поведаша игумену и братьи. И начаша ̀и братья чтити. Онъ же, не хотя славы человечскыя, и нача уродьствовати и пакостити нача ово игумену, ово братьи, ово мирьскымь человекомъ, друзии же раны ему даяху. И поча по миру ходити, тако же уродомъ ся творя. И вселися в пещеру, в нейже преже былъ, уже бо бе Аньтоний преставилъся, и совокупи собе уныхъ и вьскладаше на нь порты чернецькыя, да ово от игумена Никона раны приимаше, ово ли от родитель детьскыхъ. Се сь же то все терпяше и подъимаше раны и наготу, и студень день и нощь. Вь едину бо нощь вьжегъ пещь во истопце у пещеры, и яко разгореся пещь, бе бо утла, и нача палати пламень утлизнами. Оному же нечимь заложити, и вьступле на пламень ногама босыма, ста на пламени, дондеже изгоре пещь, и слезе. Ина много поведаху о немь, а другому и самовидци быхомъ. И тако взя победу на бесовьскыя силы, яко и мухъ ни во что же имяше устрашения ихъ и мечтания ихъ, глаголашеть бо к нимъ: «Аще бо мя бесте первое прельстиле, понеже не ведахъ козний вашихъ и лукавьства. Ныне же имамъ Господа Иисуса Христа, Бога нашего, и молитву отца нашего Федосья, надеюся на Христа, имамъ победити васъ». И многажды беси пакости деаху и глаголаху ему <...>: «Нашь еси, поклонилъся еси нашему старейшины и намъ». Онъ же глагола имъ: «Вашь старейшина есть антихрьсть, а вы беси есте». И перекрестися, и тако ищезняху. Овогда же ли пакы в нощи прихожаху к нему, и страхъ ему творяще ово вь мечте, яко се многъ народъ с мотыками и с лыскари, глаголюще: «Раскопаемы пещеру сию и се зде загребемь». Инии же глаголаху: «Бежи, Исакье, хотять тя загрести». Онъ же глаголаше к нимъ: «Аще бысте человеце быле, то вь день бысте ходили, а вы есте тма, во тме ходите». И знаменася крестнымь знамениемь, они же ищезняху. А другоичи страшахуть ̀и во образе медвежьи, овогда же лютомь зверемь, овогда же воломь, ово ли змия ползаху к нему, ово ли жабы, и мыши и всякъ гадъ. И не возмогоша ему ничьтоже створити. И рекоша ему: «Исакий! Победилъ ны еси». Онъ же рече: «Якоже и вы первее мене победили есте вь образе Исусъ Христове и вь ангелскомъ, недостойне суще того видения, топервое являстеся вь образе звериномъ и скотьемь, змиями и гадомь, аци же и сами бысте скверни, зли вь виденьи. И абье погыбоша беси от него, и оттоле не бысть ему пакости от бесовъ, якоже самъ поведаше, яко «Се бысть ми за три лета брань си». И потомь нача креплее жити и вьздержание имети, пощенье и бдение. И тако живущу ему, сконча житье свое. И разболеся в пещере, и несоша ̀и болна в манастырь, и до осмога дни скончася о Господе. Игумен же Иванъ и братья спрятавше тело его и погребоша ̀и.

Таци же беша чернорисци Федосьева манастыря, иже сияють и по смерти, яко светила, и молять Бога за зде сущюю братью, и за приносящия в манастырь, и за мирьскую братью. Вь нем же и ныне добродетельно житье живуть и обыце вкупе, вь пеньихъ, и вь молитвахъ и в послушаньихъ на славу Богу всемогущому, и Федосьевами молитвами сблюдаеми, ему же слава вь векы, аминь.

В лето 6583. Почата бысть церкви печерьская надъ основаньемь Стефаномъ игуменомь, изъ основанья бо Федосий поча, а на основаньи Стефанъ поча; и кончана бысть на третьее лето месяца июля въ 1 день.

В се же лето придоша после из немець къ Святославу. Святослав же, величашеся, показа имъ богатьство свое. Они же, видивьше бесщисленое множество злата, и сребра и паволок, реша: «Се ни во что же есть, се бо лежить мертво. Сего суть кметье лучьше. Мужи бо доищуться и болша сего».[435] Сице ся похвали Езекий, царь июдейский, к послом царя асурийска, егоже вся взята быша въ Вавилонъ.[436] Тако и по сего смерти все именье расъсыпашася раздьно.

В лето 6584. Ходи Володимеръ, сынъ Всеволожь, и Олегъ Святъславль ляхомь в помочь на чехы.[437] В се же лето преставися Святославъ, сынъ Ярославль, месяца декабря въ 27, от резанья желве, и положенъ бысть у Спаса. И седе по немь Усеволодь на столе месяца генваря въ 1 день. В се же лето родися у Володимера сынъ Мьстиславъ, внук Всеволож.[438]

Источник: http://drevne-rus-lit.niv.ru/drevne-rus-lit/text/povest-vremennyh-let/v-leto-6522.htm